APOSETOLO EDIA KARA 4:23-34

²³E kahudia nege murinai, raruosi na turadia dekedia ela, hahelaḡa taudia bona hanua tau-badadia edia hereva iboudiai e hamaorolaidia.

²⁴Idia na e kamonai, bena lalodia e hatamonaia, Dirava e guria, eto, Ḡaubada e, guba, tanobada, davara, bona lalodiai e miamu ḡaudia iboudiai, ikaradia na Oi.

²⁵Oi danu Lauma Helaḡa ena amo ai senemai David uduna ai o hereva, eto, Bese idau-idau dahaka baduna e badumu, Bona dahaka dainai taunimanima ese ḡau asi anidia e lalo hadailai?

²⁶Hanua pavapavadia e gini tore, Bona hanua lohiadia e hebou, Lohiabada ena Keriso ida ilao-ahudia.

²⁷Momokani, ina hanua lalonai idia na e hebou, emui hesiai tauna helaḡana Iesu, oi ese o horoa tauna, ihadikana totona. Pontio Pilato bona idau bese taudia bona Israel besena taudia e hebou,

²⁸oi imamu ese e torea guna, oiemu aonega ese e haeroa guna, karana e karaia.

²⁹Taunabenai, Lohiabada e, edia hahegari herevadia ame kamonai; emu hesiai taumai goada bame henimai, emu hereva baia gwaurai mai goadamai ida.

³⁰Imamu danu ba toia roro, gorere taudia ba hamauridia, toa bona hoa karadia ba kara, Iesu, emu hesiai tauna helaḡana, ladana ai.

³¹E ḡuriḡuri vaitani, bena edia hebou rumana vada e heude-heude. Lauma Helaḡa ese iboudiai e rohedia, bena idia ese Dirava ena hereva e harorolaia mai goadadia ida.

³²Kamonai taudia iboudiai mai lalodia tamona bona mai daradia tamona ida e nohova; ta ena kohu sibona ena se gwauraiava, a edia ḡau iboudiai e abi bouva.

³³Aposetolo taudia ese danu Lohiabada Iesu ena tore-isi-lou e harorolaiava mai siahudia ida. Dirava ena harihari-bada danu idia iboudiai latadiai e miava.

³⁴Idia dekediai tau ta se dabu. Badina be mai edia tano eiava edia ruma taudia iboudiai ese edia ḡau eha hoi, davadia e laohai,