Acts 4:23-34

²³Peter ma John i nae me ai rava awari ma pirisi ḡaeḡaei ma dogadogara aiwai i ririweia taui i vieḡei.

²⁴Maranai tauvitumaḡana wei riwana i nonori, taui anatapui i raupari gogona God awarina: Bada tam ai gulau, Tam mara, dobu, boga ma anatapuna au orana maemaei taukaueina.

²⁵Tam Arua Vivivireinei am taunola, amaiai David gamonei u babani ma u riwa,

²⁶Ma dobu ai gulagulau i vokaukaua ma babada ḡaeḡaei ḡelaui maiteni i vitagogiei da

²⁷Anina riwa kaua. Wei kauai weka au Jerusalem i tupua, Herod ma Pontius Pilate, Jentail ma mai Israel maiteni i vitagogiei, da am taunola vivivireina Iesu u bulobuloia i viḡaviei.

²⁸Ma tam am rewapanei ma am ḡoanei am oga menanare u tarataranei marina nanare i tupua.

²⁹Bada, nai ravai ai parivai-rovorovo au uram ma am taunola ma vovai-virewapani da ana tepatorai riwam ina raugugulei.

³⁰Uram ma viloloi da ma vilawana ma kaua babai ma mataira ḡaeḡaei ma kauei, am taunola Vivivireina Iesu wavanei.

³¹Ma pari au murina, taui mepa i vivitagogiei gabuna i vigu. Ma Arua Vivivireina anatapui orai i vioai. Ma ana tepatorai God riwana i raugugulei.

³²Tauvitumaḡana anatapui ai nota ma orai tagogi. Ma ai purapura tagogi ma eḡa aiwai ita nuanei.

³³Ma Apasol ana tepatorai ma rewapanai Bada Iesu ana iraḡe, ma ana vomairi me i raugugulei. Ma God ana viaiaina ḡaeḡaena taui anatapui awari i peu.

³⁴Ma taui au orai eḡa aiai aiwai ita voladaḡei aubaina, ai rava ḡelaui ai doa bo ai numa i gimagimarei ma manena i neneiai Apasol awari i tereterei, ma aiai da aiwai i vovoladaḡei nanare i vovoagui.