Aposol 9:3-34

³Motong la Saolo tani in imadit a iyege Yerusalem, inbe ila pang Damaskas. Ngan ye kene yo ipa a ila potai pang Damaskas ye in nga, ngan le pattu leu in be so ben sul nunngana ilolo ye malala ke Maro a isi pang ye, le si iwakaii.

⁴Motong la imol du tana, inbe ilongo tool atu kalngana iwete panga nen, “Saolo, Saolo, nga yelei a be kugarungau nga?”

⁵Saolo ilongo tool tani in kalngana iwete panga nen nga, motong la iyei ne, “Tool Mai, ngan in ong sei?” Motong la se tool tani iyei ne, “I au Yesu tani yo be kugarungau i, in naii.

⁶Le nookoot nga kumadit a kupa le la pombe ye malala mai. Ngan la be ole tool atu iwete pong ye so yo be kuyeii i.”

⁷Di tooltool tina yo tiye Saolo tila nga, ngan tilongo tool kalngana yo iwetewete nga, bong tikamata touo tool sa kanono tiap, le sila tikodo be koodi danganga leu.

⁸Motong la Saolo imadit lo ikodo a be matan rere, bong ngan matan todotodo le ke be ikamata ni ye tiap. Motong la di tooltool ki yo iye di tipa nga, ngan titoko baene inbe tirara a tila le la pombe Damaskas nga.

⁹Ngan ila iyepe Damaskas nga, ngan matana tina ngan todotodo go le iyepe nen ye ke tol, inbe ikan so le iyin ran tiap lapau.

¹⁰Ngan Yesu galiunu atu yo ene Annias i, in iyepe la Damaskas ngo. Le nga ye mianga ki ngan ilongo Tool Mai be ipootoo ene, inbe koonoo panga nen, “Annias.” Ngan se Annias tani in iraua betanga ki nen, “Tool Mai, au naii.”

¹¹Motong la Tool Mai tani in iwete panga nen, “Kumadit a kutoo dada yo tiwete ene ye Dada Dundunngana i a kula pang rumu ke Yuta. Ngan kupa le la pombe ye rumu ki nga, ngan kutor ye tool atu ke malala mai Tasas, yo ene Saolo i. Nookoot nga ya la ipatarau a iyepe ni.

¹²Ngan Saolo tani in ye mianga ki nga, ngan ikamata tool atu yo ene Annias i, in ya la be iman a ilo ye rumu lono lo itara baene lo pono, a be nen ngan ikamata ni mulu i.”

¹³Ngan Annias tani in Tool Mai iwete panga nen ye mianga, motong la iraua betanga ki nen, “Atoo, Tool Mai, di tooltool alunu kaiye la tiwete pau ye tool tani, inbe ye dada dook tiap ki matana matana yo iyei pang di tooltool kiong yo tiyepe Yerusalem nga.

¹⁴Inbe alongo betanga san mulu nen, be di tooltool maimai ke paroranga so pang Maro ngan timalum panga be iman nanga, a be nen ngan man iparama di tooltool le imot yo tisung inbe tipatarau ye em a tiyepe ni nga.”

¹⁵Bong ngan Tool Mai iwete panga nen, “Tiap! Ole kula la kuyei so yo ben awete pong ye nga, yesoo tool tani ni apootoo be iyei urata kiau, a be nen ngan ikaua betanga kiau la iweteweta pang di tooltool yo tipa ye rara kidi Yuda tiap nga, ngan tiye di tooltool kuto maimai kidi yo matadi kala di nga, inbe pang di tooltool yo ke Isrel nga, ngan lapau.

¹⁶Inbe urata moonoo masngana alunu yo be isolo ye au ek nga, ngan au tauk ole apatnai panga.”

¹⁷Tool Mai iwete panga nen, motong la Annias imadit a ila pang ye rumu yo Saolo tani in iyepe ye, ngan le ipa so le ilo rumu lono lo ipuske. Motong la ipaloko baene lo Saolo pono, inbe iwete panga nen, “Ai, took Saolo! Tool Mai Yesu yo kaman dada ngan pombe pang yong i, in ya la iwangau a aman pang yong i, a be nen ngan kumata ni mulu, inbe ole Maro Amunu Silene ipaponong.”

¹⁸Annias tani in iwete pang Saolo nen a imot, le tina pattu leu inbe so ben soko kooloonoo nga igoolook ye Saolo matana a imol du tana, inbe ikamata ni mulu. Motong la imadit tina ngan le tirriuu ye ran,

¹⁹inbe ikan so a tinini gurana mulu nga. Saolo tani in iye Yesu di galiunu tiyepe ye ke alunu la Damaskas ngo.

²⁰Motong la imadit tina ngan le ilo rumu kidi Yuda ke gaongo tina atu atu nga, ngan lono, lo ikodo dama kidi, inbe iwete pang di nen, “Yesu in Maro Natunu.”

