Mantá Tanla 8:12-40

¹²Junni Simón tsantin chusanan, Felipe Jesucrístoca cuenta quebi janue. Diosi ya mantananun tsachi bolon suwananuncanan micarinaminue. Junni duque tsachila, unilala, sonala, Felipe cuenta quinaminca quereito mumunhilainue.

¹³Junsi Simonnan quereito mumunhito, Felípebe penenaminue. Felipe mantimini duque wepanato quirantsancari seque quinaminue yape tsachila Diosica tenca calaquisa. Junni Simonni junca quirato duque wepananue.

¹⁴Junnasa mantimini Crístochi mantá tanlari Jerusalenbi chuto meralaquinue Samaria tobi chuminlanan Diosichi fiquica seque meralaquinueque. Junca meráto, Pédrobe Juánbeca junchi erelaquinue.

¹⁵Junni Pédrobe Juanbe Samáriaca patito, Jesucrístobe penenaminlachi tenchi Diosibe rocailainue. Diosibe rocaito, nuchi Tencaca inlachibi erede! tilatinue yape yalachibi wito chusa.

¹⁶Aman Diosichi Tenca yalachibi cawica itominue. Jesuchi icayoe titori mumunhica jominlanue.

¹⁷Junnan Pédrobe Juanbe Jesuchi tsachilaca tedechi tale quilaquinue. Junni tsanquinan Diosichi Tenca yalachibi winue.

¹⁸Aman Simonni junca jera quirato miito, aman Crístochi mantá tanlabe itsantinue:

¹⁹—Lachinan tsanque mantá cuwade! tinue yape lanan mocatiya tedechi tale quinan Diosichi Tenca ya tsachichibi wisa. La cala cuwanae tinue.

²⁰Pedro mantimini ya Simonbe beconan manpato, itsantinue: —Nu nuchi calabe yucapiyade! tinue. Diosi epe cuwanacaca calachi cantsan joeque tenca canun tenchi padeseichunae tinue.

²¹Nuri natiya Diosichi tenchi titiya pequimin itoe tinue. Nu Diosibe seque nenatumin joe; epele tenca cato nenamin joe.

²²Junni in jutsaca telaquepoto, casan tala tenca mancade! tinue. Junsi Diosibe rocaide! Pansile seitonque tenca cananunca perdonaichunae tinue.

²³La nuca mirayoe tinue. Nuri fe mantá tachi tito, nuchi tenca duque seiton joe. Nuchi tenca jutsabe cadenachi telepoca jun cuwenta joe tinue.

²⁴Pedro tsantinunsi, Simón beconan pato itsantinue: —Pedro, nulanan lachi tenchi Miya Diosibe rocailaide! tinue yape laca tsanque padeseisa caritusa.

²⁵Junni Pédrobe Juanbe Miya Jesucrístoca jera cuenta quetobi, Jerusalenca manjilainue Samaria tose poleto. Duque pueblobi wide wide jito, Jesucrístoca paca sen fiquica cuenta quedede manjilainue.

²⁶Junni Miya Diosichi anjeli Felípebe itsantinue: —Wiruito jide! tinue. Nuri butunni tala jito, Gaza tinun puebloca jinun minuca jide! tinue. Aman Gázaca jinun minuri niyanlanantiya chutunun postose polenun minu jominue. Jerusalenbi nechi Gaza fecári jinunhe.

²⁷Junni Felipe anjelichi fiquica merasi, wiruito jiniinue. Junni ya minuse jinasa quiranari, Etiopía tsachi jinaminue. Etiopía to miya sona Candace mumun jominue. Junni ya tsachiri Candácechi tenchi tesorero jominue eunuco tinun tsachi. Yari Jerusalén puebloca Diosibe rocaibi jica joto

²⁸manjinaminue. Calu muricanun carobi chudito, Diosichi Pilaca quiradede manjinaminue. Aman matu to tsachi Isaías mumun Diosichi mantate pila chuteca jominue. Junni Etiopía tsachi ya pilaca quiradede manjinaminue.

²⁹Tsan josanan, Diosichi Tencari Felípebe itsantinue: —Ja carobe parejo parejo jinade! tinue.

³⁰Junni Felipe caroca sujito, Etiopía tsachica Diosichi Pila quiranaminca meránue. Isaías Diosichi fiqui chutecaca quiranaminue. Junni Felipe itsantinue: —¿Jun pilabi niyan tinan? ¿Entendeinayun? tinue.

³¹Junni Etiopía tsachi itsantinue: —Monantiya micaritunari, miitiyoe tinue. Tsantisi, nuri lade! Lato chudide! tinue.

³²Aman Isaías chuteca jun pilabi itsanque chuteca jominue: Opisaca cuwenta totebi tanjichunae tinue. Jana opisa náca fu porecanasanan, atituto tsoniramanhe tinue. Junni yari jun tsanquenan beco patuchunae tinue.

³³Yaca lucarito seitonque quilaquichunae tinue. Yaca totelaquichunae tinue. Yabe parejo pesonnaminlari patuntsancari seiton jolajochunae tinue.

³⁴Junni Etiopía tsachi ya pilaca quirato, itsanque panhanue: —Nu pade! tinue. ¿Mo tsanque padeseino jun? tinue. ¿Isaías patsa, o uyan? tinue.

³⁵Junni Felipe yabe tulanto cuenta quito, Jesuca paca joe tinue. Ya tsanque padeseica joe tinue. Junni Felíperi casale Isaías chutecaca cuenta quito, junsi Jesuca paca sen fiquica jera cuenta quinue.

³⁶Junni minuse jinaminnan, pi quelole polelainue. Junni Etiopía tsachiri itsantinue: —Quirade! Ina pi poe tinue. ¿Lari mumunhino podeino joinhin? tinue.

³⁷Junni Felíperi itsantinue: —Nuchi tencabi Jesucrístobe jera cayaitori podeichunae tinue. Junni Etiopía tsachiri manpato, Jesucristo Diosichi Nao joeque quereiyoe tinue.

³⁸Tsantisi, caroca tsoresa carito, Felípebe Etiopía tsachibe pibi patilainue. Pibi wito, Felipe yaca mumunnue.

³⁹Junni pibi nechi manlonaminnan, Felipe piyapoleniinue. Miya Diosichi Tenca yaca piyapolarinan, Etiopía tsachi Felípeca manquiratunue. Etiopía tsachi mantimini son tide manjito polenue.

⁴⁰Junni Felíperi Azoto pueblobi manquirainue. Junsi Azótobi nechi Cesarea puebloca jinue. Junni Cesaréaca jinato, pueblo cura Jesucrístoca paca sen fiquica micaridede jinue.