1Ahi marakon aya asos babi ndra mwasin le ai. Ahi atanan buku busu doh iri aloh Malta.
2Iri lau badu busu doh amekes kandriyen mwasin labai eme tahi. Ur undruk laba tinan eme andri ma bwidi bolo kon anyala labai. Eme ma iri tabani jih, ano iri luhi ahi marakon ala anyan jih, ta amekes bolo oda ahi ki nyarahan.
3Pol ale atubwa ma atukum ndro-o jih rayah, ta edeu i jih. Jih nyarahani mwak ari udu bolo iri ndro-o jih nane doh, ma iy seselek eme len, ma ini mine Pol.
4Iri lau badu busu doh anyolom mwak sukik udu mine Pol, ma mani iri atur laleyah, ma iri asehek i tiri ari, ari anya, “Sebwe iy ndramak kede-eh ta idi lau nadeh, eme ma mwak ini iy doh! Iy bamak bado ndra bolo ndras bwe, arile kindrei nane ta edeu maha-an i ta lau ta amekes kandriyen ndra-in badeh, bwalen iy ndramak kodo-oh ta udu kon munyak dah nadeh.”
5Arile, Pol toboroyani mwak nane sukik udu minen taku i jih ma minen bisi bwe, ma se ndra batekeu bwe.
6Iri lau marakon ado atondrok ta minen kase, ano iy kataku ma kimek. Arile, iri atondrok luluwen labai ma iri banyolom ari lakou basahan tan bwe, iri ame tubuni budon tiri ma asehek budon tiri anya, “Iy kede-eh ari kindrei!”
7Munyak nane ahi are aliy badeh, ere mirihik ta munyak ta ndreh kabin ta busu doh, nyaran Publiyus. Iy ndreh kabin doh andrei ahi ala asiu tan, ma iy tondrokei ahi udu mwasin labai winiya len taloh.
8Tama Publiyus badeh, ibo sik in andri, badan nyarahan, ma walou ere tan. Pol eme ili bolo asiu hawen, iy asolom iy, iy atehei minen i bwele-en ma nyumuri iy amwenen ja.
9Pol amekes i buku doh, ma iri lau badu busu nane doh ame le hawen, ma iy nyumuri iri amwenen ale.
10Iri lau badu busu doh adeu tahi lakou buku ndramas badeh, solo-an labai, ma ahi anya ka-au badeh, iri adeu nahi lakou buku nyamon ta atondrok ahi are ndron.
11Bun ma taloh badeh, ahi are busu Malta. Ano ahi a bolo ndron ra-ei mene aton ta jor tolau ere busu doh. Ndron doh badeh, badu kon tinan Aleksandriya. Udu no-o ndron badeh, iri torowenei malawi nadu kindrei Sus ma la-uh udu aliy.
12Ahi alakak ala asahan kon tinan Sirakus. Ma len taloh ahi are kon tinan doh.
13Ahi alakak are loboho doh ala asahan kon tinan rakon, iri aloh Regiyum. Na len ari ja badeh, jor atohou udu loboho kum eme, ma na bolo len la-uh le badeh, ahi asahan kon tinan Puteyoli.
14Loboho bolo kon tinan doh, ahi ndruni lau ta Kindrei rayah, iri ame ndremenya ahi kare hawe iri winiya wik ari op. Ano iri ado, ahi adek amwenen au ala kon tinan Rom.
15Iri lau ta Kindrei badu Rom anuhun, buku ahi adek ala, eme iri adek ame mada baen ta Apiyus, ma kon iri aloh Asiu Ma Taloh Ta Amunyau, atondrok ahi are aliy. Pol anyolom iri le badeh, ma iy edeu wurah tinan labai i ta Kindrei, ma bwidi ndrinen sekesek labai.
16Ahi asahan bolo kon tinan Rom badeh, iri lau ta atondrok kon Rom leheyani asiu raem i ta Pol le amwenen udu aliy, ma hawe ndramak ari ta bahun udu hawen ta atondrok iy.
