Daahili Aloho 8

1

2

3

4

5

6

7

8

¹Au bolo goe gii hai hualaa tuaahina daane donu ni oogu, dela ne haga uu go dogu dinana gi ono uu. Maa nei bolo guu hai beelaa, dogu madagoaa ga heetugi adu gi di goe i hongo di ala gaa hongi goe, gei deai tangada ga haga balumee au gi di hai deenei ai.

²Au gaa lahi goe gi di hale o dogu dinana, gei goe ga aago au gi di hai o di aloho. Au ga gowadu gi di goe nia waini ala gu haga kala, mo nia waini o di laagau ‘pomegranate’ gi inumia.

³Doo lima dau ihala i lala dogu libogo, gei doo lima dau donu e haga daledale au.

⁴Nia ahina o Jerusalem, heia mai di godou hagababa bolo goodou hagalee haga deaadee di mau aloho.

⁵Ma goai dela e hanimoi mai di anggowaa, e kumi nau lima mo dono aloho ga loomoi laa? Di ahina Au ne hangahanga goe i lala di laagau aabele, i di gowaa dela ne haanau iei goe.

⁶Hai dia do manawa gi daha mo digau ala i golo, haga mahuge ina hua mai gi di au. Goe hudee kumi dangada gee gi lodo oo lima i daha mo au. Di aloho le e maaloo dangihi gadoo be di made. Di haingadaa o di aloho le e maaloo dangihi gadoo be di made. Ma e mee hua di daba e ulaula gaa wele gadoo be di ahi ga meheuheu.

⁷Nia wai e deemee di diinai di maa. Di labagee hogi e deemee di hagaholi di maa gii made. Gei di maa tangada gaa hai bolo ia e hui di aloho gi ono maluagina, go dono haga balumee go nia daangada la hua deelaa gaa kae koia.

⁸Gimaadou di madau duaahina ahina dulii i golo, nia uu o maa e lligi hua. Dehee di madau hai e hai gi mee maa tama daane ga hanimoi e dangi gi mee e lodo ginai?

⁹Dolomaa mee e hai be di abaaba, gei gimaadou gaa hau di angulaa silber ang gi mee. Ge dolomaa mee e hai be di bontai o di waahale, gei gimaadou ga duuli a mee gi nia laubaba laagau ‘cedar’.

¹⁰Au go di abaaba, gei ogu uu go nia angulaa o di maa. Dogu aloho le e iloo ia bolo di gowaa dela e gidee au dogu noho baba mo di aumaalia la dela i dono baahi.

¹¹Solomon dana hadagee waini i lodo di gowaa dela e hagaingoo bolo Baal Hamon. Digau hai hadagee i golo e hai hegau i di maa, malaa tangada e dahi e hui gii mee nia bahihadu silber e mana.

¹²Solomon la gi benebene ana bahihadu silber e mana, gei digau hai hadagee la gi benebene nadau silber e lua lau, deelaa di nadau duhongo. Gei au dagu hadagee waini donu i golo!

¹³Dogu aloho, au e hiihai e hagalongo gi doo lee e hanimoi i lodo di hadagee. Ogu ihoo e hiihai e hagalongo gi doo lee e leelee.

¹⁴Dogu aloho, hanimoi gi di au gadoo be di manu ‘gazelle’, gadoo be di manu ee daane ma ga hanimoi i hongo nia gonduu ala guu dogi gi nia laagau hagakala mee nonua.