²¹Ngan Saolo tani in iwete nen, le di tooltool le imot yo tilongo betanga ki nga, ngan titakrai. Inbe tiyei ne, “Ona, ni tool tani yo igarung di tooltool ke Yerusalem yo tisung inbe tipatarau ye Yesu ene i, in nani, too? Ngan ya in iman ni nga, ngan be man iparama di tooltool tina ben di talnga dikidiki nga, inbe ikap di a tila pang ye di tooltool maimai ke paroranga so pang Maro, too?”

²²Di ngan tiwete nen, bong ngan Maro ipamede Saolo le gurana ki ise le mai san. Ngan nen le iwete a ipagalanga di Yuda yo tiyepe Damaskas ngan lodi dook nen, be Yesu in Kirisi, tool tani yo Maro ipootoo be si ikap di tooltool ki a ipamulu di i. Ngan nen le di Yuda yo tilongo betanga ke Saolo nga, ngan tisere betanga yo be tiweta panga i.

²³Tiyepe le nga ke alunu iman a ila, motong la di Yuda tina tigaua a tiraua betanga be ole tiraumata Saolo a imata.

²⁴Bong ngan Saolo tani in ilongo betanga ben di Yuda tina, ngan tikodokala dada ke koongoo ke malala mai tani in ye ke le bong yo kanakana nga, a nen ngan be tikamata ngan tiraumate le imata.

²⁵Le nga Saolo di galiunu pattu, ngan bong, motong la tikauu a tilo ye koongoo mai yo tikauu le iwakaia malala mai i, in gumono atu. Motong la tiwete panga a iwur ye karei mai atu yo tikooi ye koro in lono, inbe tiwatu ye ooroo a tipadua ye koongoo gumono tani le idu ke diki ke malala mai tani in.

²⁶Saolo idu ke diki, motong la ipa le lo pombe Yerusalem, le nga ikapye be la iwetewete pang Yesu di galiunu a nen ngan iye di tigauagaua. Bong ngan di tooltool tina ngan titara lodi medana ye be ya in iyei Yesu galiunu moolmool tiap, le nga titattadaii.

²⁷Motong la Banabas ikaua Saolo a yaru tila pang ye di aposol tina ke Yesu nga. Ngan tila, motong la Banabas tani in igasa pang di ye Saolo yo itoo dada a be ila pang Damaskas nga, ngan le Tool Mai pombe pang ye, inbe iwetewete panga. Inbe igasa pang di aposol tina ye Saolo yo itattadai di tooltool tiap, bong iwetewete le koon mede a iraia bingi dook mata ye Yesu ene pang di tooltool ke Damaskas nga.

²⁸Ngan nen le Saolo tani in sila iye di aposol tiyepe Yerusalem, inbe iye di tigauagaua dook mata. Inbe ya in itattadai tiap, bong ipa be iwetewete le koon mede a iraia bingi dook mata ke Tool Mai ene pang di tooltool.

²⁹Inbe ila ye di Yuda yo tilongo di Girik koodi nga, ngan la iye di tiwetewete a tiparsu ye betebetanga lapau. Bong ngan le di tooltool tina ngan tikapye be tisere dada yo be tiraumate ye a imata i.

³⁰Le nga ye kene yo Saolo tani in di diene tilongo betanga yo tikapye be tirauu nga, motong la tikauu a tiye tidu malala mai Sisaria du titaru, a be nen ngan idu pang malala mai Tasas.

³¹Ngan nen le di tooltool yo tigaua ye bareme ke Yesu a tiyepe ye tana mai Yudia le Galili inbe Samaria nga, ngan di le imot tiyepe ye lo silene dook mata. Le tool sa yo be igarung di mulu, nga tiap, inbe Maro Amunu Silene ipamede di, le titoo dada dook mata yo ke be tiyepe la Tool Mai parmana nga. Inbe Maro Amunu Silene iyei di tooltool kapala mulu a titara lodi medana le se tiye di tigaua le kinkatingi kidi ilo pang ete.

³²Pita ipa ye ni mai i le imot ye tana mai tani in, le nga kene atu in ipa le du pombe ye malala mai yo ene Lida i. Ngan idu be du matan so di tooltool ke Maro yo tiyepe ye malala mai tani in nga.

³³Ngan le ikamata tool atu yo ene Aingas i. Ya in kene ikap rama le ke be ipa tiap, bong ipas le iken mie pono ki leu ye rai limi be tol oo.

³⁴Pita ikamata, motong la iwete panga nen, “Aingas, nookoot nga ole Yesu Kirisi ikaratong le tinim dook mata mulu. Le kumadit a kuloyo mie kiong i.” Ngan Pita iwete nen, le tina pattu leu inbe Aingas tani in imadit.