Text copied!
CopyCompare
Fúka Moodaanaki Kira Ufa Afaqínaasa Ufa - Niqiqoosa

Niqiqoosa 21

Help us?
Click on verse(s) to share them!
1Pauroofa maasá faqa sípaki akarámafufaqa maasá Eefeesusa máqannaasara nimudáooqidaqa nímandamáseeqa dóo máfi rakéemma quqásee sípaki fiqíafana. Maasá andeeqásee fífiufaqa Kóosa maqusai óonu kásoommasee miqóo faiqéeqa. Iqáqoofanoo kanánaana kafáa fífiufaqa Roodeesa máqa maaqai óonuree káqi fíqaréeqa Patara máqusai fiqíafana.
2Patara máqusai maasá sípa moó paqúrimasee Fooeenisia fímaru sipana paqúrimasee minakí akarámafi fiqau.
3Patara máqusaindari fífiufaqa Sipurusa áfuma qáfamaseeqa miná áikundanai fíaikáteeqa andeeqásee Siria máqa maaqai fiqíafana. Siria máqa maaqai fídaqa misá maa-ummaara ainainná Tiree máqusai quqáaqee quná fídaqa dóo mi-Tiree maqusána paqúrimásee miqóo kásooiqau. Miqóo sípa máree fu úmmarana minakínaana maréeqee maqásaa quqeemarufaqa maasá Tiree máqusai Yísuna ufa írimarusara randásee paqúrimasee amaana moodáa misá faqa máriqia. Misá faqa márufaqa miqóoqaraasa maraquna fannoo qímannimufaqa Pauroonara sía Yeerusareenni óoru fúannee qímariqau.
5Dóo misá faqa marikíqa fíndifi sípaki ániafanaqa faiqí ánaasee faqa nári faiqi námufaqa moómoosa anirée ooruku námmari áfainni óondaanisaa niqoori sáunarafufaqa innaaru qímasoofaqa misá nímandamáseeqa sípaki akarámafufaqa misá nári maqúsai óoru fíqau.
7Sípaki Tiree máqusaindari maasá Tooreemaisa máqusai óonu raqíafana. Miqóo óonuree Yísuna ufa írimarusa miqóo márusa níqafamasee moodáa fáasaana misá faqa máriqiafana.
8Miqóoqari sípaki fíqa kanánaana Seesareea máqusai óonu raqíafana. Óonureeqa Firipina máaqa máru qaannai óoru miná faqa máriqiafana. Firipifa Yísuna fasáasa qímanniminoo nufá márinau. Óoqai Yeerusareenni márufaqa niqiqoo fásiqausaki máridanoo miná maréeqee quqásoofanoo qísauku dínni taikásee dínni ani qaara marasée marúsaki máridanoo munnimmaina rainá nímimarufaqa máriufa Firipifa márinau.
9Firipina áraamuna qaara faqa qaara faqa mánaaqa máriqau. Ánutuna maraquna fannoo mi-manaaqáusa náakufufaqa Ánutuna ufa faiqi ánaasee qímannimirana akoofásaikiqa máridaqa qímannimimariqau.
10Maasá Firipina faqa qaaramoo fáasaana máriafananoo Yudeeaa támummaqara fasiqa moó fannoo miná áuqu Akabusafa Yudeeaa máqa maaqaindari qumuranáu.
11Mifá maasúnnai aniréenoo Pauroona pikápandauru ani qumáreenoo minánnai narí áiku ásauku kukúqamma rumbáseenoo qinau. Ánutuna náaquqara maraquna fannoo maaqí qímasee qídanoo. Maa-pikapána ákoofa Yeerusareenni óoru ráinaqa maaqímmasee ruúmbeeqee ánaamuru nímifaranoo.
12Maasá mi-ufána iriséeqa maasá aiqáma miqóo máriafanausa afeekaikámaseeqa sía uqanna Yeerusareenni óorufuani árifaranoo fee qiqíafana.
13Pauroofa mi-ufána iriséenoo qinau. Ínnee nánaree miqímasee íkiraqaidee miqí qiafanoo qiní qímuqusa mandáikammaqimaqaidee. Qinée Yeerusareenni óoru ráanaqa Karaambáiqa Yísunara qiní rumbárana faqa qiní dárirana faqa dóo qinée sía rufíaidaqa minára deedaqammá úqirausa nídaqa.
14Pauroofa miqí qímasoofaqa maasá qáooqirana minníseeqa maasá faqa Ánutuna íriramau kai fídaqa sía ititáanaura sái kai fúanifee qiqíafana.
