Buka Linge 58:1-11

¹Vania na tinoni te gehe linge: nina linge David. Linge taonira na hulu (tangi na linge) “ko bei haurake.” Dete maemane, Au ghilalaa sono na ghanaghana ilokana na kokoe ia eni, Ighau tau huhuli. E maemane sono nimua na dete bona to detera na lei tinoni?

²E taho, a nimua na lei samalaghi tara pegopego nia hevei horu na pepo me mua dete maemane

³Rana lei tinoni tangodika tara nia sivuragha kolu na palu vuivuni tana sivuraghadira tara lutua na sorisori mara tona taonighi na liodira heghedira

⁴Ara angasua na maomao te vagha na lei poli maomaogha ghugha Ara vaghara na lei torokoe tara mua liona na rongo bosa.

⁵Ara nia ponolio didira na lei huli na lei tinoni tara taluutunia na tidalo sorisori. Ivei ghua maana kara nia na gougonu taoniana didira na ghilala.

⁶Ko goat kehai na livodira, Ghe Lord! Mo ko labu marutai na ngongodira na lei bolo ghaghala raeni, Ghe Lord!

⁷Ge ma kara tovongo ponulu vaghara na beti te sosopi horua na pari te mamangaha mo ko nighi didira na lei totobo ni kisumate tana limadira ge kara totobo lee vamua.

⁸Ge ma kara vaghara na lei koivo tara soko buto tana nenepa. vagha na meomeo tara vahua te mua aleale kolili. Ke mua ghoi tangomana ge ke vaevanea na aho.

⁹God ke taghalaghini ke hara, agaira udolu rana vure vaolu mana vure haulaghi. mina vulea ga tala utuni tana ruruhu ni lake papara.

¹⁰Agaira tara holohabaa God kara nia togotogo na vahaghitailiadira tara mua dete maemane. Ma kara sani na tuadira tana ghabudira rana tangodika.

¹¹Mi tana sosokona na lei tinoni udolu kara bosa ma kara ghaghua. E Utuni sughua, na taba te gonidila vanira rahei tara vola vania God. E Utuni ngangata sughua na God ke detei maemane uto iani maramana te ghanaa sughua.