Hechos de los Apóstoles 8:12-40

¹²Ie mei Felipe Cristo ie mare rafuena llote. Naimɨe anamo naimacɨ illana Jusiñamui jitailla jira, Jusiñamui dɨbeimo naimacɨ comecɨaɨ iuaina meiduana llote. Naimacɨ Felipe llofuiana ɨɨnotɨmacɨ. Ɨɨnuamona, Felipe naimacɨna bautizade. Ɨiñɨaɨna bautizade. Rɨñonɨaɨna jɨaɨ bautizade.

¹³—Jɨaɨ ɨɨnotɨcue —Simóndɨ raite. Naimɨe bautizaja mei, Felipe dɨga jaioicaide. Felipedɨ dɨga siño rafuena fɨnua jira, Simón naiena cɨuano, raijicaide.

¹⁴Jerusalémo ite Cristo oretaganodɨ, Samaria comɨnɨ Jusiñamui uaina feiñuana cacajano, Pedro, iaɨmaiaɨ Juan dɨga, batɨne oredɨmacɨ.

¹⁵Iaɨmaiaɨ rillano, naimacɨ Jusiñamui Joreñona feiñollena Jusiñamuimo jɨɨdɨaɨmaiaɨ,

¹⁶naimacɨmo Jusiñamui Joreño nia iñena jira. Caɨ Nama Jesús facaina jai bautizadɨmacɨ; ia Jusiñamui Joreñona nia feiñoñedɨmacɨ.

¹⁷Ieconi iaɨmaiaɨ onollɨ naimacɨmo joniano, Jusiñamui Joreñona feiñotɨmacɨ.

¹⁸Naimacɨ Jusiñamui Joreño feiñuana Simóndɨ cɨuano, ucubena iaɨmaiaɨmo fecaacade.

¹⁹Raite: —Cuemo omɨco uaina ine, bumo cue onollɨna cue joniamona, naimɨe Jusiñamui Joreñona feiñollena.

²⁰Pedro dɨnena uai ote: —O ucube dɨga o faɨfisa. Ucube dɨga Jusiñamui fecaca uaina ɨbaacadɨo; iadedɨ Jusiñamui naiena jamai fecade.

²¹Bie rafuedɨ omo duiñede. Jusiñamuimona o comecɨ nia maraiñede.

²²O comecɨ iuai meido. Naimɨe o comecɨmo ite maraiñede facajacɨnuaɨna oni dotallena, caɨ Namamo jɨca.

²³Omo ailluena maraiñedɨcɨno illana uiñotɨcue. O comecɨ eo uradoide. Maraiñedɨcɨnona o comecɨmo namaredɨo.

²⁴Simón uai ote: —O llua cuemo suiñellena, o Nama dɨga cue facaina ñaɨno.

²⁵Cristo rafuena iaɨmaiaɨ llua mei, Jerusalémo abɨdo bitɨiaɨmaiaɨ. Abɨdo billano, Samariamo dɨga comɨnɨ illanuaɨmo Jesús ie mare rafuena llocana bitɨiaɨmaiaɨ.

²⁶Naie facaise Jusiñamui jaɨenisaɨmona damɨe Felipemo llote: —Beicɨdo joide naɨdo mai jai. Jerusalémona Gazamo joide naɨsona jai —llote. Naie naɨso jofue iñenanodo joide.

²⁷Ie jira jaide. Jusiñamuina sedajamona, naie facaise Etiopía enɨrue imɨe Jerusalémona bite. Etiopía illaɨño dɨga maɨjɨuide. Naiñaiño mamecɨdɨ Candace. Naimɨedɨ nana naiñaiño gobierno ucubena sedade.

²⁸Naimɨe jai abɨdo jaillano, ie carretamo raɨta, Isaías mɨcorɨ cuega rabenicona ado facade.

²⁹Jusiñamui Joreño Felipemo llote: —Naimɨe dɨne iaɨrei jai. Carreta dɨne jai.

³⁰Naimɨe dɨne Felipedɨ aisɨcana jaillanona, rabe ado facajana cacade. Felipe dɨnena naimɨemo jɨcanote: —¿O facaca rabenicona uiñotɨo?

³¹Naimɨe uai ote: —¿Nɨese uiñoitɨcue, bu cuena canoñenia? Felipemo jɨcanote, naimɨe dɨga a jaillano danomo raɨllena.

³²Naimɨe facaca cuegafue iese raite: Toɨca llauda fallena uilla isoi, naimɨena uitɨmacɨ. Toɨca llauda itɨraɨ garedɨno dɨne eeñena isoi, naimɨe ñaɨñede. Ie abɨna rɨidollena, uaina oñede.

³³Maraiñede rafuena naimɨe fɨnoñede; ia naimɨena duere fɨnodɨmacɨ. Naimɨe uruiaɨ iñededɨ, ¿bu naimɨe rafuena lloite? Meinia meinoconi, naimɨe jai iñede.

³⁴Etiopía imɨe Felipemo jɨcanote: —¿Bie lloraɨma bu iena llote? ¿Dama naimɨe iena llote? ¿Jɨaɨmɨena iena llote? Cuemo llono.

³⁵Iemei Felipedɨ bie cuegafuiamona naimɨemo Jesús ie mare rafuena llote.

³⁶Naɨsona jaidɨiaɨmaiaɨmo, jɨnui illanomo ridɨiaɨmaiaɨ. Etiopía imɨe dɨnena raite: —Ero, bie jɨnui itemo, ¿bue ñe cuedɨ bautizañellɨcue?

³⁷Felipe uai ote: —O comecɨmona o ɨɨnoia, cuemona mare. Naimɨe uai ote: —Jesucristodɨ Jusiñamui Jitonana ɨɨnotɨcue.

³⁸Naimɨe ie carreta jorodate. Iemei jɨnui dɨne jaidɨiaɨmaiaɨ. Felipedɨ naimɨena bautizade.

³⁹Jɨnuimona iaɨmaiaɨ bia, Jusiñamui Joreño Felipena oni uite. Etiopía imɨe Felipena dane cɨoiñede; iadedɨ Etiopía imɨe iobicana jaide.

⁴⁰Jusiñamui Joreño Azotomo Felipena uite. Cesarea dɨne naimɨe jaillanona, naga naɨraɨaɨmo Jesús ie mare rafuena llocana uite. Ie mei Cesareamo ride.