Apostolo 20:6-28

⁶Pali mateu, mete rata taro a habu na Bret i Uka Is. Muri mete rike na aga vonga na tanga e Pilipai mete vano. I lobo a parava i lima mete pakarau ria o Troas, lakea mi made vonga na parava i polorua.

⁷Na mugana parava na vik mi vapopo, mi kani palupu a bret. Muri e Paulus i vara e huriki. I ta polopolo, i harena na kuru rodo, a vuhuna kuduvi bara i pe ria.

⁸A ruma iea, a ruma dagi. A tabekena i tolu. A tabekena tara i polotano, a tabekena tara i polomeli. A tabekena tara i polomeli liu. Mia lobo mi vapopo na tabeke polomeli liu, i kupo a maka lam ri para.

⁹E Paulus i ta lokovonga liu, lakea a riau tara, a rana e Iutikus, i marore. I made langa langa na matatala, lakea na tahuna i marore, i boru tala, i boru puru na malala. Ri puru mai ia, ri pulo lae ia, pali ri masia i mate pali.

¹⁰Pali e Paulus i puru lakea, i pasike puru maia, i nugua, i ta maea, “Naha ni luhoi lege, i uka ma i mate.” A riau iea i mahuri mule ngane,

¹¹muri e Paulus, e huriki nga ri hamule sike tabu. I kevea a bret, ri kani. Muri i ta tabu, i harena na hini malaharere, muri i vano.

¹²A riau iea i mahuri, ri tulia i lakea na tanga. A niluhoi ne ria i kamumu hateka.

¹³Mi rike na aga, mi muga lakea o Asos, mi gi davea vonga e Paulus, a vuhuna i ngaru ni laho na dala. E Paulus i taki ge rike na aga turane mia o Asos.

¹⁴Na tahuna i pakarau mia vonga, mi vakarikea na aga, mi lakea o Mitilini.

¹⁵Muri mi malaga vonga, mi vore na parava i taku, mi bele tabukoi na bodu e Kios. Na parava muri tabu mi bele o Samos. Na parava muri tabu mi bele o Miletus.

¹⁶I uka ma mi dili o Epesus, a vuhuna e Paulus i uka ma i ngaru ni made o Asia. I ngaru ni bele malaviriri o Ierusalem muga na parava na Pentekos.

¹⁷Na tahuna mi bele o Miletus, e Paulus i talo rike a ngava ne huriki a gare na tara ne Kristo o Epesus ri gi valai, ri gi masia.

¹⁸Na tahuna ri bele, i taki ria, i ta maea, “Mu lohoka vona a vilogu na tahuna a made turane mua, i vakatubu na tahuna a bele karaba na tabeke ne Asia.

¹⁹E huriki a Iuda ri ngaru ni rata hale iau. Ri rata iau a dodo, a tangi balaka kupo. Pali i uka ma a vakadagia a ragu. A leho kunana ne Bakovi Dagi.

²⁰Mu lohoka vona i uka ma a mangenge. A vara pagapaga kunana mua, i uka ma ruhuloloa tara ngava ge tuhori mua. A vara mua na matane huriki lobo, a vara mua na ruma takutaku ne mua.

²¹A taki tora e huriki a Iuda, e huriki a Grik, ri gi pulo a vilone ria, ri gi ramaia a Vure, ri gi luhoi torea a Bakovi Dagi ne hita, e Isu Kristo.

²²“Pali ngane a Hanu Kiripiripi i taki tora iau ga lakea o Ierusalem. I uka ma a lohoka vona a ra maki ge bele nau vonga.

²³A lohoka kunana na tanga lobo a lakea vona a Hanu Kiripiripi i taki iau vona ga bole a nimadihi, ga dili na bavi.

²⁴Iau i uka ma a luhoia a nimadegu ga maki dagi. A ngaru kunana ga vakalobo kamumu taroa a leho e Isu a Bakovi Dagi i habia nau ga ratea: Ga vakalongo ne huriki a Velenga Kamumu na naro kamumu na Vure.

²⁵A laho turane mua, a vara mua na harikianga na Vure. Pali ngane i uka ma mu gu matai tabu iau.

²⁶Ngane a taki muholi mua na parava mona: e rei tara ne mua ge velu, iau a uka ngava vona,

²⁷a vuhuna a taki lobo mua vona pali a ngava lobo a Vure i ngaru mu gu lohoka vona.

²⁸Mu matakari kamumu mua turane huriki a kabukabu. A Hanu Kiripiripi i habi ria na limane mua, ge mua a matakari ne ria. Mu leho manga a matakari na tara na Vure, a Vure i konamule ria pali na darane Tuna.