3Ighoe a nigua God, ko aroviu: tana bongi udolu tu kokoeliulivuti gatu itamua.
4Lord, ko neu ge ku togotogo: na volagu te tuturi tamua, ta nigua na kokoeliulivuti.
5Lord, ighoe to uto vahotua, to avehia na talukeha palu; itamua na dolo te taho ga na pego, vanira tara nongia na hahanga itamua.
6Lord, ko rongovia nigua na kokoeliulivuti, ko rongovighi nigua na lei tangi ni hahanga.
7Inau tu hologho tana bona ni gunaguna; mi ghoe to rongoviu mai so.
8Lord, e taho tua siki god te vaghagho, e taho tua hei ke gonia na hava to goni sokoa tua ighoe.
9Na lei kema ta puputura ighoe: kara mai kikinima vanigho, ma kara holohabaa na ahamu te tabu.
10Ighoe to sule, mo gonighi na lei butuli sule: ighoe heghemu vamua to God.
11Lord, ko taraiu nia na lei nilabumu, mu ku kabu taonia nimua na utuni! Ko heu mai na toba maghora, ge ku ghanaghana mavagho haia.
12Lord, nigua God, inau ku holohabagho nia na tobagu udolu tua, mu ku ladavaghinia na ahamu ke va me va.
13Nimua na dolo te sule ngangata vaniu: mo volau tana gilu ni mate.
14God, na vure talunagho tara hughutiu, mana ovu tara vahaghitailiu, tara tabotabo ge kara mateu, tara mua taonia na bosamu.
15Mi ghoe, Lord God, to veiarovi mo dolo to vadangitai haia mo utuni talau.
16Ko righiu mai mo ko aroviu, ko lagalagau mai, inau nimua na ghairau.
17Lord, ko tatea vaniu mai siki vauvautu ta nimua na dolo, ge gaira tara kanahaghiniu kara nia maa, to heu na togholuvu mo hangau.