Dagalene 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Anduane Homogohanda Mosesehondo lamialu lalu,

²Kenana dindi Isaraele wali agali tihondo nguleberogo í̠ manda bide. Ani buleberogo áyu í̠na agali hameigini homberia (12) biaru aria bogabi mbira mbira dabalu Kenana dindi hondo wule pudaba labe, lene.

³Mosese ibugua Anduane Homogonaga bi layago hale halu Parana dindi ko iba dalu naibaga wiagoria howa agali haguane maruhondo, Kenana dindi hondo wule pudaba, lene. Agali o piyadaruni tinaga mini uru - Lubene aria Saguru igini Samua pialu Simiono aria Hori igini Sabada pialu Yuda aria Yabune igini Kalebe pialu Isaga aria Yosebe igini Igala pialu Eberaimi aria Nunu igini Hosia pialu Beniyamini aria Labu igini Palidi pialu Sebulunu aria Sodi igini Gadiele pialu Manase aria Susi igini Gadi pialu Dana aria Gemali igini Amiele pialu Ase aria Migaele igini Seduru pialu Nabadali aria Bobisi igini Nabi pialu Gada aria Magi igini Guele pialu bini.

¹⁶Agali uruni tigua pialu Mosese ibugua Kenana dindi bibahendeha hondo wima ibaga bialu dai bule pudaba laya handala ti pene. Ani bialu Mosese ibugua Nunu igini Hosianaga mini wia aribia halu ibu mini Yosua wini.

¹⁷Mosese ibugua agali uruni pelonaga ibugua tihondo lamialu lalu, Tígua uyuraha pialu dindi emene mbira Negebe ngago anda pialu yu wahalu hari barebare ngagoha iraga halu pilimu.

¹⁸Pialu dindi ogoni agi ale ngabe handaiore halimu. Ani handalu dindi ogoniha wali agali agira kabe handalu ti hongohedabe nahedabe handaiore halimu.

¹⁹Dindi bayaledabe be kodabe handalu wali agali ti tano pabe hongohe bu mabubiha kabe be tano pabe nabi bame winiha kabe handalimu.

²⁰Ani handalu dindi ogoni ibane bere tomo anda habehe wialu uruniha irabu ngabe nawidabe handalu bilimu. Ani handalu kamiria dindi ogoniha ira lini dedaru maru do yalu dai bilimu. Mbira do ya nabiore dai bulamini, lene. Mosese ibugua bi laminidagoni pu mbira mini gerebi lini boga bulenengi howa maru ala deneru boga bialu heaore dege lene.

²¹Ani lamiya handala agali pudaba layaru tigua puwa Sini dindi ko iba dalu naibaga unurahayagi wiagoria howa ala handama pialu abene uyurahayagi Hamada tanoha anda polene harigani Lehobo tano wiagoria anda pene.

²²Ti puwa Negebe dindi ala anda pialu Heberono tano wiagoha pene. Dindi ogoniha henedaruni agali hameigini mini Anagimu laga agali timbuni luore bamba heneru aguanene Ahimanabi Sesaibi Talamaibi uruni hearia hendene. Heberono tano ogoni agali hameigini maru hearume bu helearia mani Iyibiha tigua Soana tano bu aribia howa mali karia ogoriani hene wini.

²³Agali haguane piyaru ti pialu dindi bayale ulini panda panda mbira mini Esegolo laga wiagoria anda pene. Dindi ogoniha gerebi lini dewaore do mbule timbuni mbira dearu do yini. Gerebi lini mbiraore ogoni agali mbiraoreli hangume yabe naheyagola agali kiralime iraho yalu dai bini. Ani bialu ira maru poge ale linibi pomegaranate linibi nendabu dewaore do yalu dai bini.

²⁴Mani Isaraele tigua dindi uluni panda panda ogoni mini Esegolo winigo irane agali haguane piyaru tigua gerebi ene mbiraoreme lini timbuni deneyago manda buwa lene.

²⁵Agali biaruni tigua dindi handama ibaga bialu heane horo pira maria (40) pene.

²⁶Ani peagola tigua Mosesebi Aronobi Isaraele wali agali bibahendebi Parana dindi ko Kadese biagoria hemiria dai bini. Tigua dindi biago ogobiya lalu te lamialu ira lini do yiniyaru walia hene.

²⁷Tigua Mosesehondo lamialu lalu, Dindi biago bibahende handama ibaga bialu howa handalu hemaria dindi ibane bere tomo mbirale anda hagaya. Dindi ogoriani ira lini dene o do yidamagoni handa.

²⁸Anigoyu wali agali dindi ogoriani hearuni hongohe gibioreya. Tinaga tano timbuni wiarubi ege pabe hongohe wa mabu biarubi diri nawi hongoheore hea. Ani bigi biagola gibiore handarimago agali luni timbu gibi mbira ala halu homeayaru aguanene ogoriani hearia handarima.

²⁹Amalegeali unurahayagi palea Hidialibi Yabusualibi Amoroalibi ede hombene hombeneha palea Kenanaliru iba solowara Medidereniana ange ange palea maru iba Yodana ange ange palea, lene.

³⁰Kalebehanda Mosese bereagoria ho mabu buwa hearu bi nale hadaba lowa lalu, Tígua gi dege dindi howa laramigoni agi laramibe. Ina hongohe karulape kamagoni wai bialu dindi ogoni mibehe kama, lene.

³¹Ani layagola agali maru Kalebe heba mandagi penayarume lalu, Iname wai bialu tinaga dindi nakarulabehe kama. Wali agali o handarimadaruni hongo gibiore ina baba nakarulape heane handarima, lene.

³²Ani lowa tigua ke̱ halu Isaraele wali agali mo gi howa bogo para halu tindule lama ibaga bialu howa lalu, Dindi ogoriani tomo dewa nawiya. Wali agali ogoriani hearuni tomo noa howa hangu hea. Wali agali handarimadaru bibahende lu daligani timbuni hangu heane handarima.

³³Agali lu timbuni damene Anage aguanene marubi ogoriani hea. Ti heago baba manda bialu hemaria ina dereparia ale bu hinaya. Tigua inabi anidagua hendeda holebira, lene.