ᤛᤣ᤺ᤰᤕᤢᤰᤔᤡᤒᤠᤜᤠ᤹ 4:23-34

²³ᤜᤧᤰᤁᤣᤗ᤹ᤖᤡᤰ ᤔᤧᤗᤧᤖᤢᤛᤡᤀᤠᤱ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤘᤣ᤹ᤛ᤻ᤔᤠ ᤏᤛᤠᤏᤡᤒᤠᤜᤠ᤹ ᤋᤢᤶᤛᤧ ᤐᤣᤛᤡ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤔᤧᤳᤋᤢᤛᤡᤒᤠ ᤐᤠ᤺ᤴᤜᤠ᤹ ᤆᤧᤰᤂᤧᤳᤇᤢᤖᤥ॥

²⁴ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤌᤡᤰᤜᤢᤵ ᤏᤢ ᤌᤡᤰᤔᤢᤖᤠ ᤔᤧᤒᤥ᤺ᤰᤂᤧᤀᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤔᤧᤈᤥᤃᤧ. “ᤀᤠᤏᤡᤃᤧ ᤔᤢᤰᤛᤠᤶᤍᤠᤱᤒᤠᤀᤣ. ᤂᤧᤏᤧ᤹ᤃ ᤋᤠᤱᤛᤠᤰᤐᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤠᤜᤱᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤥᤃᤢᤛᤡᤒᤠᤖᤥ॥

²⁵ᤀᤢᤴᤇᤣ᤺ᤴ ᤂᤧᤏᤧ᤹ᤃ ᤀᤠᤏᤡᤃᤧ ᤋᤠᤰᤌᤧᤒᤠ ᤍᤠᤀᤢᤍᤖᤧ ᤁᤢᤔᤢᤖᤠᤀᤥᤗᤠᤶ ᤂᤧᤏᤧ᤹ ᤁᤧᤛᤣᤘᤠᤖᤥᤒᤠᤸᤗᤧ ᤁᤢᤔᤧᤴᤏᤥ ᤛᤣᤛᤣᤔᤠᤱᤗᤠᤶ ᤀᤰᤂᤣ ᤁᤧᤒᤠ᤺ᤳᤋᤢᤖᤥ– ‘ᤌᤣᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤡᤴ ᤀᤠᤍᤰᤗᤧᤱᤘᤠᤀᤥ ᤐᤥ᤺ᤰᤐᤣ᥅ ᤜᤧᤰᤁᤩᤠᤱ ᤌᤣᤀᤠᤱ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤜᤏᤧᤒᤠ ᤏᤡᤱᤛᤣ᤺ᤰ ᤔᤧᤈᤥᤃᤢᤒᤣ᥅

²⁶ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤱᤅᤠᤱ ᤍᤠᤱᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤢᤶᤗᤥ॥’

²⁷ᤛᤧᤰᤂᤠᤀᤣ ᤒᤠ ᤂᤧᤴ ᤐᤠ᤺ᤴᤏᤡᤴ ᤁᤴ ᤕᤧᤰᤕᤰᤁᤥ ᤁᤧᤖᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤴ. ᤛᤢᤜᤠᤱᤃᤧᤶᤒᤠ ᤐᤴᤋᤡᤕᤛ ᤐᤡᤗᤠᤋᤛ. ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤱᤛᤣ᤺ᤰᤁᤥ ᤁᤧᤛᤣᤃᤢᤒᤠ ᤛᤣᤛᤣ ᤁᤧᤛᤣᤘᤠᤖᤥᤒᤠ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤁᤴ ᤕᤧᤰᤕᤰᤁᤥ ᤔᤧᤈᤢᤵᤛᤧᤀᤠᤱ ᤔᤧᤘᤠ᤹ᤖᤥ॥

²⁸ᤂᤧᤏᤧ᤹ ᤁᤧᤏᤡᤱᤛᤣ᤺ᤰ ᤐᤥ᤺ᤱᤏᤡ ᤑᤠ᤹ᤀᤠᤱ ᤋᤃᤡᤛᤠ ᤁᤧᤔᤢᤰᤛᤠᤶ ᤏᤢ ᤁᤧᤏᤡᤱᤘᤠ᤹ᤖᤧ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤈᤥᤃᤢᤖᤥ॥

