تَرُشُي 9:3-34

³عَ نَ مَكْرّقٍ دَ مَسِ رَ، يَنبّ نَشَ مِنِ عَ مَ كٍلِ كٌورٍ مَ، عَ عَ رَبِلِن.

⁴عَ نَشَ بِرَ بْشِ مَ، عَ نَشَ شُي ندٍ مّ، «سْلُ، سْلُ، عِ نَ ﭑ حَشَنكَتَقٍ مُنقٍ رَ؟»

⁵سْلُ نَشَ عَ يَابِ، «مَرِفِ، ندٍ عِ رَ؟» عَ نَشَ عَ يَابِ، «عِسَ نَن ﭑ نَ، عِ نَشَن حَشَنكَتَقٍ.

⁶كٍلِ، سٌ تَا كُي، عٍ قَمَ عَ قَلَدٍ عِ بّ عَ لَنمَ عِ شَ نَشَن نَبَ.»

⁷شّمّيٍ نَشٍيٍ نُ عَ قْشْ رَ، نٍيٍ دّ نَشَ بٌبٌ عَ رَ فَاشُي بّ. عٍ نُ شُي مّمَ، كْنْ عٍ مُ نُ مِشِ يٌ تٌمَ.

⁸سْلُ نَشَ كٍلِ بْشِ مَ، عَ يَ رَبِشِ، كْنْ عَ يَ مُ سٍ تٌمَ. عٍ نَشَ عَ بّلّشّ سُشُ، عٍ عَ مَتِ دَ مَسِ.

⁹عَ نَشَ لُ شِ سَشَن عَ مُ سٍسٍ تٌ، عَ مُ سٍسٍ دٌن، عَ مُ سٍسٍ مِن.

¹⁰عِسَ قْشِرَبِرّ ندٍ نُ نَ دَ مَسِ، نَشَن شِلِ عَنَنِيَسِ. مَرِفِ نَشَ عَ شِلِ لَامَتُنيِ كُي، «عَنَنِيَسِ!» عَنَنِيَسِ نَشَ عَ رَتِن، «مَرِفِ، ﭑ تَن نَن يَ.»

¹¹مَرِفِ نَشَ عَ قَلَ عَ بّ، «كٍلِ، سِفَ كِرَ رَ نَشَن شِلِ ‹كِرَ تِنشِنشِ›، عِ شَ شّمّ قٍن يُدَ سِ شَ بَنشِ كُي، نَشَن شِلِ سْلُ تَرِ سٍكَ. عَ نَ عَلَ مَشَندِقٍ.

¹²عَ بَرَ مِشِ ندٍ تٌ لَامَتُنيِ كُي، نَشَن شِلِ عَنَنِيَسِ، عَ نَ عَ بّلّشّ سَقٍ عَ مَ عَلَكٌ عَ مَن شَ سٍ تٌ.»

¹³عَنَنِيَسِ نَشَ عَ يَابِ، «مَرِفِ، ﭑ بَرَ يِ شّمّ شَ قٍ مّ مِشِ وُيَشِ رَ، عَ بَرَ قٍ كٌبِ نَشَن نَبَ عِ شَ مِشِ سّنِيّنشِيٍ رَ دَرِ سَلَمُ.

¹⁴سّرّشّدُبّ كُنتِفِيٍ بَرَ نْي سٌ عَ يِ رَ، عَ شَ بِرِن سُشُ نَشٍيٍ عِ شِلِ مَشَندِ مَ.»

¹⁵كْنْ مَرِفِ نَشَ عَنَنِيَسِ يَابِ، «سِفَ، بَرِ مَ ﭑ بَرَ يِ شّمّ سُفَندِ شّيرَ رَ، عَ شَ ﭑ شِلِ مَسٍن سِ بِرِن بّ، عٍ شَ مَنفّيٍ بّ، عَ نُن عِسِرَيِلَ دِيٍ بِرِن بّ.

¹⁶ﭑ عَ مَسٍنمَ نّ عَ بّ، عَ قَمَ تْورْدٍ كِ نَشّ ﭑ شِلِ شَ قٍ رَ.»

