APOSETOLO EDIA KARA 20:6-28

⁶A ai na Flaoa-asie-hatubua Ariana dinadia e ore murinai Filipi a heautania, daba ima Troa ai a heau kau, idia dekediai a kau. Dina hitu unuseni ai a nohova.

⁷Pura dinana gini-gunana anibou ianina a hebou negana ai, Paulo ese e haroro henidia, badina be daba ai baine heau eto. Ena haroro e hadaudaua ela bona malokihi.

⁸Atai daiutuna ai a hebou; una daiutu ai lamepa na momo.

⁹Eregabe tauna ta, ladana Eutuko, gaba-matuna ai e helaiva; bena mahuta ese e hametaua matama, Paulo ese ena haroro e hadaudaua dainai. E mahuta hedavauhe, bena ruma atai kahana amo e moru dobi; e abia isi negana ai ia na vada e mase.

¹⁰A Paulo na e diho, latanai e goru, e rosia; eto, Asio heloḡo-heloḡo, ia na doini e maurimu.

¹¹Ma e dae kau, flaoa alagana e bakia, e aniani; bena idia ida e hereva-hereva ela bona daba e rere. Bena e raka oho.

¹²A hebou taudia ese eregabe tauna e hakaua Iao mai maurina ida; edia lalo-namo na dia maraḡi.

¹³Ai na vada a ḡui guna, lara a kidaia, Aso ai baia heau kau, unuseni ai Paulo baine ḡui kau eto; badina be ia na unu e hahedua toma. A ia na tano amo bainela eto.

¹⁴Taunabunai ai na ia ida Aso ai a hedavari, e ḡui kau, bena Mitulene ai a heau kau.

¹⁵Unu amo ma a heau lao, bena kerukeru Kioso daenai a hetu, vanegai Samo ai a heau kau, vainanegai Mileto ai a heau kau.

¹⁶Badina be Paulo lalona eto Efeso baine heaua hanai be namo, nega daudau Asia ai baine halahe na garina. Badina be ia na e ḡava, bema mai dalana Pentekoste dinana ai Ierusalem ai baine noho eto.

¹⁷Bena Mileto amo ia ese gwaukau Efeso e siaia lao, ekalesia oreana ita-taona taudia ia dekena baela.

¹⁸Bena idia na dekenai e kau negana ai, ia ese e hereva henidia, eto, Asia tanona ai aegu na hadaia guna dinana ema harihari, ede na noho tomava umui bogaragimui ai vada dibamui.

¹⁹Lohiabada isiaina na lao heniava mai manaugu ida; iruru-matagu e dihova bona hisihisi ese e butugu taova, Iuda taudia edia henega dikadia daidiai.

²⁰Ihanamolaimui herevadia iboudiai na hamaorolai henimuiva, ta asina hunia; bona na hadibamuiva taunimanima vairadiai bona emui ruma ai danu.

²¹Iuda taudia bona Helene taudia danu na haroro henidiava, Dirava enai bae helalo kerehai, bona eda Lohiabada Iesu Keriso bae abidadama henia.

²²Harihari Ierusalem bainala, Lauma ese vada e ḡuigu dainai, a dahaka ese unuseni ai baine butugu tao na asi dibagu;

²³ḡau tamona, hanua hanua lalodiai Lauma Helaḡa ese vada e hamaorogu, iḡui bona hisihisi momo vairagu ai eme hure.

²⁴A egu mauli na herevana, asina lalokau heniamu: egu heau baina ha-orea, hesiai ilaohenina Lohiabada Iesu ese vada e henigu, Dirava ena harihari-bada sivaraina namona baina gwauraia hedinarai, vada baina haḡuḡurua.

²⁵Harihari lau na dibagu, emui ai na loaloa bona Basileia na harorolai henimui taumui iboumui ai ese vairagu basio itaia lou.

²⁶Badina binai na hamaoromuimu, lau na taunimanima iboudiai raradia amo name ḡoeva.

²⁷Badina be Dirava ena ura idoinai vada na hamaorolaimui; sina taina asina moia tao.

²⁸Sibomui nahuamui ba toho, mamoe serina nahuana danu; serina bunai Lauma Helaḡa ese ita-taona taumui ai vada e halaomui, Dirava ena ekalesia ia rarana e davalaia ḡauna, ba ubua helaoreana.