Ola Saam 58:1-11

¹Ol yumob boswan, yumob reken yumob kotim pipul raitwei? Yumob reken yumob gibit ebribodi feyago? Najing!

²Yumob oni jinggabat blanga dumbat nogudbala ting, en kilimbat pipul ebriweya langa dijan kantri.

³Nogudwan pipul oldei dum nogudbala ting olataim. Brom det taim wen deibin bon, dei oldei dalimbat laiya.

⁴Olabat jidan wulijim sneik garram detmatj nogudwan poisin. Olabat jadimap miselp irriwol jis laik det defwan kobra sneik.

⁵Im nomo lisin det myusik wen det men plei, o det klebawan men wen im singimbat.

⁶God, dislot pipul wulijim detlot jigiwan laiyan. Breigimap ola tuth blanga olabat.

⁷Larram olabat jis binijap wulijim woda weya im draiyap. Larram olabat jidan wulijim fletwan gras weya fladwoda nokamdan.

⁸Larram olabat binijap wulijim det wem weya im draiyap. Larram olabat jidan wulijim beibi wen im bon dedwan.

⁹God, dumaji yu wail langa olabat, wal yu binijimap olabat bifo dei sabi, jis laik weya sambodi kadimdan rabishwan gras.

¹⁰Ola pipul hu jidan trubalawei garra jidan gudbinji wen dei luk ola nogudbala pipul git panish. Olabat garra luk detmatj blad buldan blanga detlot nogudbala pipul.

¹¹Ola pipul garra tok, “Trubala orait. Gudbala ting garra kaman langa detlot pipul hu jidan trubalawei. Trubala God im jidan boswan en im gibit feyago langa ebri kantri.”