Aposel 21:7-22

⁷Kula nuyo abip Taya kulaa kela, sip tem yak aba din abip Tolemes aba Kristen iyo weng umuuya iso kawu, sulup sintam

⁸Tolemes kulaa kela, din abip Sisaria abalupla, sip kela daak abale, din Filip ami am din kawu atamup, nikil bom ale, ali God ami weng tambal bakayin tunum ale, Jerusalam kawu ulduulip dong dakaayin tunum kesip fetkal la, fet kaa ata kemin,

⁹kaami man unang atalingkal kiili, sii. La, yakal God ami profet o, kala weng ku-fatap-dakamin unang ke-silip.

¹⁰Kemin, nuli kawu am sin-sin-kelupya, God ami profet tunum ma Provins Judiya kametu kela tiltoop tala, ami win kaali Agabus.

¹¹Ayo numi fanang tal-ilomda, Pol ami ol tiil kaata, kuluu-lomda, almi sikil yaan ayo de-lomda bokola ko: God ami Sinik Tambal ayo bokop-na-lomda: Pol kapni Jerusalam unokomap kaali, Juda ita taba-lom nalmi sikil so, yaan so, deli alaltap kep-ta-lomdip, tam-baalip yak Rom kayaak imi sikil diim abam-nokomap o, kala Sinik ayo kanum bokop-na no, kala, Agabus ayo kanum bokolaya,

¹²nuli weng kabak weng sanduwa nusole, kaa ilin iso, nuli Pol ami dukum-kup bokola-lom: Kabi Jerusalam kamet-ali unemin daa, akupla,

¹³Pol kaa numi weng kaa maan tii bokoya-lomda: Kanimin o, kalaliwa, ibi ama-bamdip nami unon o, kalbi kaa, nam-tal-kaabip i? Nali Jerusalam met itami, ili kaali: Yesus ami win kufun-yaaba kala, naka-lomdip sok de-namulum o, kalip aye, nelip taanami no, kalbi kulaa yaap o, yakaya,

¹⁴kemin, nuli atamupla yi, Waka-tokoluwa, aket fal-sikilama disa kela kalalupla, kela bokola-lomdup: Kamokim Yesus ami aket fukunba namti, kuno tiltam tuluk o, akup ko.

¹⁵Sin-sin-keluwa, mafek mafek iyo dotu kutii, Jerusalam kamet banum o, kemuwale,

¹⁶abip Sisaria kaptam-ami Yesus daang bakaalin tunum malo ma numi im-tamalip met Jerusalam Nason ami am daalip, aso bulup. Kemin, ali Provins Saiprus kayaak; ali sawaalak kaptoowu Yesus ami daang bakasa.

¹⁷Kemin, Jerusalam Kristen yakal talaalipla, Pol inang iyo tilip kala kalalipla, fiyaap duu-lom weng umuuyip.

¹⁸Sindupya, Pol nikil nuyo din Yesus ami niing Jems ayo atamum o, kala din ulup, Jems ami am kaa Kristen imi kamok kamok alik iyo aso bom-bilip kala, kalale,

¹⁹Pol ayo imi weng umuuya, kula God ami weng kulii-din tunum miit kusnum imi bakayim-bala, God ata dok kanolin mafek mafek kukuyila-yaaba kaami sang kaata bakayila ko.

²⁰Kamok kamok iyo Pol ami weng ayo weng san-ilomdip, God ami fiyaap duu-bam, God ami tong kaata baka-bam, Pol ami bokola-lom: Nak-tum kapyo, kabi itamapla, Juda kayaak ili deng yaapkan yaapkan ili Yesus ami lak duu-silip kala kalap kemin, alik ili Moses ami Lo uta kutal-fukulum o, kala fiyaap duubip. Kemin,

²¹iip maakup maakup ili, kapni sang kaata, aptum kusal iyo kasen-fokop-ta-lomdip, Pol kaali, Juda kasel miit kusnum kiimi abip bom-bilip, imi kukuyim-bamda: Ibi Moses ami Lo kulaa-lomdip, kipni man imi ipnaal ayo bo-kukan-tiiya-yaamin daa; aa, Juda numi siin kukup kaata tabuu-yaamin daa yo, kal-bomda bakaba no, takan-kaabip.

²²Kemin, kii weng seliwa yi! Pol namti kulu tala taka-lomdip, aket atul uyo kup-tokomip kemin, kapso, nuso, nuli kalok kanolokomup i?