15Maasá miqóo Seesareea máqusai káqikaaqóo máriqa maasá qeeqá aináina deedaqamámaree Yeerusareenni maqámau óoru fíqiafana.
16Seesareea máqusaindari maasá qíkaqaafasaa kírausa akaqáusa maasá faqa óoru fíqau. Misá maasá óoruree márianna maqana uqaqífiqarara maasá faqa óoru fíqau. Maasá Masoona máaqaki márifaree qiqau. Masoonafa óoqai indaarú Yísuna ufa írimarufa márufaqa Sipurusa máqusaindaraafa márinau.
17Maasá Yeerusareenni óoruraafannanoo Yísuna áiku ásauku qumu ámiqi ámiqimandee qumu qífiqee óoru fíqau.
18Maasá miqóo óoru faiqáafananoo iqáqoofanoo Pauroofa Yameesana qáfarara finau. Yísuna ufa írimarusa aiqáma miqóo márufanoo Pauroofa nímandamáseenoo narí ánaamuru máaqa máaqa nímarufanoo Ánutufa narí Pauroonannai aiqáma ainaina áuqeeunara qímanniminau.
20Misá aiqámausa Pauroona ufa iriséeqa Ánutunara aiqámausa dúfi dúfi qímasee asasiqau. Asasamásee Pauroona qímamiqa qiqau. Óo maasá áti, maaqóo Yuda máqannaasa Yeerusareenni máriasa misá fasáasa ufa qímamianaura. Yuda máqannaasa moómoo tauséenna dóo Yeerusareenníara rídaqa. Misá Mooseena sándufasáa káaqa minára faqa Yísunara faqa rídaqa. (Yuda máqannaasa Mooseena sándufa íridaqa maasá fáinanduqiranee qídaqa.)
21Pauroo misá aníara maaqí qídaqa, anée ánaamuru maqúsa máqusa nídana Yuda máqannaa minakíaqa máriasauqa anée misára Mooseena sándufa minníseeqa maasá fáinanduqirana minnísaaqée qímariannanara Yuda máqannaa óosana minnísaaqée qídanoommifoo qídaqiafaqa maasá íridaqa. Aníara Yeerusareenni ániifoo qifaqa misá aníara iriséeqa áanóo qifaranoo.

23Minára iriséeqa maasá qímamiannaqóo kai fúa. Maaqóo qaara faqa qaara faqa fasiqa máridaqa. Misá maasá Yuda máqannaa óosana marasée dóo qíma afeekaikámasee níkiaqa maqá namufaqa indufú áqiranara nísauku uqéeraseeqa Ánutuna áfusaa qíma afeekaikámandee máridaqa.
24Misá firaa amaana máqaki kéeqafi nári ánaamuru mandáinaina nipatasáa márina rukáseenana anée misá faqa kéeqafi aneenáindi faqa rukásainanoo Ánutuna áfusaa ánukanoo márinnaranoo. Findaukámasee anée aneenná munnimma faqa misá munnimma faqa áqua. Áqusaifana anée minamúsa faqa nári níkiaqa asausí maqánamu faqa indufú áquaqa. Miqí másainaqa aiqámausa aní qáfamaseeqa anée Mooseena sándufa rukíarana aníara qunára únna qíaafoo qiaqéera. Misá aníara kúqaa Mooseena sándufamau fímarifa máridanoo qiaqéera aní áruannee qínausa sía aní árifara.
25Yísuna ufa írimarusa úriqararausa Yameesana máaqaki Pauroonara qímaseeqa maaqí qiqau. Maasá ánaamuruqa máriasa Yísuna áiku ásauku kámambuasa pása ákara rúmasee maaqí qímasee qímannimiqia. Ínnee nárana moo únna anutunaree áfaannaree misára dúfi dúfi qímariana miná minnísaaqa. Aandáu̱ fidika faqa sía naaqa. Ufaanakí árira aandáu̱ fidikana qúsinoo márina miná faqa minnísaaqa faiqí ánaasee narí úmmuari narí úmmuarimariana faqa minnísaaqa.
26Pauroofa misá ufa iriséenoo qaara faqa qaara faqa fasiqa namu nífiqamareenoo iqáqoofanoo kanánaana amaana máqaki kéeqafinoo misá sáimbaqa Mooseena sándufa andeeqásee fínoo ánaamuru mandáinaina narí apatasáa máruna rukánau. Miqímaseenoo Pauroofa amaana máqaki kéeqafinoo Ánutuna aanáiqikirausa qímanniminau. Qísauku moodáannai taikásee dínni ani qaaraqánda marasée fáasaana maasá qifaaqasáa mandáinaina ánukee maríanaura. Miná maaríqoo miná taikásaanaqa miná maaríqoo miqóo ínnee aanáiqikirausa aandáu̱ aruséeqa Ánutunara tatúfirana suqáifanoo maasá rukásaunnana taikáani.
