A Vartuluai Mulai 33

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Ma Moses i ga tata.vadoane value ra tarai Israel ma go ra tinata na varvadoan, ma namur i ga mat.

²Ma i ga biti dari: A Luluai i ga vut maro Sinai, Ma i ga vana rikai tadav diat maro Seir; I ga pupua rikai maro ra luana Paran, Ma i ga vana kan ra vinun na arip na marmar na tena gomgom; A birao na varkurai i ga tur ta ra papar a limana tuna ure diat.

³Maia, i ga mari kana tarai; Kana lavur viviliai dia bakit ta ra limana; Ma dia kiki pire ra kaum, Diat par tikatikai dia tar vaturk vake kaum tinata.

⁴Moses i ga tul tar ra varkurai ta dat, Upi ra tiniba ta ra kivung kai Iakob.

⁵Ma ra Luluai i ga ki na king pire Iesurun. Ba ra umana patuana kai ra tarai dia ga ki rangup, A lavur vuna tarai Israel varurung.

⁶Boina ba Ruben na laun, ma koko na mat, Ma koko ra taraina na paupau ka.

⁷Ma i ga vatang go ra tinata ure Iuda: Luluai, una valongore ra nilai Iuda, Ma una agur pa ia tadav kana tarai; I ga varubu ma ra limana ure diat; Ma una ga maravut ia ure kana lavur ebar.

⁸Ma ure Levi, i ga biti: Kaum Tumim ma kaum Urim dir tur pire kaum vakak na tutana, Nina u ga valar ot pa ia aro Masa, Nina amur ga vartoto me ta ra tava Meriba;

⁹Nina i ga biti ure tamana ma ure nana dari: Pa iau gire dir; Pa i ga mulaot bula ta ra umana turana, Ma damana ra umana natuna iat, pa i ga nunure diat; Tago dia ga nuk pa kaum tinata, Ma dia torom ta kaum kunubu.

¹⁰Diat a vateten tar kaum lavur varkurai tai Iakob, Ma kaum tinata na vartovo tai Israel; Diat a vung ra bulit na davai i ang na katkat ta ra luaina matam, Ma ra kidoloina tinabar di tuntun tar ia ta kaum uguugu na vartabar.

¹¹Luluai, una vadoane kana tabarikik, Ma una manane ra papalum na limana; Una kita kang ra lu i diat dia tut na vinarubu ure, Ma ra lu i diat dia milmilikuane, upi koko diat a tut mulai.

¹²Ure Beniamin, i ga biti: A vakak kai ra Luluai na ki bulu pirana; I kove ta ra bung parika, Ma i kiki livuan ta ra ul a varana.

¹³Ma ure Iosep, i ga biti: Kana gunan na kedek tai ra Luluai, Ta ra lavur ngatngat na magit marama ra bala na bakut, ta ra mavoko, Ma ta ra tava i ninim rikai mara ra pia,

¹⁴Ma ta ra lavur ngatngat na magit dia matuka ta ra keake, Ma ta ra lavur ngatngat na magit dia tavua ta ra gaigai,

¹⁵Ma ta ra lavur bo na magit dia tavua ta ra lualuana ania tana, Ma ta ra lavur ngatngat na magit dia tur ta ra buabuana pa na mutu,

¹⁶Ma ta ra lavur ngatngat na magit dia tavua ta ra rakarakan a gunagunan, ma dia koakor tana, Ma ta ra varmari kai nina i ki ra pupui; Boina ba ra nidoan na ki ta ra ulu i Iosep, Ma ta ra tunurot na ulu i nina i ga luluai ta ra tara na turana.

¹⁷Kana luaina nat na bulumakau, i lia tuna, Ma ra ramuna i da ra ram u ra bulumakau i leing; Na tumatumak ra lavur vuna tarai me tuk tar ta ra ngu na rakarakan a gunagunan; Damana ra vinun na arip na marmar kai Epraim, Ma ra arip na marmar kai Manase.

¹⁸Ma ure Sebulun, i ga biti: Sebulun, una gugu ta kaum lavur vinavana, Ma u Isakar, ta kaum lavur pal na mal.

¹⁹Da ting pa ra tarai upi diat a vana ta ra luana; Ma diat a tul tar ra umana takodo na tinabar abara; Tago diat a maur ma ra ngala na tabarikik na ta, Ma ra ngatngat na tabarikik i tur ivai ta ra veo.

²⁰Ma ure Gad, i ga biti: Nina ba na vangala Gad na ti doan; I kiki da ra leon, Ma i karat kadakadal ra lima, ma ra tunurot na ula.

²¹I ga pilak vake ra luaina tiniba ure mule, Tago di ga tibe vaire pa ra pakana abara pi kai ra tena varkurai; Ma i ga vut tadav ra umana luluai kai ra tarai, Ma i ga pait ot pa ra magit i takodo kai ra Luluai, Ma kana lavur varkurai pire Israel.

²²Ma ure Dan, i ga biti: Dan i da ra nat na leon, Ma i pil rikai maro Basan.

²³Ma ure Naptali, i ga biti: U Naptali, u tar maur ma ra varmari, Ma u tar kor ma ra magit na nidoan tai ra Luluai; Una kale pa ra ta ma ra papar a taubar.

²⁴Ma ure Aser, i ga biti: Aser na ti doan muka, ma na lia ta ra umana bul; Boina ba ra umana turana diat a manane, Ma boina ba na puk ra kauna ta ra dangi.

²⁵Da pait kaum babat ma ra palariam tuna ma ra palarian gobol; Ma da ra e, damana bula ra dekdekim.

²⁶Iesurun, pa ta na mulai dir varogop ma God, Nina i ki ra bala na bakut upi na maravut u, Ma ta kana minamar ta ra ul a bakut.

²⁷God tukum ia ra kubam, Ma da bokaboko ta ra limana pa i mutu; I ga okole vue ra ebar kan ra luaina matam, Ma i ga biti: Una vamutue.

²⁸Ma Israel i kiki bulu, A vunapai Iakob kaka i ki, Ta ra gunan na kon, ma ta ra gunan na vain; Maia pa, kana bala na bakut i vatua ra mavoko.

²⁹U Israel, u ti doan; la mulai amur varogop me, a tarai a Luluai i tar valaun ia, A bakbakit na maramaravut piram, Ma kaum pakat na vinarubu na niuvia! Kaum lavur ebar diat a va dudur pa u; Ma una ruarua taun kadia lavur lualuana.