Daahili Aloho 2

1

2

3

4

5

6

7

8

¹Au di akai lodo henua o Sharon, di akai o lodo di gowaa mehanga gonduu.

²Dogu aloho ma ga i baahi nia ahina, le e hai gadoo be taladala i baahi nia laagau duduia.

³Dogu aloho i mehanga nia daane ala i golo le e hai gadoo be di laagau aabele i mehanga nia laagau lodo geinga. Au e hiihai e nohonoho i lala dono malu, gei ono huwa e maangala i lodo dogu ngudu.

⁴Mee guu lahi au gi dono ruum hai hagamiami, gaa hudi tagallebe o di aloho gi ogu nua.

⁵Haga maaloo aga au gi nia golee ‘raisin’, ga haangai au gi nia aabele bolo gii hai ogu mahi, i di au gu bagege i lodo dogu aloho.

⁶Di lima dau ihala o maa i lala dogu libogo, di lima dau donu o maa e haga daledale au.

⁷Nia ahina o Jerusalem, heia di godou hagababa mai gi di au, doange mai gi di au i di ingoo o nia ee ala e llele huoloo mo nia manu ‘gazelle’ bolo goodou hagalee hagadeaadee di mau aloho.

⁸Au e longono di lee o dogu aloho. Mee e lele mai i tomo nia gonduu e hoiaa mai gi di au.

⁹Dogu aloho le e hai gadoo be di manu ‘gazelle’, gadoo be di ee daane digi madua. Mee e duu i baahi di abaaba e haganuunuu laa lodo di bontai dulii, e daumada laa lodo di ‘screen’ gi lodo di ruum.

¹⁰Dogu aloho e leelee mai gi di au. Taane Hanimoi laa, dogu aloho, hanimoi i ogu muli.

¹¹Di madagoaa magalillili la gu doo gi daha. Nia uwa gu hagalee doo.

¹²Nia akai gu moholoholo i lodo henua. Guu dae mai di madagoaa dadaahili: taahili o nia mwuroi la gu longono mai i nia gowaa maalama.

¹³Nia huwa ‘fig’ gu daamada gaa lleu. Di ahiaalangi guu kala i di hauiha akai o nia laagau waini. Hanimoi laa gi di au, dogu aloho, hanimoi i ogu muli.

¹⁴Goe e hai gadoo be di mwuroi dela e balabala hagammuni i lodo nia bongoo hadugalaa. Au e hiihai e mmada gi o hadumada humalia, ge e hagalongo gi doo lee humalia.

¹⁵Gumidia nia manu ‘fox’ lodo geinga ala lligi gi dee lloomoi e hunahuna tau hadagee waini dela e tomo.

¹⁶Dogu aloho la di mee ni aagu, gei au di mee ni mee. Mee e haangai ana siibi i mehanga nia daladala,

¹⁷gaa dae loo gi di angiangi magalillili o di luada ga iliili mai, gei di bouli ga ngudu mai ga hagalee. Hanimoi gi muli go dogu aloho gadoo be di manu ‘gazelle’, gadoo be tama ee daane i hongo nia gonduu Bether.