Hechos 9:3-34

³Chin zeezah raꞌ ba loh neziuh nin zee para guihdxyi Damascu, gahxula zeꞌgadzihn raꞌ ba riꞌchi chin baziaꞌñihyaaꞌ tuhbi bwehla desde llaaꞌndxibaaꞌ baziaꞌñihin gaduhbi hasta zeꞌzah Saulu, chiꞌchi biaaba Saulu loh yuh,

⁴ya gaduhbi naꞌ ba loh yuh bihn dxiahga ba tuhbi rsiaaꞌ nin rahbi: ―Saulu, Saulu, ¿xi naa caꞌhnnaꞌhla luꞌh naꞌh?

⁵Chiꞌchi rahbi Saulu: ―¿Chyu yiꞌh daada? Chiꞌchi rahbi rsiaaꞌ chi: ―Naꞌh naan Jesucristu nin cagasaꞌcazii luꞌh, per yiꞌh gahca cayuhnn luꞌh mahla yiꞌh ziga tuhbi maan chin rguꞌñaaꞌ ma yihca puuhyi.

⁶Bidxyihbi duxa Saulu, chiꞌchi rahbi ba: ―Daada, ¿xi niꞌca xclaaꞌdzi luꞌh gaca? Chiꞌchi rahbi Jesucristu loh Saulu: ―Gwastii tin gwah guihdxyi Damascu, ya riꞌchi zuluuꞌyi tuhbi ndxiꞌhw xi niꞌca guunn luꞌh.

⁷Ya bwiinn raꞌ nin zeꞌnee laꞌh Saulu bidxyihbi duxa raꞌ ba chin bihn raꞌ ba rsiaaꞌ chi per ruutiiꞌ chyu bwaꞌha raꞌ ba.

⁸Chin gwastii Saulu loh yuh, bwiꞌhnn ba pur ñwaꞌha ba per ayi gunnah loh ba ñiinan, chiꞌchi gucaꞌha raꞌ bwiinn nin zeꞌnee laꞌh Saulu naa ba tin zeꞌnee raꞌ ba laꞌh ba laꞌn guihdxyi Damascu.

⁹Riꞌchi guyuuꞌ ba chohnna dxyih, ayi guhca ñwaꞌha ba nin ayiza gwaaꞌ ba ñihsa cun ayiza gudahw ba.

¹⁰Ya guihdxyi Damascu nuu tuhbi xpwiinn Jesucristu nin laa Ananías. Bwiinn chi baluuꞌyiloh Jesucristu loh ba, chiꞌchi rahbi Ñiꞌh loh ba: ―¡Ananías! ¿Cuun luꞌh? Chiꞌchi rahbi Ananías loh Ñiꞌh: ―Laꞌn deeꞌ, daada.

¹¹Chiꞌchi rahbi Jesucristu loh ba: ―Gwah cahyi nin laa lahdu derehchu hasta nuu yihdzi Judas. Riꞌchi gunaabadxyiꞌdxyi laꞌh tuhbi bwiinn nin laa Saulu nin naa tuhbi bwiinn guihdxyi Tarsu. Bwiinn chi cabwihdxi-canaaba ba naꞌh ―rahbi Ñiꞌh loh Ananías―.

¹²Ya loh bacaala bwaꞌha ba zeꞌ tuhbi ndxiꞌhw nin laa Ananías tin gudziiꞌba naa Ananías yihca Saulu tin gwaꞌha ba stuhbweelta.

¹³Chin guyaꞌloh bihn Ananías dxyiꞌdxyi raꞌ riiꞌ, chiꞌchi rahbi ba: ―Per Daada, ziahanroo bwiinn nnah cuun nin cayuhnn ndxiꞌhw chi nugasaꞌcazii ba xpwiinn raꞌ luꞌh nin riachiistoꞌ ñiꞌh xchiꞌdxyi luꞌh loh guihdxyi Jerusalehn,

¹⁴yannah riiꞌ zeꞌ ba cun xquelrnabwaꞌ bixohza raꞌ nin mahzi rnabwaꞌ tin guinaꞌzu ba bwiinn raꞌ nin rbwihdxyi-rnaaba lah Yuꞌbiluꞌh tin chenee ba laꞌh raꞌ ba dxieꞌw raꞌ ba guihdxyi Jerusalehn.

