Dehet deng Aan in Nutus sas 4:23-34

²³Nikit oen sao Petrus duas Yuhanis kon, oen duas pait lakos se oen tapan nas. Hidim oen dehet totoang asa man tulu agama Yahudi las, nol blalan-blalan hadat tas in kaing one ka.

²⁴Ming ela kon, oen duas tapan nas totoang nakbua nol dalen mesa le kohe-kanas noan, “Ama Lamtua Allah man in Kuasa Dudui. Ama man koet apan-dapa kua nol apan-kloma kia, nol isin nas totoang.

²⁵Hmunan nu Ama Lamtua Koo Niu ka pake upung Daud le daid Ama Lamtua mee-baha. Un tek meman son noan, mam atuli labang nol Yesus. Un kon dul noan: ‘Atuil deng bangsa-bangsa didang komali son undeng dehet hlales-angin; Oen tao dadahut tuun le tao dais man in muik tula-peke lo ngas.

²⁶Lahi-laih man in se apan-kloma ki ngias nakbua, le hote-dait labang nol Ama Lamtua; nol tulu-tulu ngas koo mesa, le lakos labang Ama Lamtua Allah nol Kristus, Atuling man Ama Lamtua tulu meman son deng hmunan nua ka.’

²⁷Asa man upung Daud in dula ka, halas ni daid son. Nol un nahin na kon, halas ni daid langa son. Meman se kota ni, laih Herodes nol gubernur Pontius Pilatus, blalan-blalan Israel las, nol tulu-tulu deng bangsa-bangsa didang ngas nakbua son. Hidim oen koo mesa, le labang Yesus, Atuling man Ama Lamtua hulin meman son na.

²⁸Mo halas ni kit tanan son noan, nas totoang tom nol asa man Ama Lamtua in koma ka, nol muid asa man Ama Lamtua in nutus meman son, deng lolo hmunan nua ka.

²⁹Ama Lamtua, oen aa liing kami, le halin kaim lii. Tiata, kaim nodan le Ama Lamtua bel kaim in brani. Le halin kaim laok tek Ama Lamtua Dehet Dais Banan deng Yesus sa, bel atuli-atuli las se ola-ola, nol in lii-tidu lo.

³⁰Nol kaim nodan le Ama Lamtua bel kaim kuasa, le tao banan atuil in ili ngas. Kaim kon nodan kuasa le kaim tao taad in herang bili-ngala, le halin atuli las tana noan, kuaas na maa deng Yesus, Ama Lamtua Atulin in Loka-tadu Niu ka. Ama Lamtua, kaim in kohe-kanas sa pes ela.”

³¹Oen kohe-kanas mamaus ela lam, um man oen in nakbua na heheko. Hidim oen totoang haup Ama Lamtua Koo Niu ka. Tiata oen putis le lakos tek Ama Lamtua Allah Dehet Dais Banan na nol in buni-buni lo.

³²Hidi kon totoang atuil in parsai se Yesus sas koo-dalen mesa, nol oen nuil namnau apa. Muik in kila apa lo, oen kom in bating apa sa-saa. Asa man oen nena kam, oen ator le halin oen pake leo-leo.

³³Hidim Ama Lamtua bel kuasa se Un anan in nutus sas, halin tek atuli las noan, oen net nol matan esa, le Lamtua Yesus nuli pait son deng Un in mate ka. Nol Ama Lamtua beles hangun mamo-mamo.

³⁴Deng atuil nas, muik in hee oen dale kas esan, tamlom mo oen uma las esan. Hidim duit ta oen belen lako se Ama Lamtua atulin in nutus sas, halin oen pake taung in urus atuil hut mamo kas in parlu ngas. Undeng na, tiata oen dabun sa-saa mes lo kon.