27Pauroofa mi-fasiqa namúsa faqa amaana máqaki dínni qísauku taikásee dínni ani qaara marasée fáasaana amaana máqaki márinoo taikóoqookari Asia máqasaa Yuda máqannaa márusa amaana máqaki Pauroona qáfamasee aiqámausa nírana fundákuseeqa fáaqa fuísee qíqa Pauroona kári qufaqa aniqumáraseeqa qiqau.
28Isaraee máqannaa fasiqauqa anidadaaqíaqa. Maa-fasiqáfa máaqa máaqa maqúsa maqusa nídanoo únnaqi nóo nifa máridanoo. Isaraee máqannaara mandá ufa qímarifa, Mooseena sándufara qáoo qímarifa maa-amaana maqánara faqa ufa mandá qímarifa máridanoo. Dóo mifá maqee ánaamuru máree maa-amaana maqánaki mini quqásaifanoo dóo maa-amaana maqáfa putaa ínoo máridanoo.
29Misá Eefeesusa máqannaa ánaamuru fasiqa Taroofimusana Pauroona faqa mádaanai maqúsai márufaqa qáfamasee miná faqa amaana máqaki mári ifoo qímasee sía qáfarainni fáaqa rúmasee Pauroona árirara qiqau.
30Mi-ufáfa amaana máqakiqari radíqifufanoo dínni dínni dáraaninau. Aiqáma díndari díndari moodáanaki aniréeqa Pauroona amaana máqakiqari qumáree maqámau rarisámeeqee kooqínni áqusoofaqa amaana máqasaa aanáiqikirausa amaana máqaki mandáikiandoo qímasee káqi káqi ufaqá amaana máqa kooqí ititásaqau. Faiqí ánaasee moómoosa usufufaqa Pauroona sáamu uqafíqee maríqau. Kuqá áruanee qímasaida miqí maríqau.
31Moó fannoo sandée óonureenoo Roomma máqannaa saidéena qímaminoo qinau Yeerusaree máqannaasa aiqáma suqíqa tínoorirafa firaafá máridanoo fee qímasoofanoo Saidéena fannoo narí sundíauqa namufaqa sandámaqaraasinoo misá úsi marúnakina anirámasoofaqa Pauroona áriuna minnísee náriara kai rakéeiqau.
33Saidéena fannoo Pauroofuqoo aniréenoo ani miná qumáraseenoo narí sundíara qaara sainandannái rumbáanee qímaseenoo áriusa írammirinau. Maa-fasiqáfa nána ainaina mandáinainee maraqaifaqée ínnee árii fee qufaqa moó fannoo moo úfa qufanoo moó fannoo moo úfa qufanoo Roomma máqannaa Saidéena díndari díndari ufa fífau faafau ufa kái qufanoo Saidéena fannoo sía ufa ánoona írinoo Pauroona máreenoo narí quqúsaki múnu quqásoofanoo márinau.
35Roomma máqannaa sundíauqa Pauroona áfiqee fímarufaqa Yuda máqannaasa áanoomaseeqa Pauroona kooqí aaqá óoruroofaqa áruanneerufaqa sundíauqa miná aindúsueeqeeqa uqéereeqeeqa maarínni quqúsa qámbaanai quqáqau. Faiqí ánaasee sandée fídaqa Pauroonara dóo kúqarua kúqarua qímariqau.
37Sundíauqa nári quqúsaki quqáanneerufanoo Pauroofa Saidéena írammirinoo qinau. Amanée faiqí ánaasee qímannimianauree qufanoo Saidéena fannoo tautúmaseenoo qinau. Óo anée Kirisa máqannaasa ufa irímariana fee. Anée sía mi-Isipa máqannaa fásiqa óoqai foo tauséenna (4000) nipuráraa fasiqauqa nífiqamaree aadána máqasaa quqóona fee. Miqí qufanoo Pauroofa qáoo qímasee qinau.
39Qinée Yuda máqannaa máridaqa. Qinée Sirisia máqa maaqaki Tarasusa máqusai úriqarara maqusai kambíqarausa máridaqa. Amanée qinée faiqí ánaasee qímannimia.
40Saidéena fannoo miná iriséenoo eedóo qufanoo Pauroofa kooqí írirasusaa akarámafufanoo ásaukunnai misá ufa quná qáoo qímasoofaqa misá miná iriséeqa kásoomáfufanoo Pauroofa nári Yuda máqannaasa ufakíqari qímanniminoo qinau.