Buka Linge 35:11-25

¹¹Ra hei tara huru kikou tara tughuru dato: ra pilighi mai vuvungagu na lei totobo inau tu mua pukui.

¹²Ra pelu olia nia na dika na hava te uto tu gonia: me gunalia na tobagu.

¹³Mi tana bona tara vahaghi ke: Inau tu nira tangi, mu nira talukau, mu kokoeliulivutira so ma nigua na kokoeliulivuti te oli mai vamua itagua.

¹⁴Mi nau tu dika lio: vaghau tu nira dika lio na hoghogu pa sakai ta nigua na binaboli, mu ulu horu, vagha siki sakai te tangihia tinana te mate.

¹⁵Mi taeni tara togo na pukuna tu ghanau tana vahola ra savukoluu na lei tinoni mana vure keha tu mua ghilalara tara ghaeghahe mara mua beto na ghahelaghiniagu.

¹⁶Na lei tinoni tara mua nia kikinima God tara lavi mamaagu mara girigirighi vaniu nia na livodira.

¹⁷vei vaho ke vagha eni Lord ge ko soni vaghini matamu mai: Ko righitaoniu tadira tara goni dila ni kanahaghi niagu. Mana volagu tu dolovia tadira na bolo ghaghala.

¹⁸Ku holoutogho inaghodira na vaukolu ni mavitu mu ku holohabagho tana ovu ni vure subo.

¹⁹Ko bei lubatira ghagua na levunimate ge kara laga vuleu nia na kiko; ma rahei tara kanahaghiniu kara bei batobatou gea.

²⁰Ra mua nia kokoe na mabo: Ra kisu ghadira mate mara mamimamira nia na sori ara hei tara kabu tana komu.

²¹Ra vukesia na mangadira mara ghaghua, “Aha! Tai righia nia na matamami te gonia.”

²²O righia tua eni ke Lord: ko bei todore gea mo ko bei sagauviu gea ghua ighoe nigua na Lord.

²³Ko rarai mai; mo ko detedetea nigua hahi, ko lavi tughu ta nigua na hahi, Ighoe nigua na God mana Lord.

²⁴Ko talutatea tu mua hahi Lord nigua na God: Ko bei lubatira ghagua na levunimate ge kara kia haghiniu nia nigua na hahi.

²⁵Ko bei taladia gea ge kara bosaa tana tobadia, “Righia a lavia tua na hava ta liona tatana. Mai ma ka sonomi na volaa tana kutuda.”