17Pol udu Rom buku len taloh ai, eme ma iy atehei sahou ili tiri tinan tiri Juwis kame ta tukum ari. Iri marakon ndrame ndratukum ndrano, iy eme tiye tiri i buku doh, “Aha nadu tine, jo in hamon ta kandriyen ta tubu taha iri mene. Jo ale bamekes ari lakou ta bolowa iri lau tataha bwe. Arile, iri tawi jo ili bolo asiu lulik udu Jerusalem, ano iri atehei jo ili mine iri Rom.
18Iri lau tinan badu Rom ndremenya jo, ma anuhun sahou tek, ma iri anya katalou jo ki-iu laleyah, tasah iri basilahei ari ndra-in jo amekes ta adai jo kimek bwe.
19Arile, iri Juwis banuhun sahou doh bwe. Eme ma jo ari madasan ja bwe. Jo badeh, anya Sisa kanuhun sahou tek. Arile, bala buku jo anya katehei iri lau tek amwenen ta ari lakou a ta mada sahou bwe.
20Ta katin doh le, eme jo aloh aha marakon ame. Jo anya kanyolom aha, ma kasehek sahou hawe aha. Tasah, jo atehei budon tek mara-ei, ma jo atondrok sahou tandrakan nane taha lau marakon badu Isra-el atondrok kede-eh. Ta idoh le, iri bawei jo na sen dah.”
21Iri Juwis tiye Pol i buku doh, “Ahi bakohok ramen la-ukei badu Judiya eme tahi ta tiye nyalam eme dah bwe. Ma ari ndramak badu Juwis bame basehek tahi, ma amekes sahou rayah ndra-in ewek tam, bwe.
22Arile, nadah, ahi anya kanuhun budon tam le amwenen, tasah ahi tanan, bolo kon mara-ei iri lau amekes sahou ta bobose ili ta lakou nane ha-un asahan bolo taha Juwis kede-eh.”
23Eme iri asan len tiri ta ame hawe Pol, ma iri lau solo-an ame hawe Pol ala asiu nane iy udu aliy. Na mandraben ili ano beyeh an amai, iy asehek i tiri ta nyala tondrok ta Kindrei le ai. Iy asehek tiri ta kandriyen malen ta Moses, ma sahou iri torowenei udu bolo buk tiri propet bwena. Na iri sahou doh, iy anya kamekes budon tiri mari kili ta Jises.
24Eme ma iri lau rayah a-en hamon ta sahou ta Pol. Arile, iri rayah badeh, batehei budon tiri ba-en hamon ta sahou tan bwe.
25Eme ma iri asehek sahou solo-an ta andres ere ndrokowa iri le amwenen, ma iri kadek ka-au. Arile, ma mwena badeh, Pol sihidi sahou randra i tiri i buku doh, “Malawin Ndrabun badeh, asehek sahou handru ili ta tubu taha iri eme boho propet Aisaya. Iy asehek i buku doh:
26‘Ou ala asehek kili tiri lau badu Juwis buku doh: “Aha kameh anuhun sahou san solo-an, arile aha kameh winiya bala tanan kati sahou handru bwe. Aha kameh anyolom san solo-an, arile aha kameh winiyan baseleyani ari lakou bwe.”
27Tasah, budon tiri lau doh badeh, ndrandra-i, ma ndranye iri ndrawoyah ta anuhun iri sahou, ma iri ndratubuluhi mada iri. Kora-on iri kanyolom iri lakou, ma kanuhun iri sahou, ma iri katanan kati sahou handru, ma iri katubuni ndrine iri, ma kame hawek, ma jo kameh bwidi iri asahan mwasin ja.’”
28Ma Pol isan sahou tan ta ano i buku doh, “Buku aha ndratanan, sahou dah ta lahou mwasin Kindrei amekes ta akohok taha ame hamon ja, badeh, Kindrei ndratehei ndra-au ndrala tiri lau badu kon leheleh. Iri kameh winiya anuhun amwenen!”
30Jaha ma la-uh badeh, Pol ere le asiu iy sihinei ta iy udu aliy. Iy sekesek labai ta iri lau ame manyah hawen.
31Iy banoh bwe ta asehek nyala tondrok ta Kindrei i tiri, ma iy leheya iri ta sohowa Laban Jises Krais.