¹⁵Chiꞌchi rahbi Jesucristu loh Ananías: ―Gwah; Naꞌh guliin ba tin guiñiꞌ ba xchiꞌdxyiꞌhn chezahnee ban loh raꞌ bwiinnziitu cun neezaa loh raꞌ rrehyi cun loh raꞌ bwiinn Israel.

¹⁶Naꞌh guluuꞌyiꞌhn laꞌh Saulu cuun trabahjw duxa nin gutiꞌdxiloh ba pur Naꞌh.

¹⁷Ya zee chiꞌh Ananías, lwehgu chin badzihn ba rwaaꞌ yuuꞌ hasta nuu Saulu, chiꞌchi badziiꞌba naa ba yihca Saulu, chiꞌchi rahbi Ananías loh Saulu: ―Bwihtsi Saulu, Jesucristu nin guñiꞌ loh luꞌh loh neziuh chin zeꞌ luꞌh, laꞌh gahca Ñiꞌh guxeꞌhla Ñiꞌh naꞌh tin gabiaꞌgarii gwaꞌha luꞌh stuhbweelta tin cwih laaꞌdziza Spíritu Saantu xteenn Dxiohs laꞌn lastoꞌ luꞌh.

¹⁸Ya lwehgu biaaba raꞌ ziga mweeyi nin nu dihtsi bwehlda loh Saulu, chiꞌchiyi guhca bwaꞌha zaꞌca ba stuhbweelta. Seguihdu gahca za gwasuꞌnchii Saulu tin guroꞌbañihsa ba.

¹⁹Ya chiꞌchi gudahw ba tin bacaꞌha ba jweersi stuhbweelta, ya guyuuꞌnee ru Saulu laꞌh raꞌ xpwiinn Jesucristu spaaldaa dxyih guihdxyi Damascu.

²⁰Seguihdu guzoꞌbaloh baluuꞌyi Saulu xchiꞌdxyi Jesucristu laꞌn guidoꞌ raꞌ, rahbi ba: ―Jesucristu naa Lliiꞌn Dxiohs nin nuu dxibaaꞌ.

²¹Garaa raꞌ nin bacaꞌdxiahga dxyiꞌdxyi raꞌ nin guñiꞌ Saulu, rahbi loh lasaaꞌ raꞌ ba: ―¿Tayi laꞌhdxiꞌh ndxiꞌhw riiꞌ nin rusieꞌw laꞌh raꞌ xpwiinn Jesucristu laꞌn lahtsi dxiꞌba guihdxyi Jerusalehn? ¿Tayi laꞌh gahcadxiꞌh ba nin nnaa tu badzihn riiꞌ chenee laꞌh raꞌ xpwiinn Jesucristu prehsu loh raꞌ bixohza nin rnabwaꞌ guihdxyi Jerusalehn?

²²Per Saulu cun mahziru zeezah cayahcanasiin ba pur xcweenta xchiꞌdxyi Dxiohs hasta basacahyi ba laꞌh raꞌ bwiinn Israel nin rii Damascu laasii baluuꞌyi ba guchiipaꞌhcaa Jesuhs nin zeꞌ guihdxyi Nazaret naa Crixtu.

²³Gudiiꞌdxi ziahan dxyih, chiꞌchi batiaaꞌha lasaaꞌ raꞌ bwiinn Israel nin rii loh guihdxyi Damascu, tin gadxiinn raꞌ ba laꞌh Saulu,

²⁴per guhcabwaꞌ Saulu xi lligaaba nuu raꞌ ba, dxyih-nagueꞌla riibweeza raꞌ ba laꞌh Saulu garaa raꞌ rwaaꞌ neziuh raꞌ nin radzihn guihdxyi Damascu tin dela guigaꞌha Saulu loh neziuh raꞌ chi gadxiinn raꞌ ba laꞌh Saulu.

