1Tagra anama huteta, zamatreta ventea atufegantu hagerimpi atreta fatgo huta vuta, Kozie nehaza hageri amunompi me'nea osi mopare (ailen) vuta, nanterana Rodsie nehaza kumate (ailen) uhanatiteta, anantetira Patara mopare uhanati'none.
2Patara atreta, Fonesia kumate vunaku nehia vente keta eri fore huteta, miza huta marerunkeno atreno timpi vu'ne.
3Saiprasima ventemo unemnia kuma hoga kaziga agatereta, Siria Provinsifi vuta, Taia kumate umani'none. Na'ankure ventemo'a mago'a fenona anante eri netregete.
4Jisasima amagema nentaza disaipol nagara ome nezmageta, ana kumate 7ni'a kna mani'none. Zamagra mago'ene Avamu'mo zamazeri otige'za Poliga Jerusale ovuo hu'za hu'naze.
5Ananknama vagaregeta, atreta kantega nevunkeno, ana mika'mo'zane, a'ne zamine, mofavre naga'zamine tagrane magoka vazageta ana kumara atreta vu'none. Hagerinkena vuta tarena reta nunamuna ome huteta,
6mani'neho huta mago mago'mokizmi hunezmanteta ventifi marerita nevunke'za, zamagra rukrahe hu'za nozimirega vu'naze.
7Tagra Taia kumara atreta vuva vuva huta Tolemeas uhanatiteta, mono nagara ome nezmatagita anante magokna mani'none.
8Nanterana ana kumara atreta, Siseria ehanatita mono nehia ne' (evangelis) Filipia 7ni'a naga mono kva zamazeri oti'nafinti mago zamimofo nonte umani'none. (Apo 6:1-6)
9Ana ne'mofona 4'a ve e'ori kasnampa mofane'zga'a mani'naze.
10Anante mago'a kna mani'nonkeno, mago kasnampa nera Agabasi'e nehaza ne'mo, Judia kazigati eramino anante e'ne.
11Tagra mani'nontega Agabasi'a eno, Polina amu'nofi'a (belt) erino agra azante ene agiare renenteno anage hu'ne, Ruotge Avamu'mo'a anage hie, Amanahu kante Jerusale mani'naza Jiu vahe'mo'za ama amu'nofi'mofo nefana azeri'za kina rente'za megi'a vahe zamazampi antegahaze.
12Ana naneke antahiteta, tagrane anampi nemani'za vahe'ene kazigazi huta, Poliga Jerusalea mareorio huta asami'none.
13Anante Poli'a kenona zamirera anage hu'ne, Tamagra nahigetma zavira netetma, narimpamofona nazeri kna nehaze? Na'ankure nofinukera nazeri'za anaki nantehogukera trora osuanki, Ramofo Jisasi agire Jerusale fri'naku retro nehue.
14Na'ankure agra ketia ontahisiaza higeta, tagra kea osuta Ramofo avesi'zamo fore hanie huta hu'none.
15Ana knama evutegeta trotra nehuta otita Jerusale vu'none.
16Mago'a Sisaria kumate nemniza disaipol nagamo'za tagrane ne-eza tavare'za Saiprasi ne' Masoni nompi vazageta, korapa amage nentea disaipol ne'mofo nompi umanigahune hu'nona ne'mofo nompi umani'none.
17Jerusale uhanatunke'za Anumzamofo naga'mo'za muse nehu'za tavatagi'za knare hutma aze hu'naze.
18Uvasonkeno ko'ma atigeno, Poli'a, Jemisine maka mono kva vahe'zgama (eldas) mani'naza ome zamagenaku tagrane vu'ne.
19Poli'a ome zamageno zamatagiteno, agra agafa huno mago' mago'zama Anumzamo'ma mono eri'za megi'a vahepima e'nerigeno hu'neazana zamasmi'ne.
20Ama ana nanekema antahite'za, Anumzamofo agi erisaga hu'naze. Zamagra anage hu'za Polina asami'naze, kagra nerafuga antahio, nama'a tauseni'a Jiu vahe'mo'za zamentinti nehu'za, Mosese Kasege'ne amage' nentaza vahe'mo'zanena hampo'nati'za amage' nentaze.
21Mago'a vahe'mo'za anage hu'za kagrikura zamasmi'naze, kagra maka Jiu vahe'mo'za megi'a vahepi mani'nazana, Mosese Kasegemo'a taza osugahie hunka nehunka, mofavreramina zamufa taga huozmanteho nehunka, tagri tavu'tvamofo avu'ava osugahaze hunka hu'nananke antahi'none.
22Tagra na'a hugahune? Kagrama kamama e'nana nanekema zamagra antahisu'za tamage hugahaze.
