Aposotolo Adi Hewau 21:7-22

⁷Turo ai gerugabaei, abo aie duna Tolemai eai, tauawaabiena ai aitoiedi, asubena esega maedamaiyao aie mia.

⁸Mara‐ie‐tom ai abo ai geru ai lage Kaisarea: ai awasae Pilipo ena numa eai, ia ede wasa lolo tauguguiaina lahinae tatao haligigi‐labui wa esau ede ia; maedamai aie mia.

⁹Teina tau ta ia nanatunayao hasara hasi, nige se tawasora, isi hinage tau‐peroveta.

¹⁰Nei eai ai miamia e eawalana, peroveta esau esana ede Agabu, Iudea eai i dobima.

¹¹Ia i lagema arimai eai, Paulo ena turituri i iairihai, iabom nimana eo aena i auuioidi, abo i ene, “Earua Tabuna ie riba, ‘Turituri ta tanuagana abo Iudea tataodi Ierusalema eai se au, doha ede teina, abo hinage se moselaei Murimuri‐tataodi nimadi eai.’”

¹²Teina riba ta ai ataiedi, ai eo isi nei asa ne tataodi, ai riba nuahi, ai aibodai ai ene tabu i sae Ierusalema.

¹³Paulo mo ema riba i heuioiama i ene, “Au sahasaha au doudou ta, eo aruagu au lauheloi? Ea nonohao taba se augu taiede, taba Ierusalema eai se unuigu Guiau Iesu debana eai, hinage taiede.”

¹⁴Ema ribanuahi nige i ataiei, arinai ai riba lautom, ai ene, “Besi, Guiau iabom nuana i lauei.”

¹⁵Nei asubenadi ne se lautom ema gogo ai peigogo abo aie sae Ierusalema.

¹⁶Tauawaabiena headi Kaisarea tataodi maedamaiyao hinage aie lau, Nasona maedi hinage se woeai, ia Kuperu tauna, tauawaabi bagubagunana, ia bena maedamai ai mia.

¹⁷Aie lage Ierusalema eai, tauawaabiena se eogaisinimai, ma kodedi.

¹⁸Mara‐ie‐tom maedamai Paulo ai awasae Iamesi arinai; babada gamagaridi metai se bawagogo.

¹⁹Ia i lautoiedi, abo ginauri gamagamagari Eaubada i ginauridi Murimuri‐tataodi aridi eai, ena guguia debana eai, i heriba komakomanidi.

²⁰Isi riba wa se ataieyao, Guiau se hedebasaei, se ribalau ia arinai si ene, “Ema tau e, u itayao, Iudea tataodi moutuadi gamagamagari se ataiwatai; hinage nuadi se gigibori laugagaeo se abiwatai,

²¹eo gamagaridi wasam se ataiei, Iudea tataodi gamagaridi Murimuri eai se miamia, bena u heaheatadi Mose abo se nuagabaei, u ene nanatudiyao tabu se heperitomedi, laulau gamagaridi hinage tabu se abiabiwataidi.

²²Ita abo saha ta ginauri? Wau u laoma ta wasana abo se ataiei, moutuadi abo se oigogoma.