Föför 20:6-28

⁶Iwe, äm aia sai seni Filipi mürin ewe Chulapen mongö pilawa esap wor iis lon, nge limu rän mürin aia chufengen me ir lon Troas. Iwe, aia nonom ikenan lon ükükün eu wiik.

⁷Iwe, lekuniolun räninamol äm aia chufengen o mongöfengen ewe mongön ach Samol. Iwe, Paulus a afalafala ekewe aramas, nge a chök sopwela le afalafaleer tori lukenipwin, pun a ekiekin feil seniir sorotän ewe rän.

⁸Mi wor chomong lamp lon ewe ruum asan ia ra chufengen ie.

⁹Eman alüal itan Oitikus a mot lon eu asammwacho. Nge lupwen Paulus a sopwela chök le afalafal, Oitikus a echikichikila o möürüla tori a möürüchoula. Iwe, a turutiu lepwül me won aülüngatin sässärin ewe imw. Nge lupwen ra ekietä, a fen mäla.

¹⁰Nge Paulus a feitiu rer, a chapela won ewe alüal o romi. Iwe, a apasa, “Ousap lolilen, a chüen manau!”

¹¹Mürin a liwinsefälitä won ewe sässärin asan, a utu pilawa o ra mongöfengen me ekewe chon lükü Jesus. Iwe, Paulus a kapas ngeniir tori akkar a tötä, mürin a feil seniir.

¹²Iwe, ra emwenala ewe alüal ngeni lenian, nge a manau. Iwe, ekewe aramas ra fokun chipila.

¹³Iwe, äm aia akomwola won sip o saila tori Assos, ikenan äm aia angei Paulus me ie. Pun Paulus a ürenikem pwe aipwe föri iei usun, pokiten i a mochen fetal won fanü tori Assos.

¹⁴Lupwen a churikem me lon Assos, a tötä rem won ewe wa, o äm aia sai ngeni Mitilene.

¹⁵Äm aia sai seni ikenan o sorotän ewe rän äm aia tori wenewenen Kios. Eu rän mürin aia tori Samos, nge sorotän ewe rän aia tori Miletus.

¹⁶Iwe, Paulus a filätä pwe esap tori Efisos, pwe esap mochen alusala an fansoun lon ewe fanü Asia. Pun a atapwal ngeni an epwe tori Jerusalem lon ewe ränin Pentikost are epwe tufich.

¹⁷Iwe, seni Miletus Paulus a tinala echö toropwe Efisos o tüngor ngeni ekewe souakomwen mwichefel pwe repwe feito o chufengen.

¹⁸Lupwen ra feito ren, Paulus a üreniir, “Ämi oua silei usun manauei me ewe angang üa föri lon unusen ewe fansoun üa nonom remi, seni ewe aeuin rän üa tori ewe fanü Asia.

¹⁹Fän unusen tipetekison pwal fän watten chönün mesei üa föri ai angang usun eman nöün ewe Samol chon angang lon ekewe fansoun weires mi toriei pokiten än ekewe chon Juta rawangauaei.

²⁰Oua silei pwe üsap amwöchü och mine epwe alisikemi lupwen üa afalafalakemi o aiti ngenikemi ewe pworaus usun ewe Samol Jesus lon mwichen aramas pwal lon en me imwan.

²¹Üa apöchöküla ai fön ngeni ekewe chon Juta me ekewe chon lükün Israel, pwe repwe kul seni ar tipis kana o kul ngeni Kot, repwe pwal lükü ach Samol Jesus.

²²Nge iei, pokiten ai aleasochisi ewe Ngünmifel, ngang üpwe feila Jerusalem. Nge üsap silei mine epwe fis ngeniei me ikenan.

²³Üa chök silei pwe lon ekewe telinimw meinisin Ngünmifel a amefi ngeniei pwe üpwe tolong lon fötek me riaföü.

²⁴Nge manauei esap aüchea ngeniei. Üa chök mochen awesala ai kitir o awesöchüela ewe angang ach Samol Jesus a ngeniei pwe üpwe föri. Iei ewe angang ai üpwe pwärätä ewe Pworausen Manau usun ewe ümöümöchün Kot.

²⁵Ngang üa nomfeil leimi o afalafal usun ewe Mwün Kot. Nge iei üa silei, pwe üsap chüen künasefälikemi.

²⁶Iei mine üpwe fokun pwäri ngenikemi ikenai: Are eman leimi epwe pöütmwälila, esap tipisi.

²⁷Pun ngang üa apworausa ngenikemi unusen ekiekin Kot, nge üsap amwöchü och senikemi.

²⁸Iei mine oupwe mamasakemi me unusen chon ewe mwichefel ewe Ngünmifel a atolongeer fän ämi tümwün. Oupwe chon masen ewe mwichefelin Kot, i a möni ren chaan püsin Nöün we.