Apostel 8:12-40

¹²Tanali Philippungu morlalu ngundranani, nulu Godaia mililandru ja Jesuni Christuni talandru kaukaubanani, tanali materali ja widlali multibanila manina wonti.

¹³Bakana Simon muntali morlalu ngundrana wonti, ja multibanila manina wonti, ja Philippungu jela ngamana wonti; ja nulu malka ja ngurula pirna pantjinani najina wonti, nau pirna ngaruparana wonti.

¹⁴Apostel worali Jerusalemani matja ngarana, Samarialali Godaia jaura patala wiri, tanali tanangu Petrus ja Johannes jinpana wonti.

¹⁵Pudla ngarina wonti, ja tanangundru ngatjina wonti, tanali Jaola kulikiri maninanto.

¹⁶Ngangau Nauja wata kulnuni tanangundru matja ngarina, a-ai, tanali windri Kaparaia Christuni tala multibanila manina wonti.

¹⁷Pudla tanangu mara kuraterina wonti, ja tanali Jaola kulikiri manina wonti.

¹⁸Simonali matja najina, Jaola kulikiri ngarina warai Apostelali mara kuranani, nulu pudlangu mardatandra padakana wonti

¹⁹Ja jatana wonti: “Bakana ngakangu ninapini ngurula jinkialumai, ngangau pratjanali, tanangu ngani mara kuraterinani, Jaola kulikiri maninanto.”

²⁰Petrus nunkangu jatana wonti: “Jidni ja jinkani mardatandra turuja wirinanto, ngangau jundru ngundrai Godaia poto mardatandrajeli manila.

²¹Jinkangu wata buru ja wata maratunka parai nunkangupini jaurani, ngangau jidni ngara wata talku ngai Godangu.

²²Nunkangupara jinkani tjikatjikandru karitjiau, ja Godangu ngatjiau, Nulia kara jinkanaia ngarai a ngundrani kalingananto.

²³Ngangau ngato najiai, jidni puratandraia kaldrini ja tjikatjikaia dupudupuni wirina warai.”

²⁴Simonali kalabana wonti ja jatana wonti: “Judla ngakangundru Kaparani ngatjialumai, ngangau panila nunkangundru ngakangu wokarananto, mina judla jatana warai.”

²⁵Pudla Kaparaia jaura matja tinkari ngankana ja kaukaubana, pudla Jerusalemia tikana wonti, ja pudlali ngantjani jaura kaukaubana wonti Samaritala ngura marapuni.

²⁶Kaparaia angelali Philippungu kaukaubana wonti ja jatana wonti: “Terkakamai, ja kunankaria wapau, nunkangupini paltuni, nau Jerusalemingundru Gazaia ngariai, nau wanka nganai,”

²⁷Ja nau terkakana wonti ja wapana wonti. Ja mai, materi kulno Aethiopiandru, nau eunucha ja Kandace Aethiopia mitaia kaparaia widlaia kana pirna kulno nganana wonti, nina nandru nankani poto pungani kurana wonti, nau Jerusalemingu wokarana wonti ngatjila;

²⁸Ja nau tikana kurana wonti, ja wilparani nunkanani ngamana wonti, ja Propheta Jesaias warapana wonti.

²⁹Jaola Philippungu jatana wonti: “Wapau, ja nunkangupini wilparani karakara mindrindiau.”

³⁰Philippus matja karakara mindrindina wonti, ja nina Prophata Jesaias warapanani ngarana wonti ja jatana wonti: “Jundru bakana ngujamai, mina jundru warapai?”

³¹Nau jatana wonti: “Worderu ngato ngujamananto, wata kulnujeli ngakangu ngujangujara jinkinani?” Ja nau Philippungu ngatjina wonti tarananto nunkangu jela ngamala.

³²Jaura witta, nina nulu warapanani, naupini nganana wonti: “Tanali ninaia tjipi jeribaka nari nandrala wapalkana wonti; ja Nauja ngapu nganana wonti tjipi kupara jeribaka nunkani njurdu wokaribanietjani, jeruja Nauja mana wata wilpariai.

³³Nunkani wakawakalani kalala nunkani mudana wonti; warle nunkani mardu kaukaubananto? Ngangau nunkani tepi mitandru matja manina.”

³⁴Eunuchali Philippungu kalabana wonti ja jatana wonti: “Ngani jinkangu ngatjiai, worangundru Propheta jenia jatai? Nunkangundru munta kara, kana ngurundru kara?”

³⁵Philippus mana wilparina wonti, ja nunkangupini jaurandru wonina wonti, ja nunkangu ngantjani jaura Jesungundru kaukaubana wonti.

³⁶Pudla paltuwirdi wapana, pudla ngapani wokarana wonti, ja eunucha jatana wonti: “Najiau, ninkida ngapa nganai! Minali ngandrawalkai, ngato multibanila maninanto?”

³⁷Philippus jatana wonti: “Jundru ngarali morlalu ngundranani, jenia pantjinanto.” Nulu kalabana wonti ja jatana wonti: “Ngato morlalu ngundrai Jesus Christus Godaia Ngatamura nganai.”

³⁸Ja nulu jirijiribana wonti wilpara banbananto, ja pudla ngapaia ngarina wonti, Philippus ja eunucha, ja nulu nina multibana wonti.

³⁹Pudla ngapandru matja dunkana tarana, Kaparaia Jaolali Philippus tjirimalkana wonti; ja eunuchali nina wata morla najina wonti; ja nau mankinali nunkani paltuni palkana wonti.

⁴⁰Tanali Philippus Asdod ngurani mankamankana wonti. Ja nau wirarina wonti, ja nulu ngantjani jaura kaukaubana wonti ngura pratjanani, nau Cäsarea wokaranantulu.