²⁹ᤍᤠᤱᤒᤣ. ᤀᤠᤸᤗ ᤂᤧᤱᤜᤠ᤹ᤖᤧ ᤕᤱᤔᤠ ᤔᤧᤛᤧᤖᤡᤃᤧᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤣᤘᤠᤖᤥᤒᤠᤜᤠ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤁᤡᤴ ᤜᤠᤱᤜᤠᤱᤅᤠᤱ ᤐᤠ᤺ᤵᤔᤠ ᤕᤠᤵᤔᤡ ᤁᤧᤎᤢᤶᤒᤠ ᤀᤠᤈᤥᤃᤧ᤹ᤀᤥ॥

³⁰ᤜᤧᤰᤁᤩᤠᤱ ᤛᤣᤛᤣ ᤁᤧᤛᤣᤘᤠᤖᤥᤒᤠ ᤕᤧᤛᤢᤖᤧ ᤁᤢᤔᤢᤰᤛᤠᤶᤗᤠᤶ ᤔᤏᤠᤜᤠ᤹ ᤔᤧᤘᤣ᤺ᤳᤏᤡ. ᤜᤧᤰᤁᤩᤠᤱ ᤕᤖᤡᤰ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤐᤥ᤺ᤱᤏᤡ ᤑᤠ᤹ᤀᤠᤱ ᤁᤧᤜᤢᤰᤁᤡᤴ ᤛᤴᤇᤧ᤹ᤀᤥ॥”

³¹ᤂᤧᤱᤜᤠ᤹ᤖᤧ ᤋᤢᤘᤠ ᤔᤧᤈᤥᤃᤢ ᤔᤧᤛᤢᤖᤢᤸᤗᤧ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤒᤠ ᤋᤧᤴᤏᤡᤴ ᤗᤢᤵᤗᤡ ᤌᤠᤅᤧᤒᤠ ᤜᤧᤰᤁᤣ ᤛᤠ᤹ᤖᤡᤰ ᤕᤰᤂᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤠᤰ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤀᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤔᤧᤱᤃᤡᤀᤣ ᤔᤧᤒᤠᤖᤧᤖᤥ॥

³²ᤀᤠᤸᤗ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤌᤡᤰ ᤏᤡᤱᤘᤠ᤹ ᤌᤡᤰ ᤔᤢᤖᤠ ᤔᤧᤒᤥ᤺ᤰᤂᤧᤀᤠᤱ ᤂᤢᤏᤡ᤹ ᤔᤧᤃᤳᤋᤢᤒᤠ᤺ᤴ ᤀᤡᤱᤃᤠ᤹ᤀᤡᤴ ᤔᤧᤸᤗ᤹ᤀᤣ ᤁᤧᤖᤧᤰᤗᤧ ᤌᤡᤰ ᤏᤡᤱᤘᤠ᤹ ᤌᤡᤰ ᤜᤢᤵᤐᤥ ᤔᤧᤕᤠᤅᤢᤖᤥ॥

³³ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤐᤕᤶ ᤔᤢᤰᤛᤠᤶᤏᤢ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤐᤠ᤺ᤴᤜᤠ᤹ᤖᤧᤴ ᤋᤥ᤺ᤴᤍᤡ ᤔᤧᤒᤡᤖᤢᤀᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖᤥ॥

³⁴ᤂᤢᤏᤡ᤹ ᤗᤢᤶᤔᤥ ᤆᤠᤕᤥ᤺ᤶᤒᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤔᤧᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ ᤔᤧᤃᤳᤋᤢᤒᤠ ᤕᤠᤱᤛᤠᤁᤢᤴᤎᤣ. ᤜᤡᤶᤎᤠ᤺ᤱ. ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤔᤧᤛᤱᤄᤢᤀᤠᤱ ᤂᤧᤴ ᤕᤠᤱᤅᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤠᤕᤥ᤺ᤶᤒᤥ ᤁᤢᤀᤡᤛᤡ᤺ᤰ ᤔᤧᤜᤠ᤺ᤳᤋᤢᤛᤡᤖᤥ॥