Aposel 9:3-34

³Eme iy edek eme mirihik ta kon Damaskus le badeh, se nawin bwe, sun lomadan labai anya udu kandrah eme andri awudi iy.

⁴Eme ma iy atarah i andri bada munyak ma ndranyen anuhun sahou aloh i tan anya, “Sol, Sol, buku sah handru ou anya adai jo?”

⁵Eme Sol anya, “Laban, ou are lau badeh?” Eme iy anya, “Jo Jises, na len mari, ou ale anya adai le jo kede-en.

⁶Abo, ou suri ou, ya ou ala bolo kon tinan Damaskus. Ma idah kameh ndramak ari eme, tiye tam ta sasah kameh ou amekes.”

⁷Ya oro lau nane adek hawe Sol doh badeh, boho oro ihis; oro anuhun nyaro boho ndramak, arile oro banyolom ari ndramak bwe.

⁸Sol eme suri iy udu bada munyak eme loken, madan anya kasak badeh, iy banyolom se lakou bwe. Eme iri sirini iy ili Damaskus.

⁹Len taloh badeh, iy winiyan batou kon bwe, iy ba-un gwa ma baimon nyamon bwe.

¹⁰Ya udu Damaskus doh badeh, ndramak ari ta Jises udu aliy, nyaran Ananayas. Ya Laban badeh, asahan ta lele, tiye i tan anya, “Ananayas, ei!” Eme Ananayas anya, “Abo, Laban, jo udu kada-ah.”

¹¹Eme Laban tiye i tan anya, “Ou ales ala asiu ta Judas udu loboho nadu san iri aloh San Ales Le. Ya ou ndremenya oro ta ndramak ari badu Tasus, nyaran Sol. Iy badeh, asolom.

¹²Udu bolo salom ta Sol badeh, iy anyolom ndramak ari nyaran Ananayas udu bolo lele eme, atehei limen i bwele-en ta amekes madan kasak.”

¹³Eme Ananayas anya, “Laban, jo badeh, ndranuhun yoyou ta ndramak badeh, ma ndranuhun sisi-in iy amekes i tiri lau ta Kindrei ado Jerusalem.

¹⁴Iy akohok boto-on badu mine iri tinan tiri pris ta aseu iri lau ala aloh nyaram udu bolo salom tiri.”

¹⁵Arile, Laban tiye i ta Ananayas anya, “Bwe, ou ala! Iy ndramak doh badeh, jo ndralebelei iy ta atiye sahou tek i tiri lau badu leheleh, i tiri kabin tiri ma hawe i tiri lau badu Isra-el.

¹⁶Jo amwenen kameh leheya iy ta iri maha-an ma sisi-in, iy kameh bwese ta nyarak.”

¹⁷Ano Ananayas ili, ma iy ales ili bolo asiu badeh, atehei minen i bwele-e Sol ma iy anya, “Sol ou nadu tine, Laban Jises amwenen suni jo eme hawem; iy le mene adeh asahan hawem udu san ta ou ame dah. Iy suni jo eme dah badeh, ta amekes madam kanyolom kon ja, ma iy aso-ok ou adah na Malawin Ndrabun.”

¹⁸Eme se nawin bwe, lakou i buku none bwisi ni udu madan taku eme len, ma iy anyolom kon ja. Eme iy ales udu loken ma alomwa iy.

¹⁹Ano iy aimon nyamon ma nyamun eme hamon ja. Eme Sol badeh, udu hawe oro lau ta Jises udu Damaskus len solo-an sese.

²⁰Ya eme iy ales ili kon ndrahu tukum tiri Juwis, iy asehek ta nyala Jises badeh, Nadu Kindrei handru.

²¹Eme iri are anuhun iy asehek sahou badeh, mani iri atur anya, “Kede-eh iy ndramak mene udu Jerusalem idi iri lau mene aloh i ta nyaran doh i buku iy asehek kede-eh! Ma iy kede-eh eme ta ateu iri lau kala hawe iri tinan tiri pris ma iri kala bolo kou ai.”

²²Arile, sahou Sol akeh badeh, i nyarahan nyarahan le gwek ma iy asehek sahou aleu handru i tiri Juwis ado Damaskus, ta Jises badeh, Krais handru, Kindrei suni iy eme. Sahou tan bolowani budon tiri Juwis doh, ma bwidi boho iri ihis.

²³Eme udu, udu len solo-an iu badeh, iri Juwis atilik nyala iri ta adi iy kimek. Ya ben len ben len badeh, iri atehei mada iri udu madasan ta kon tinan ta anya kadai iy. Arile, iy badeh, ndrandrei bale iri.

²⁵Ma iri lau tan badeh, andrei iy na ben ma atehei iy i bolo ndrom sahin rahak iu ta malou i san ta mada munu kowah i andri.

²⁶Na len Sol eme Jerusalem badeh, iy anya kili hawe oro lau ta Jises, arile oro mari anoh iy. Ma oro atehei budon anya iy badeh, ndramak badu hawe oro bwe.

²⁷Ndramak ari nyaran Banabas eme badeh, andrei iy, ma uru ala hawe oro aposel. Eme iy asehek nyala oro ta sasah asahan ta Sol na len iy edek ili Damaskus, ya iy anyolom Laban, ma Laban asehek sahou i tan. Ma asehek i toro ta iy udu Damaskus badeh, iy banoh ta asehek sahou, ta nyala nyara Jises nyarahan labai bwe.

²⁸Ma eme Sol udu hawe oro edek ili eme bolo Jerusalem atiye sahou nyarahan nyarahan ta nyara Laban.

²⁹Iy asehek sahou ma hawe andres oro lau badu Juwis nane asehek boho Grik, arile oro anya kadai iy kimek.

³⁰Eme iri lau ta Jises ado doh anuhun badeh, iri kuhi Sol ili Sesariya ma suni iy iu ili kon Tasus.

³¹Ano iri lau ta budon handru badu loboho Judiya, Galili hawe Samariya sekesek handru ta iri babwese isi ja bwe. Iri badeh, abadok ma ales boto-on na boto-on ta Malawin Ndrabun. Ma eme, kane iri i sola ma iri anoh Kindrei, eme ma iri atudun iy.

³²Udu bolo tekedek ta Pita ili eme bolo kon munyak doh badeh, ma iy ili selesen oro lau ta Kindrei an kon Lida.

³³Iy ili badeh, ndruni ndramak ari nyaran Aneyas, badan mari imek. Iy in le bada sau andrei jaha ma ndru la-uh.

³⁴Eme Pita tiye i ta Aneyas anya, “Jises Krais ndramesekei ou ndramwenen. Ou suri ou, ma ou lukumwi kin tam.” Eme, se nawin bwe, iy suri iy eme loken.