Sinik Abem 8:12-40

¹²Kata Filiw aka Got kasák gu so Yesus Kadais win so imi sung kidel uyo wanang kinim bakaya badane ika kidi afan kaliwe, wok ban boyamsa.

¹³Kale usong kinim Saimon akal alaso afano kale nadanade wok ban bosa. Ade aka Filiw yakeina Saimon akal alaso kuw ká bom nadane Filiw ami mudi mudín kukuw so dubat dubatin kukuw so kidel badano, Saimon akal kin antam dá kol beso kuwo kalsa.

¹⁴Kale weng dew kámin kinim Yedusalem bidiw ikal kidilomo. “Samediya kayak ika Got weng kudubiwo.” Kaliw ka. Kale nadiwe kinim alew Bita so Yon so iyo imadáliw Samediya kayak itamsiw.

¹⁵Kale alew ika tad itam nadiwe Got dákadálaw yak Got afan kalin ika Sinik Abem kuyamalo! Kale Got weng bakadawsiw.

¹⁶Be watawo kaleyo bá, ika Yesus win tudow dim wok ban bomin bude bosiw, kata Sinik Abem ata kudongin banim kayo ko.

¹⁷Beta Bita so Yon so iyo ilim sikal kudew yak kinim wanang im dim dawti Got gán dádiwe, Sinik Abem ayo tad kiwa imudane,

¹⁸Saimon aka weng dew kámin alew ika itamomo alew im sikal uyo kudew tam kinim im gebom dim dawtidiw Sinik Abem ayo tad kiwa imuda ka. Kale nadane Saimon am aket moni mak kudew tad kuyam nadino alokso kukuw bo modono. Kale tad kuyam nadane

¹⁹weng bakoyam, “alew kiba, kitid kunamiwo, nakal nalaso sikal kudew tam wanang kinim gebom dim dawtiyam bidino Sinik Abem ayo tad kinim kiwa imkanako!” Yakane,

²⁰Bita weng atung fakadu bakodaw, “bá be, kaba kalawso kalam moni so alew alew yak as kainin abiw unumo kalbáwe! Watawo kaleyo bá, kam aket fukanin Got min gelemin tadebu uyo moni tuw modono kalbaw kayo ka.

²¹Kaba kawso maek tadaw kanodin wok bula faku kudew taboduw bá. Watawo kaleyo bá, kam aket kaok uyo Got ami kin dim uyo ken bá, kayo kala.

²²Kaleyo kaba kukuw mafak keimin uyo ibik dumam kudá falmek Got atam gánlawawo, aka kam kanodin aket mafak fukanin uyo lukuwá kudákamako.

²³Naka kaba katamomo kalam aket tem uyo aket titiyamin aket keng uta weinsu ka. Kali kale kaba atin ban keimin ta bom sok gei kamusu.” Akane,

²⁴beta usong kinim Saimon ayo weng atung fakadu bakodaw, “kinim alew kiwta, Got dákadálawiw dakonamano mew kanamin weng bakanábiw uyo kanonamomu banim keiduko.” Yakeisa.

²⁵Kale weng dew kámin kinim Bita so Yon so alew iyo kukuw kanoyamu utam suduwo kalin weng so Got weng so uyo bakayam si nadiwe alew ilim yán tem fasiki Yedusalem unsiw. Kata alew leiw ei bom nadiwe Samediya abiw abiw Got weng kukayam tam tam unsiw ko.

²⁶Kale Kamok ami ensel mak Filiw bakodaw, “kaba ufek ufek bai dew nadawe duwo wok kakamo be kalomo leiw mak Yedusalem kalo tade Gása abiw unemin, be anang iwán sed gisa bakan leiw. Kale bekal leiw Gása unalo!” Aka nade

²⁷afan matam abe una ko. Leiw unom nadale Itiyobiya kinim mak atam aka Itiyobiya ilim kamok wanang um win Kandas umi ufek ufek so kisol so kin moyámin kinim dukum. Kale aka Yu kayak bá, kata aka tade tam Yedusalem kal Got suksuk unbano,

²⁸tade alam abiw unono. Kale abin gidi gidi kudew kámin dim tein tad bom nadane lum senin kinim Aiseya buk godusa uta kím tadba.

²⁹Kale Got Sinik Abem ayo Filiw bakodaw, “kaba, baw yak abin gidi gidi kudew kámin mewso falemam unalo!” Akane,

³⁰beta Filiw ayo biyaku yak abin gidi gidi kudew kámin mew falemam unom nadane kidilomo kinim aka lum senin kinim Aiseya buk godusa beta kím tadba ka kale nadale bakodaw, “kinim kaba, buk kíbaw umi mit buwok bo kalam kal bade bá?” Akane,

³¹kinim asik Filiw bakodaw, “naka yakno yakno nadino be kal keidokabi, á bede kinim mak tad mit dákafi kukunamano kuwo.” Akei nadane beta Filiw bakodaw, matam tadalo!” Akane, aka tudum daung tam una alew unsiw.

³²Kale kinim ami buk tem weng kím mada kím tadba uyo bako kalesu. “Aka siwsiw gi dau alumo kalin taw kei dew uniw ade siwsiw man sissis tuw kalim bitada bidiw weng sading kalin taw kei am weng sading kale bon tem takodin banim keisa.

³³Kale ika am win dukum uyo kuwádaw nadiwe, kot kidela keimongin banim keidawsiw. Ade kan ata mak matam be am kinim mit sung uyo bakayamongin banim keisiw. Be watawo kaleyo bá, am bakan kadák biyámin uyo wabading kukan keidaw sidiw kayo.” Kalesa.

³⁴Kale Itiyobiya kinim ayo Filiw dákadálaw, “kuin bakonamo! Be kan lum senin kinim sung uta bakanbuna? Aiseya lum sung bade kinim kukum imi sung uta kalesana?” Kala nade

³⁵beta Filiw ayo weng kím buk tem bakosu be kal tei bakadaw una ki adikum Yesus ami sung kidel uyo adik bakodawsa.

³⁶Alew leiw tadom nadiwade tad wok kumun mak utam nadiwe Itiyobiya kinim ayo Filiw bakodaw, “kalak fen bula wok ka! Kadákal wok ban bonamalo, alo utakun uta leiw atinama bune?” Aka nade

³⁷Filiw bakodaw, “Kaba adikum kalam aket so atin afan kalolaw, bede ken wok ban bokamomi ka.” Aka nade Itiyobiya kinim ayo Filiw bakodaw, “au, naka afan kale, Yesus Kadais be Got ami Man. Kali kate!” Aka nade

³⁸Kinim ayo gidgid kudew kámin abin kin modin kinim ayo bakodawa, abin kutidane, beta alew dák nadiwe Filiw ayo Kamok kisol kin modin kinim wok ban bodawa.

³⁹Alew ika wok bá kudá matam ta sidiwo, Got ami Sinik Abem ta bom Filiw ayo dew unane, Itiyobiya kinim aka utamomo, Filiw aka banima ka kale aka asiki atamongin banim, kata aka alam leiw ei bom kalfal kalfal unane,

⁴⁰Filiw atane tad Asotas kal misuna nadano sung kidel sung uyo bakayam abiw dukum dukum so abiw katiw katiw so tam tam tad bi tad Sesadiya tasa kala.