²⁵Chiꞌchi guhcanee raꞌ xpwiinn Jesucristu laꞌh Saulu guyuuꞌ ba laꞌn tuhbi tiipi tin laꞌn gueꞌla batehta raꞌ ba tiipi chi tihxi tuhbi muru dxiah nin nuu rwaaꞌ guihdxyi Damascu chi, ya ziꞌchizi guhca gahn gulaꞌh Saulu loh raꞌ bwiinn Israel raꞌ chi.

²⁶Chin badzihn Saulu guihdxyi Jerusalehn, guclaaꞌdzi ba gadxaꞌga ba loh raꞌ xpwiinn Jesucristu nin riachii stoꞌ raꞌ ñiꞌh xchiꞌdxyi Ñiꞌh, ya garaa raꞌ ba bidxyihbi duxa raꞌ ba laꞌh Saulu coma ayi gaann raꞌ ba biahca ba tuhbi xpwiinn Jesucristu.

²⁷Ya Bernabehyi gwanee laꞌh Saulu loh raꞌ pooxtla tin guhdzi Bernabeh loh raꞌ ba: ―Baluuꞌyiloh Jesucristu loh neziuh guñiꞌnee Xtaada Jesucristu nuꞌh laꞌh Saulu loh nezyuh, niꞌchin nin bwiꞌhnn Ñiꞌh cumpahñu laꞌh Saulu tin guñiꞌ bi xchiꞌdxyi Ñiꞌh laꞌn guidoꞌ Damascu.

²⁸Chiꞌchi nezii neziꞌchi caꞌnzahnee Saulu laꞌh raꞌ ba loh guihdxyi Jerusalehn, ya ayi bidxyihbitiiꞌ Saulu gwazah guñiꞌ ba pur xcweenta lah Jesucristu.

²⁹Ya bwiiꞌyidxyiꞌdxyi Saulu xchiꞌdxyi Jesucristu loh raꞌ bwiinn Israel nin rñiꞌ dxyiꞌdxyi griehgu, tin chechii za stoꞌ raꞌ ba Jesuhs naa Crixtu, per xlawaaꞌha ñachiistoꞌ raꞌ ba mejor rdxyiꞌchi duxa raꞌ ba ya xclaaꞌdzi raꞌ ba ñidxiinn raꞌ ba laꞌh Saulu.

³⁰Chin guhcabwaꞌ raꞌ xpwiinn Jesucristu ziꞌchi lwehgu gwanee raꞌ ba laꞌh Saulu guihdxyi Cesarea, ya seguihdu guyuuꞌnehza ba para lahdxyi ba nin naa guihdxyi Tarsu.

³¹Ya chiꞌchiyi babwih nasaa raꞌ xpwiinn Jesucristu nin nuu raꞌ regiohn Judea, Galilea, nee neezaa Samaria laasii ayiru guicaꞌhnnaꞌhla Saulu laꞌh raꞌ ba. Ya ziꞌchizi dxyih cun dxyih cayahcanee Spíritu Saantu gudahla duxa raꞌ bwiinn nin gwachii stoꞌ raꞌñiꞌh xchiꞌdxyi Jesucristu nee neezaa zeezahdziꞌtsi raꞌ ba loh dxyiꞌdxyi chi nee neezaa nabahannee raꞌ ba laꞌn lastoꞌ raꞌ ba guelnadxyiꞌbii xteenn Dxiohs laasii mahziru rdxyihbi raꞌ ba loh Dxiohs que no bwiinn guidxyiyuh.

³²Ya chin guzohbaloh gwaguiaꞌha Pehdru laꞌh garaa raꞌ nin naa xpwiinn Jesucristu garaa lahta raꞌ cun neezaa bwiinn Lida nin naa ru xpwiinn Dxiohs,

³³riꞌchi bidxeela tuhbi ndxiꞌhw nin laa Eneas. Ndxiꞌhw chi guhca xuhnna yihza naꞌ ba cayahcalluꞌhu ñaaꞌ ba, balluhnga tihxi ba,

³⁴chiꞌchi rahbi Pehdru loh Eneas: ―Eneas, cagasiaca Jesucristu yiꞌh. Gwastii, guteesa xtaaꞌ luꞌh. Hohr chi gahca biaaca ba ya lwehgu gwastiitiiꞌ ba,