Wiawia 9:3-34

³A ni a sapasapal kokola koren iong Damaskus, marain eu kodido sang nanlang, sereda i.

⁴Ni a pupedi nani pwel, ap rongada ngil eu, me masani ong i: Saul, Saul, da me koe kame kin ia?

⁵A ap inda: Is komui Maing? A kotin masani: Ngai Iesus, me koe kin kame.

⁶Paurida, kolang nan kanim en, nan a pan loki ong uk, me koe en wiada.

⁷A ol oko, me iang i kokola, sapaimokid, pwe re rongadar ngil o, ap sota amen me re kilangadar.

⁸Saulus paurida sang nan pwel, mas a papad eta, ap sota kilang meamen. A re kolokol pa a, kalualang i Damaskus.

⁹I ari sota kilang wasa pong sili pong. A so kang de nim meakot.

¹⁰A tounpadak amen mi Damaskus, ad a Ananias me Kaun o kotin masani ong ni kasansal eu: Ananias! I ari potoan ong: Iet ngai Maing!

¹¹Kaun o ap kotin masani ong i: Paurida kowei ong nani al o, me ad a Inen, ap idok nan im en Iudas amen, me mar a Saulus en Tarsus. Pwe kilang, a kapakap

¹²A kilanger ol amen ni kasansal eu, me ad a Ananias, me ko dong i o pwil poa pa a kan, pwe a en kilangki wasa.

¹³A Ananias potoan ong: Maing, i rongadar ren aramas toto duen ol men et, duen a kin kaokaoe sapwilim ar saraui kan, me mi Ierusalem.

¹⁴O a aleer sang ren samero lapalap akan manaman, en saliedi karos, me kin likwir ong mar omui.

¹⁵A Kaun o kotin masani ong i: U kowei, pwe iei ol o, me I piladar, en wala mar ai ren men liki o nanmarki kan o men Israel.

¹⁶Pwe I pan kasansale ong i duen won a pan kamekameki mar ai.

¹⁷Ananias ari kola, pedelong ong nan im o, pwil poa pa a pokon, indada: Ri (ai) Saul, Kaun o me kotin porone ia do; iei Iesus, me kotin pwara dong komui nani al o ni omui kokodo, pwe komui en kilangada wasa o dire kila Ngen saraui.

¹⁸A madang likamata un en mam akai, me pupedi sang ni mas a, i ari kilangadar wasa o udar paptaiselar.

¹⁹I lao mangaer, ap kelailadar, ap mimieta ren tounpadak en Damaskus akan ran akai.

²⁰A madang padapadak nan sinakoke kan duen Iesus, me i sapwilim en Kot.

²¹A karos, me rongerong i, puriamui kila indada: Kaidin i, me kin kaokaoe ir, me kin likwir ong mar wet nan Ierusalem o kodo wasa et, pwen sali ir edi, kalua ren samero lapalap akan?

²²A Saulus me manaman kokoda o kapingada Sus oko, me kauson Damaskus ni a kawewedar, me i me Kristus.

²³Kadekadeo murin ran toto Sus oko kapung pena en kamela i.

²⁴A Saulus ronger, me re masamasan i; irail pil masamasan wanim akan ni ran o ni pong, pwen kamela i.

²⁵A tounpadak kan ale i ni pong apiekidi kopou eu sang pon kel o.

²⁶A Saulus lao pwara dong Ierusalem a sosong waroki ong tounpadak kan, irail karos masak i, pwe irail sota kamelele, me i tounpadak amen.

²⁷A Parnapas ale i o kare dong i ren wanporon akan, o katiti ong irail, duen a kilangadar Kaun o nani al o, o me a kotin masani ong i, o duen a so masak padapadaki ni mar en Iesus nan Damaskus.

²⁸I ari iang irail er kotin pedepedoi sang o pedepedelong ong nan Ierusalem o padaki aima ni mar en Kaun o.

²⁹I o men Krik kai masan o akamai pena, a re song kamela i.

³⁰Saulang kan lao asaer, ap iang i kolang Säsarea, ap kadaralang i Taris.

³¹A momodisou kan ap popol o pwaidar nan Iudäa, o Kaliläa, o Samaria, o re weweid ni masak en Kaun o, o toto kilar popol en Ngen saraui.

³²A Petrus lao kakan sili nan sap akan, a pil kotila ren me saraui kan, me kaukauson Lida.

³³A diaradar aramas amen wasa o, me ad a Äneas, me wonon par walu, pwe me kokon dangidang.

³⁴Petrus ari masani ong i: Äneas. Iesus Kristus kakel uk ada. Paurida, pein lim pena ki om! I ari paurida madang.