Atos 8:12-40

¹²Yrome Firipe tõturuse eya xine Ritonõpo kuesẽkõme exiry poko. Morarame zae aomiry tonetupuhse toto a. Jezu Kyrixtu poetoryme toehse toto. Tõpurihkase roropa toto Jezu omi poe, orutua komo, nohpo tomo, enara.

¹³Morarame Ximão a roropa Jezu tonetupuhse. Morarame Firipe a tõpurihkase tahtao tõpurihkahpõ onurumekara toehse ynororo. Kurãkõkara kurãkary ropa tonese eya. Tõsenuruhkase ynororo pitiko rokẽ pyra.

¹⁴Morarame, “Samariapõkomo a Ritonõpo omiry tapoise mana,” kary totase Jezu poetory tomo a, Jerusarẽpõkomo a. Naeroro asakoro orutua tonyohse toto morotõkomo a, Peturu, João, enara tonyohse toto.

¹⁵Morarame Samaria pona tooehse tahtao xine tõturuse toto Ritonõpo a, —Ouzenu ekaroko moxiamo a õmiry apoihpõkomo a, tykase toto Ritonõpo a,

¹⁶Tuzenu onekaropyra ro Ritonõpo exiryke toto a, nakuaka rokẽ tõpurihkase toto Jezu omi poe.

¹⁷Morarame tomarykõ tyrise ahtao eya xine morotõkõ zuhpokoxi, Tuzenu tokarose Ritonõpo a eya xine rahkene.

¹⁸Morarame moro eneryke tyya tytinerũ ekarory se Ximão toehse Peturu tomo a, toto sã Ritonõpo zuzenu ekaroneme toehtohme repe.

¹⁹Ynara tykase ynororo eya xine, —Ritonõpo zuzenu ekaroneme kyritoko, imehnõ zuhpokoxi jemary riryhtao ya moxiã aka Ritonõpo zuzenu omõtohme, tykase ynororo Peturu tomo a.

²⁰Yrome Peturu a tozuhse ynororo. Ynara tykase ynororo, —Ritonõpo oenyohsasaka mana apotoimo htaka otinerũ maro, inekarohpyry epekatyry se oexiryke tineru poko.

²¹Oesary kara sero taro, tykase Peturu eya. —Ritonõpo omipona pyra oexiryke ipoetoryme pyra mase.

²²Iirypyryme mase okurohtao Ritonõpo a. Moro oorypyry irumekako! Ekorokapoko Ritonõpo a. Otarãme oorypyry korokãko ropa mana, tykase ynororo eya.

²³—Iirypyryme oexiry waro ase. Itũ sã okurohtao mana zumoxike oexiryke. Tymyhse sã roropa mase oorypyry a, tykase Peturu, Ximão tyenonohse.

²⁴Mame ynara tykase Ximão eya xine, —Ajohpãme sã kaxitoko amarokõ ypoko. Oturutoko Ritonõpo a kure rokẽ jehtohme, juãnohpyra Ritonõpo ehtohme, tykase ynororo Peturu tomo a.

²⁵Morarame imehnõ tamorepase Peturu tomo a João maro Ritonõpo omiry poko. Kure rokẽ turuse toto Jezu poko. Morarame axĩ pyra toytose ropa toto imehnõ amoreparyme pata tõ poro, tosaka xine, Jerusarẽ pona.

²⁶Morarame Ritonõpo nenyokyhpyry kapu ae tõturuse Firipe a, —Ytokose osemae Jerusarẽ esema taka, eporehkakety ae oytotohme ona pona, Kaza pona.

²⁷Mame Firipe toytose moro ae. Moroto orutua tonese eya Etiopiapono. Mokyro Kãtase mõkomory esẽ kynexine. Kãtase Etiopiapõkõ esẽ kynexine. Mokyro ipoetory ytõko ropa kynexine Jerusarẽ poe Ritonõpo omiry poko tãtamorepaxĩpo. Ritonõpo omipona toehtohme toytose ynororo Jerusarẽ pona.

²⁸Morarame Ritonõpo omiry sekeremaryme ytõko ropa kynexine kahosa ae, Izaja nymerohpyry sekeremaryme.

²⁹Morarame Firipe taropose Ritonõpo zuzenu a, —Kahosa aka ytoko mose maro oytotohme, tykase ynororo eya.

³⁰Tururume toytose Firipe kahosa aka. Morarame Izaja nymerohpyry sekeremary totase eya. —Onysekeremary enetupuhnõko hma? tykase ynororo Etiopiapono a.

³¹—Arypyra, onenetupuhpyra reahse. Tamorepane ke jahtao enetuputyry. Otyriko. Ymaro eropa, tykase ynororo Firipe a.

³²Ynara Ritonõpo omiry sekeremãko kynexine, “Mokyro tarose kaneru samo, etapatohme. Kaneru mũkuru tuhpoty sahkaryhtao oty kara. Mokyro sã oty kara toehse ynororo tyyryhmaryhtao.

³³Mokyro tutuarimanohpose toto a. Pohnomo a tyhtomase. Tumũkue pyra ro ahtao taorihmapose eya xine,” tykase, tysekeremase Firipe ytotozõpyry a.

³⁴Morarame Etiopiapõ tõturupose Firipe a, —Onoky poko Izaja nymerohpyry sero? Typoko, imepỹ poko? tykase ynororo Firipe a.

³⁵Mame Firipe tõturuse imaro Ritonõpo omiry poko, inysekeremahpyry poko. Kure turuse eya Jezu poko.

³⁶Morarame toytorykohtao tuna pona toeporehkase toto. —Tunahxo mony. Jẽpurihkary se pyra hma? tykase mokyro Etiopiapõ Firipe a.

³⁷—Arypyra, Jezu enetuputyryhtao oya oesẽme oẽpurihkãko ase, tykase Firipe eya. —Ỹ, Jezu Kyrixtu enetupuhnõko ase, Ritonõpo mũkuru nymyry mokyro, jesemy, tykase ynororo Firipe a.

³⁸Mame kahosa totypohkapose eya. Toytose toto nakuaka, Firipe maro. Mokyro Etiopiapõ tõpurihkase eya Jezu omi poe.

³⁹Morarame towõse ropa nakuae toto ahtao, Firipe tarose ropa Ritonõpo zuzenu a. Onenepyra ropa toehse Etiopiapono. Mame toytoryme ropa tãtãkyemase ynororo.

⁴⁰Morarame Firipe tonese ropa imehnomo a rokene, Azotu po ahtao. Mame imeimepỹ pata tõ poro toytoryhtao Ritonõpo omiry poko tõturuse ynororo morotõkõ netaryme, Sezarea pona toytoryme.