3Luluai, una mari iau, Tago iau tangi tadav u a bungbung par.
4Una vagugu ra bala i kaum tultul, Tago, Luluai, a tulungeagu i nuknuk up u.
5Tago u a tena varmari, Luluai, ma u nur vue ra varpiam, Ma i peal kaum varmari tadav diat dia kail u.
6Luluai, una valongore kaugu niaring; Ma una torom ta kaugu lavur nilul vovo.
7Ta ra bung ba iau ki na malari tana ina kail u, Tago una ga torom tagu.
8Luluai, pa ta na mulai ta ra umana god ba amur varogop me; Ma pa ta papalum i da kaum lavur papalum.
9Luluai, a umana vuna tarai par u ga vaki diat diat a pot ma diat a lotu ta ra luaina matam; Ma diat a pite pa ra iangim.
10Tago u ngala kakit, ma u papait ra umana enana magit; U God kakika ma pa ta na mulai.
11Una tovo tar kaum nga tagu, Luluai; ina murmur kaum dovotina. Una vakopono ko ra nuknukigu upi ina ru ra iangim.
12Luluai kaugu God, ina pite pa u ma ra nuknukigu par, Ma ina pite pa ra iangim ma pa na mutu.
13Tago i ngala kaum varmari tadav iau, Ma u tar valangalanga ra tulungeagu kan ra ruarua na tulungen mara iat.
14God, diat i kolakolo ra nuknuk i diat dia tar tut ure iau, Ma a loko na tarai na vinarubu dia mainge ba diat a ubu iau, Ma pa dia nuknuk pa u.
15Ma u, Luluai, u a God na varmari, ma u a tena varmaram, U vavabing ma ra kankan, ma i peal kaum bala na varmari ma kaum dovotina.
16I boina ba una lingan tadav iau, ma una mari iau, Una tul tar ra dekdekim ta kaum tultul, Ma una valaun natu i kaum tultul, a vavina.
17Una tul tar ta vakilang na varmari tagu; Upi diat dia milikuane iau diat a gire ma diat a vavirvir, Tago u, Luluai, u tar maravut iau, ma u tar vamaram pa iau.