Aposole 21:7-22

⁷Naimame Taya yuu doko yakinatala sipinya pituu pao Tolemesa peama. Yuu dokonya masoo miningi kaiminingi dupa-pipa kingi nyepala kote mendai awapa kateama.

⁸Dopa petala taita dopa pyoo sipinya pituu Sisatia yuu taono dokonya peama. Pupala waiyakali Pilipa lenge dokonya andaka awapa kateama. Pilipa doko wamba Jetusaleme tange masoo miningi dupame akali kalange yapao nyiamino dokonya mende-pyaa.

⁹Baanya wanenge mapuakae kitomende dutupa akali napenya Gotenya pii doko panao lamaiyoo petengema-pyaa.

¹⁰Naima kote mendatupa yuu dokonya kateamanopa potopesa Akapasa lenge doko Jutia yuu dokonya katao epea.

¹¹Baa naima kateamasa ipupala Polonya matapu doko lyokao nyoo Akapasa baanya kingi mokopi dupa yaki petala baame lao pituu, “Oli Sipitisa dokome dapa lelyamo: ‘Juta endakali Jetusaleme kalyamino dupame matapu dake tange doko dapa pyoo anjetala, masoo minala naengema endakali dupa maitamina,’ lelyamo,” lea.

¹²Baame pii leamo doko sepala naimapi yuu dokonya tange endakali dupapimi, “Polo emba Jetusaleme napupi,” lao kyoto joo leama.

¹³Dopa leamanoaka doko, Polome lao pituu, “Nyakamame aipuma ee lao nambanya mona kenda pisekelyamipi? Nambame Kamongo Jisasa lao masetala Jetusaleme pao anjetae palito dokonya iki depa latae nakalyo. Daa, kumato lao apata depa latae kalyoakana,” lea.

¹⁴Dopa leamopa naimame baanya masingi doko aloo pisakamaipenge nanjiamosa Kamongo Goteme masilyamoli pyoo pina kayama latala pii mende naleama.

¹⁵Kote mendatupa pateamopa naimanya oapi dupa depa latala Jetusaleme peama.

¹⁶Sisatia tange Jisasa masoo miningi endakali mendapuame naima laminao akali Nesonenya andaka palyepale lao mapala peami. Akali Nesone doko Saipotasa tange mende-pyaa. Baame ee kana longo masoo minao katea-pyaa.

¹⁷Naima Jetusaleme pao pyakameamano gii dokopa masoo miningi kaiminingi dupame naima mona yaepao lanyiami.

¹⁸Taita dopa pyoo Polo apata Jemesa peteamo dokonya peama. Isingi akali dupa pitaka dokonya awapa peteamiaka-pyaa.

¹⁹Dokopa Polome dokaita kingi nyepala baame kalai piamo dokonya Goteme endakali tata waka dupa-kisa piamo dupa pitaka panao lamaiyokondape pia.

²⁰Dupame pii doko sepala Gote lao tama piami. Dopa petala Polo lamaiyoo, “Kaimia, embame kandateleno. Juta endakali tausene longo dupame masoo minao katapelyamino. Dokaita pitakame mana setapae dupa etete minokondape pyoo katamana lao masingima.

²¹Dopaka doko, akali mendapuame dokaita lamaiyoo lao pituu, ‘Polome Juta endakali tata waka kaina dupanya kalyamino dupame mana setapae Moseseme nyiamo dupa yakinalapape lenge. Nyakamanya wane dupanya elya pingi kambu kepala nayalapape lenge. Mana wambatae dupa watao minala nayalapape lengena,’ lao lamaipimi.

²²Dopana, naimame aipa pimape? Dokaitame emba ipatelenona lapae tenda salamini lumu.