Buk Song 35:11-25

¹¹Ol man bilong giaman i sutim tok long mi long sampela pasin nogut mi no bin mekim.

¹²Mi save mekim gutpela pasin long ol, na ol i bekim pasin nogut long mi. Olsem na bel bilong mi i hevi tru.

¹³Tasol mi no mekim olsem long ol. Nogat tru. Taim ol i gat sik mi sori nogut tru, na mi pasim laplap bilong sori. Mi tambu long kaikai na dispela i givim hevi long mi yet. Na mi beten bai yu ken helpim ol.

¹⁴I olsem mi bel hevi long pren na brata bilong mi. Mi wokabaut olsem man i sori na i krai long mama i bin dai. Mi bel hevi tru na mi krai na sori i stap.

¹⁵Tasol taim mi painim hevi, ol i bung na amamas. Ol i bung bilong daunim mi. Sampela man mi no save long ol, ol i no malolo long sutim tok nogut long mi.

¹⁶Ol i tok bilas moa yet na givim hevi long mi. Ol i no laikim mi na ol i pes strong long mi.

¹⁷Bikpela, hamas taim moa bai yu larim ol? Yu mas kisim bek mi na ol i no ken bagarapim mi. Ol i olsem laion i laik kilim mi, olsem na yu mas kisim bek mi long han bilong ol.

¹⁸Sapos yu mekim olsem, bai mi tenkyu long yu namel long planti lain manmeri i bung wantaim. Tru tumas, bai mi litimapim nem bilong yu namel long bikpela lain manmeri.

¹⁹Sampela man i birua nating long mi. Nogut yu larim ol i amamas long daunim mi. Ol i bel nogut nating long mi, olsem na yu no ken larim ol i amamas long ol hevi bilong mi.

²⁰Ol i no save toktok liklik long sindaun gut wantaim ol arapela man. Ol i tok long bagarapim ol man i sindaun gut long ples. Ol i save kibung bilong giamanim ol gutpela man na bagarapim ol.

²¹Ol i save bikmaus na sutim tok long mi olsem, “Tru tumas, mipela i lukim yu i mekim ol pasin nogut.”

²²Tasol Bikpela, yu lukim pinis ol dispela man. Olsem na nogut yu pasim maus i stap. Bikpela, yu no ken i stap longwe long mi.

²³Yu God na Bikpela bilong mi, yu kirap na kam helpim mi. Sanap na tokaut bilong strongim tok bilong mi.

²⁴God, Bikpela bilong mi, yu save mekim stretpela pasin. Yu helpim mi na bai ol birua i save olsem mi bihainim stretpela pasin. Yu no ken larim ol i amamas long lukim mi i bagarap.

²⁵Yu no ken larim ol i toktok long ol yet olsem, “Gutpela tumas! Samting yumi laik mekim, nau yumi mekim pinis.” Yu no ken larim ol i tok olsem, “Yumi bagarapim em pinis.”