23Ana hu'negu tagrama kasmisunaza huo. 4'a vene'nemo'za Anumzamofonte huvempa hu'za mani'naze.
24Hanki zamavarenka kagrane magoka tamazeri agru nehutma, zamazoka'ma haresazazana miza sezmantegahane. E'ina hananke'za, maka vahe'mo'za antahi'za kema hazage'za kagriku'ma antahi'nazana tamage hu'naze hugahaze. Hu'neanagi kagraka'a kasegea amage antenka manigahane.
25Hu'neanagi megi'a vahe'ma zamentinti nehaza vahetega, tagra avonkreta, havi anumzante kre sramna vuntesia zgagfane, korane anankema taga osu zgagfane onetma, monko'zana atreho huta tagesa antahiteta kre zami'none. (Apo 15:29)
26Nanterana Poli'a zamareno agrane ana vahe'ma zamazeri agru huteno, ra mono nompi vuno, ana zupa mago mago'mofonte kre sramna vuno azeri agaruhu kna vgaregahie huno ome zamasmi'ne.
277ni'a kna vagare'za nehigeno, Esia provinsifinti Jiu vahe'mo'za ra mono nompi mani'nege'za nege'za, rama'a vahe zamarimpa zamazeri otige'za Polina azeneri'za,
28anage hu'za ranke hu'naze, Israeli vahe'mote taza hiho! Ama ne'mo'a hakare kaziga mani'naza vahetamina rempi hunezmino, vahetine kasegetine, ra mono nontia ha' renente! Mago'enena agra Griki vahera zamareno ra mono nomofo agu'afi nevuno, ruotage hu'nea ra mono nona eri pehena nehie!
29Zamagra negageno Efesasiti nera Trofimasi'a, Poli'ene Jerusalemi vano nehige'za negaza ne'ku, ra mono nomofo agu'afinka avreno marerinegahie hu'za zamagesa antahi'naze.
30Maka vahe'mo'za eritru hu'za zamaga re'za e'za, Polina azeri'za avazu hu'za ra mono nomofo agu'afinti atimaneramizageno'a, ame hu'za ra mono nonkafana erigi'naze.
31Polima ahe friku'ma nehzageno, anampinti vahe'mo'za zamaga re'za vu'za, maka Jerusale vahe'mo'za ha' nehaze hu'za sondia vahete kva nehia nera ome asmi'naze.
32Ana sondia kva ne'mo'a ame' huno sondia vahe'zga nezmareno, mago'a vahe'mokizmi kva vahe'zga (sensulien, hantretia sondia vahete kva nera) zamarege'za, zamaga re'za ana vahete e'naze. Polima ahenaku nehaza vahe'mo'za, sondia vahe'mokizmi kva ne'ene, sondia vahe'zgama nezamage'za, ohe'za atre'naze.
33Anante sondia kva ne'mo'a Polina ome azeriteno, huzmantege'za tare seni nofinu anakintetageno, anante sondia kva ne'mo'a, zamantahige'ne, Agra aza'e, agra na'a hu'ne?
34Hu'neanagi tusi'a vahe tamimpinti mago'amo'za ranke hu'za ra kefinti mago zanku kereso nehazageno, mago'amo'za ruge nehazageno, sondia kva ne'mo'a ke agafa'a keno eri fore osu'ne. Na'ankure rama'a vahe'mo'za kehakare nehazageno ontahino, Polina avareta sondia vahe kumapi viho hige'za avare'za vu'naze.
35Agrama latare'ma ege'za, Polina sondia vahe'mo'za azerisga hu'za mareri'naze. Na'ankure rama'a vahe'mo'za ahenaku nehazageno'e.
36Rama'a vahe tamimo'za zamavariri'za nevu'za kezatiza, Ahe friho! Ahe friho! hu'naze.
37Polima avare'za sondia vahe kumapi ufre'za nehazageno sondia kva ne' asamino, knare mago'a kea kasmisufi? Higeno ana ne'mo, Griki kea antahi'nano? huno Polina antahige'ne.
38Kagra Isipi ne'ma, mago'a knafima ugota hunka, 4 tauseni'a vahe'ma kamani vahe ha'ma rezmanteku'ma hu'naza venene'ma zamarenka hagege kokampi vu'nana nepi, ru nere?
39Poli'a kenona anage hu'ne, nagra Jiu nere Tasis kumateti Sirisia provinsfinti, agatere'nea ran kumatetire. Knare natrenankena ama vahetamina kea zamasmigahuo higeno,
40Ana sondia kva ne'mo knareki kea huo higeno, Poli'a latare oti'neno azanu avame hige'za keresoma nehazazana eri taganageno, antahi'naza Aramu (Hibru) kefinti, anage huno zamasmi'ne.
