Tinavete 20:6-28

⁶meke gami si taluarae pa Pilipae sipu beto sa Inevaṉa Bereti Loke Isitina d. Hola ka lima rane, si la kamoi gami si arini pa Toroasi, meke koa keke vuiki tu vasina si gami.

⁷Koasa rane kekenu koasa vuiki, sipu varigara si gami pude videvidea sa bereti, si tarae va gele se Paula osolae kamoa tu korapa boṉi, sina hiva taluarae si asa pa koivugona.

⁸Soku sari na zuke pu toa koasa lose panaulu, vasina varigara gami.

⁹Meke keke tie vaqura, pozana e Iutikasi, si habotuna pa vuida, meke sipu tarae va gele se Paula, si rorodokia si asa, meke puta muliuṉu. Ke hoqa gore pa pepeso si asa, podalae mae gua pa hatara vina ṉeta si asa. Totoso la ovulu vagia rini, si ele mate tu si asa.

¹⁰Ba gore la opo tamunia meke ṉaza vagia Paula sa tinina, meke zamai sa sarini, “Lopu talotaṉa gamu, ele toa pule si asa,” gua se Paula.

¹¹Beto asa, si sage pule la koasa lose panaulu se Paula, meke la videvidea sa sa bereti meke henahena turaṉa gami. Vari vivinei si gami, osolae kamo rane, meke tiqe taluarae taloa si gami.

¹²Turaṉa pule nia rini se Iutikasi, meke koa tava manoto hola si arini.

¹³Beto asa, si luli kekenu pa vaka si gami, meke la pa Asosi. Vasina tu kote la suraṉia gami se Paula, gua asa sa nana hiniva, sina kote ene karovo la pa Asosi si asa.

¹⁴Meke sipu mae tutuvu gami sa pa Asosi, si suraṉia gami pa vaka si asa, meke hola la pa Maitalini.

¹⁵Taluarae gami vasina, si la kamo tata pa nusa Kiosi pa koivugona. Meke hola keke rane pule, si la kamo pa nusa Samosi si gami, meke pa koivugona pule, si la hogoto si gami pa vasileana Mailitasi.

¹⁶Hiva nia Paula si pude lopu noso pa Episasi, pude lopu oki palae totoso pa popoa Esia; sina bebeno sisigiti si asa pude tuturei la kamoa sa rane Pen'tikosi d pa Zerusalema, be boka, gua.

¹⁷Koa pa Mailitasi se Paula, meke tioko la i sa sari na koimata koasa ekelesia pa Episasi, pude mae tutuvia si asa, gua.

¹⁸Meke sipu kamo rini koasa, si zamai sa sarini, “Ele gilana betoa mia gamu sa qua kinoa koa gamu, podalae pa rane kekenu sapu kamo rau pa Esia.

¹⁹Pa vina pepekae meke pa kolomata si nabulu nia rau sa Baṉara, koari na tinasuna nomadi pu va raza nau rina tie Ziu, sipu kuhana nau rini.

²⁰Gilania mia gamu sapu lopu hite tomea rau koa gamu si keketoṉa, sapu boka tokani gamu koari na qua tinarae na vina tumatumae pa kobi tie, meke totoso hopiki vetuvetu si rau.

²¹Sa qua vina balau si la beto mo koari na tie Ziu, meke na tie Zenitailo, pude madi luara pani sari na dia sinea, meke kekere mae koe Tamasa, meke pude madi va hinokaria se Zisu Karisito sa nada Baṉara.

²²Ego, kamahire he si ta turaṉa koasa Maqomaqo Hope si rau, pude la pa Zerusalema. Meke lopu gilania rau sapu na sa si kote ta evaṉa koa rau vasina.

²³Ba gilania rau sapu koa ri doduru vasileana pu ele kamo la i rau, sa Maqomaqo Hope si ele va balau au, sapu korapa aqa nau sa tinapusi, meke sari na tinasuna pa Zerusalema.

²⁴Sa qua tinoa si namu loke guguana koa rau; ba sa qua ṉati inokoro, si pude va hokotia mo sa tinavete sapu ele poni nau sa Baṉara Zisu pude tavetia. Sa tinavete asa si pude tarae vura nia sa Inavoso Leana tanisa tataru variharupi te Tamasa.

²⁵Meke kamahire si gilania rau, sapu gamu doduru pu ele kamo atu gamu rau, pude tarae nia sa Butubutu Binaṉara te Tamasa, si lopu kaqu dogoro pule au si rau.

²⁶Gua asa, ke maqu tozi va bakalani gamu, sapu arau si via kamahire, be guana keke koa gamu si lopu kamoa sa tinoa hola.

²⁷Ura loketoṉa si tomea rau koasa doduruna sa hiniva te Tamasa, ba ele tarae vura beto nia rau.

²⁸Mi tavetavete guana sepati mamu kopu puleni gamu, meke gua tugo sari doduru tie pu koa koasa puku tie te Tamasa. Ura ta vizata si gamu koasa Maqomaqo Hope pude kopu ni. Mi kopu nia sa ekelesia te Tamasa, sapu ele vagia Sa koasa eharana sa Tuna soti.