Aposol 21:7-22

⁷Motong la amkooi mulu a amyege Taia, ngan le la amsolo ye malala mai Tolemes. Ngan amla nango, ngan ampuske di diemam kapala yo titara lodi medana pang Yesu nga, motong la amwete lo ponana kiam pang di, inbe amye di amyepe ye ke atu.

⁸Le nga bongbongini ki, motong la amyege Tolemes, inbe amkooi mulu le la pombe ye malala mai Sisaria. Motong la amlo amyepe ye rumu ke Pilip. Ya in tool ke raingi bingi dook mata pang di tooltool. Ngan di tooltool limi be ru tina yo tipootoo di be tilon di aposol ke Yesu nga, ngan atu kidi la ya i.

⁹Inbe Pilip tani in di natunu garup nene pai ngan ke be tikaua Maro koonoo inbe tiwetewete betanga ki pang di tooltool.

¹⁰Le nga amye di amyepe le ke kapala iman a ila, motong la Maro koonoo atu yo ene Agabus i, in ipa ke Yudia a isi pang Sisaria nga.

¹¹Ngan Maro koonoo tani in isi le si pombe pang yam, motong la ikaua bittoongoo ye Paulu galini, inbe ya taunu ipau kene le baene ye, motong la iyei ne, “Maro Amunu Silene iwete nen, ‘Dada yo nookoot ayeii i, in di Yuda yo tiyepe Yerusalem ngo, ole tiyeii pang bittoongoo i taunu, le ole tipau kene le baene, lo ngan be titaru la di tooltool yo tipa ye rara kidi Yuda tiap nga, ngan baedi.’ ”

¹²Ngan yeisa be Maro koonoo tani in iwete nen a amlongo, motong la amye di tooltool ke malala mai tani in amwete tootoo pang Paulu a amlele be kin ilo pang Yerusalem be.

¹³Bong ngan Paulu tani in iraua betanga kiam nen, “Ai, nga yelei a katangtang a be kayei au a nen ngan lok modoko nga? Au tauk i araia lok be alo a lo titarau lo rumu dook tiap kidi talnga dikidiki lono leu tiap, bong be tiraumatau le amata ye Tool Mai Yesu ene nga, ngan dook mata lapau.”

¹⁴Paulu tani in iwete nen, le amkamata ben lon mede be ole ilo pang Yerusalem. Ngan nen le ke be amwetekala a ampalele mulu tiap. Bong amman le amyei ne, “Tool Mai ya taunu itoo lono ye soo so yo be iyeii i.”

¹⁵Le nga amyepe a ke kapala iman a ila, motong la amkarata so kiam a amlo pang Yerusalem.

¹⁶Ngan Yesu di galiunu yo ke Sisaria nga, ngan kapala tiyei emam a amye di amlo. Le nga tikau am a aye di amlo le lo titaram ye rumu ke Nason a amye amyepe. Ngan Nason tani in tool ke Saipras, inbe kulkulunu yege be bingi dook mata pombe pang ye di nga, ngan iportaka lono a iyei ben Yesu galiunu atu lapau.

¹⁷Ye kene yo ampa le lo pombe Yerusalem ye in nga, ngan di diemam kapala yo titara lodi medana pang Yesu nga, ngan lodi ponana yam le tikau am.

¹⁸Le nga lo amyepe a bongbongini ki, motong la amye Paulu amla be la ikamata Yemis. Ngan le di kuto maimai ke bareme ke Yesu nga, ngan di le imot timan pompombe ye kene tani in lapau.

¹⁹Ngan man tigaua, motong la Paulu iwete lo ponana ki pang di, inbe iwete nin so tina le imot yo Maro iyei a pompombe ye urata ki yo iyei kataunu ye di tooltool yo tipa ye rara kidi Yuda tiap nga.

²⁰Ngan yeisa be di kuto maimai tina ngan tilongo yo Paulu igasa nen nga, ngan le tiyitmaka Maro ene. Inbe tiwete pang Paulu nen, “Toomam, kumata di tooltool ke Yuda nga, ngan kinkatingi kidi alunu le alunu san la titara lodi medana lapau pang Yesu koot nga. Inbe di tooltool tina ngan di le imot tikodo le timede be titoo ger ke Maro.

²¹Bong ngan di tooltool kapala man tigasong pang di nen. Tiyei ne, ‘Paulu ni la ipatomonai di Yuda yo la tiyepe kataunu ye di tooltool yo tipa ye rara kidi Yuda tiap nga, ngan be tiwala muridi pang ger yo Maro ikap pang Mose nga. Inbe iwete pang di be kin tikoro di natudi tamoto ngan tinidi be, inbe kin titoo momo kapala yo kiidi Yuda nga, ngan lapau be.’

²²Le o tilongo betanga yo kuman koot, ngan oo, le nga ole tayei belei?