Apostolo 20:6-28

⁶U emeꞌe Beredi Mene Menoga Auꞌeteꞌe Muiḡa haḡairoteꞌe enogano, Filipi neḡanonoꞌo ḡasio ruhau onamiro, ebu mada fuꞌo (5) ruhau onamadu, Toroa neḡano guhifeꞌeteꞌe azaḡa teite ꞌauḡiro, ebu eꞌea mada fuꞌo zu aheu fare (7) radiro.

⁷Satadei ḡorava uḡano, eme Zuhiꞌa Boro zamareꞌeteꞌe ogomuḡa au tiburanoga veize nuꞌoraro. Eꞌe zamaḡano Pauloꞌa harame onamoo, ohere nemanema reiro. Mazaḡa irarine, muhize iḡuniꞌuma ꞌahine.

⁸Eme hitaga neḡano nuꞌoru radiro. Eꞌe zamaḡanoꞌe ihure ḡehaḡa agane tiro.

⁹U ohoze tahiꞌaḡa ꞌahoga, niḡa Iutikoꞌa marama rana ehore radiunu. Pauloꞌa harame ꞌauꞌaune onamirotene, ani baze rudaro. Baze rudaroteꞌe zamaḡano, ane huga ne hitaga uḡiduḡanonoꞌo uitadu, rahao buaꞌ ovoiro, ebu zeḡeꞌa mae ḡihinirotene, rudanoga horoniro.

¹⁰Rehano Pauloꞌa ovoradu ane rana ḡuḡuriro, ebu afunadu ꞌahige reiro. “Ago zamaroꞌi! Ani ḡaboga!”

¹¹Ebu Paulo ani hitaga neḡa bare itadu, Zuhiꞌa Boro zamareꞌeteꞌe berediḡa zeḡe teite au tiburaro, ebu ḡoere onamo, irarirotene, iḡuniro.

¹²Nuꞌonuꞌo azaḡaꞌe ohoze tahiꞌaḡa ḡabodateꞌe zamahu onamiro, ebu matuꞌu boro haḡairo.

¹³Paulo ani Aso neḡa uꞌa gabao onamiro. U emeꞌe aniꞌa efadu, ḡasi hina ibite eꞌe neḡa onamiro, ebu eme ani eꞌeabuꞌu ḡasio mae ufiꞌuma reiro.

¹⁴Ebu Pauloꞌa Aso neḡano emeḡe teite ꞌauḡirotene, ḡasio ofadu, Mitulene neḡa ruhau onamiro.

¹⁵Eꞌeanoꞌo bare ruhau onamo, irarirotene, Kiosi ꞌumuḡa uhiḡano vitaro. Ebu ruhau onamo, moḡa madaḡano Samosi ꞌumuḡano feuriro. Ebu eꞌe moḡanobuꞌu Mileto neḡano feuriro.

¹⁶ꞌOuge ruhau onamirotaꞌaꞌe, Pauloꞌe Asia habaꞌano madaꞌa hauḡoga mene uratadu, Efeso neḡaꞌe ruhau vitiniꞌuma reiro. Ani uraꞌe, Pentekosi madaḡa ꞌizema mougano, Ierusalema neḡano feuroga radu ḡarihe ḡarihiro.

¹⁷Rehano Mileto neḡano feurirotene, Pauloꞌa Efeso ekalesia vaze boroboro veize ḡoere tuḡuriro, ane vaḡe onaoga raduni.

¹⁸Ze onairotene, Pauloꞌa ḡoreziro, raenaꞌa, “Zae huga edeḡa, eḡeꞌa Asia habaꞌa diuḡiroteꞌe madaḡa ḡadaheḡanonoꞌo onao izidi, mada niduꞌa, zae teite nouge nouge radiunutaꞌaꞌe.

¹⁹E Zuhiꞌa Boro tuḡure haḡaidoteꞌe zamaḡano, vaḡuteꞌenaꞌa zu nihe vuḡa soneꞌenaꞌa gauido. Zu Iuda azaḡa nuꞌa uḡuhihi radu, eḡe mazao haḡai sauꞌa sauꞌa haḡaido rehano, rinede gauido.

²⁰Ebu danaziꞌuma ḡoeꞌa niduꞌa rae furenido, zu hunio ga ane ane neo ihoze ragavido.

²¹Ebu Iuda azaḡa zu Iuda mene azaḡa mazao hari tiba hina daꞌo harame hunido, raenaꞌa, 'Haḡai sauꞌa modadu Badiꞌa vaḡe onamoꞌi, ebu Zuhiꞌa Boro Iesu mazao fioꞌi!'

²²Ebu ḡianoꞌi! Vine Zaḡoḡaniꞌa tuḡutuḡuhadu, Ierusalema neḡa onameꞌohe. Rehano e aḡuꞌa, deꞌea naginiꞌa eḡe mazao fureraꞌuma.

²³Eḡeꞌa ragaveꞌeteꞌe neḡaneḡano Vine Zaḡoḡaniꞌa dehene ihiꞌetaꞌaꞌe, 'Eꞌe ḡuꞌano ohohiꞌuma, ebu aduga hidiꞌuma.'

²⁴Eꞌe ꞌouge ḡabonehe modine zuni idaḡa rehano, Zuhiꞌa Boro Iesuꞌa iniroteꞌe ibiḡa oname hauḡine, zu gauḡa haḡae hauḡine manoḡa. Aꞌe Badiꞌaꞌa manoḡa vaze ḡahuno ziniꞌuma hariḡa manoḡa rae fureneꞌeteꞌe.

²⁵E zae boꞌaḡano Badiꞌaꞌa vaze zuhiꞌaziꞌuma hariḡa harame ragavido. Ḡianoꞌi! Izidi e edeḡa, zae niduꞌa irahe mene bare horoniꞌuma.

²⁶Eꞌanoꞌo eḡeꞌa izidi ꞌada rae fureneꞌohe. Zaeꞌa ḡabone ibiḡa daunine zuni, e mene debahiꞌuma,

²⁷mazaḡa Badiꞌaꞌa zaeꞌa haḡaoga urateꞌeteꞌe ḡoeꞌa niduꞌa rae fureno ziniro.

²⁸Eꞌanoꞌo ḡae ḡaeꞌa ḡae bare duguꞌeꞌenoꞌi, zu ekalesia azaḡa niduꞌa duguzeꞌenoꞌi! Zeꞌe Vine Zaḡoḡaniꞌa ꞌevorezeo tiro, zaeꞌa ḡiazeꞌenoga radu. Ebu mamoe narineꞌeteꞌe teige, Badiꞌa ekalesia azaḡa narizoꞌi! Zeꞌe Badiꞌaꞌa ubuga ru hina meiroteꞌe azaḡa.