¹⁷عَنَنِيَسِ نَشَ سِفَ نَ بَنشِ. عَ تٌ سٌ، عَ نَشَ عَ بّلّشّ سَ سْلُ مَ. عَ نَشَ عَ قَلَ عَ بّ، «ﭑ نفَشَكٍرٍنيِ سْلُ، مَرِفِ عِسَ نَشَن مِنِ عِ مَ كِرَ رَ، عَ تَن نَن ﭑ شّيشِ عِ مَ، عَلَكٌ عِ شَ سٍ تٌ، عِ مَن شَ عَلَ شَشِلِ سّنِيّنشِ سْتْ.»

¹⁸سٍ ندٍ نَشَ بَ عَ يَ مَ كٍرٍن نَ عَلْ شَلٍيٍ، عَ يَ نَشَ سٍ تٌ. عَ نَشَ كٍلِ، عَ قَ عَ شُنشَ يٍ شْورَ.

¹⁹نَ شَنبِ عَ نَشَ عَ دّفٍ، عَ قَ سّنبّ سْتْ. سْلُ نَشَ سَشَنيِ رَبَ دَ مَسِ عَ نُن عِسَ قْشِرَبِرّيٍ.

²⁰عَ نَشَ بْنبْ كَوَندِ تِقٍ رَ كٍرٍن نَ سَلِدٍيٍ كُي عَ نُ عَ مَسٍن عَ عَلَ شَ دِ نَن لَنشِ عِسَ مَ.

²¹نَشٍيٍ بِرِن عَ شُي مّ، عٍ دّ نَشَ عِشَرَ. عٍ نَشَ عَ قَلَ، «يِ شّمّ شَ مُ نُ مِشِيٍ حَشَنكَتَمَ دَرِ سَلَمُ، نَشٍيٍ نُ مَشَندِ تِمَ عِسَ شِلِ رَ؟ عَ مُ قَشِ شّ بٍ، عَ شَ عٍ شَنِن عٍ شِرِشِ رَ سّرّشّدُبّ كُنتِفِيٍ شْن؟»

²²سْلُ نَشَ سّنبّ سْتْ. عَ شَ مَسٍنيِ نَشَ دَ مَسِ يُوِقِيٍ عِقُ، عَ قَلَقٍ عَ عِسَ نَن لَنشِ عَلَ شَ مِشِ سُفَندِشِ مَ.

²³تّمُي ندٍ تٌ دَنفِ، يُوِقِيٍ نَشَ لَن عَ مَ عٍ شَ سْلُ قَشَ.

²⁴سْلُ نَشَ عٍ شَ فُندٌ كٌلٌن. عٍ نُ تَا سٌدٍ دّ كَنتَمَ كْي نُن يَنيِ عَلَكٌ عٍ شَ عَ قَشَ.

²⁵كْنْ كْي ندٍ رَ، عِسَ قْشِرَبِرّيٍ نَشَ عَ رَفٌرٌ تّتّ قَرِ مَ سَفَ كُي.

²⁶سْلُ تٌ سِفَ دَرِ سَلَمُ، عَ نَشَ وَ بٌنِقٍ عِسَ قْشِرَبِرّيٍ رَ، كْنْ عٍ بِرِن نُ فَاشُشِ عَ يَ رَ. عٍ مُ نُ لَشِ عَ رَ شَ عِسَ قْشِرَبِرّ نَن يَتِ عَ رَ.

²⁷عَوَ، بَرَنَبَسِ نَشَ عَ شَنِن شّيرَيٍ شْن. عَ نَشَ عَ تَفِ رَبَ عٍ بّ سْلُ مَرِفِ تٌشِ كِ نَشّ، عَ مَن عَ شُي مّشِ كِرَ رَ كِ نَشّ. عَ نَشَ عَ مَسٍن عٍ بّ سْلُ بَرَ كَوَندِ نَشَن نَبَ عِسَ شِلِ رَ دَ مَسِ تَا كُي.

²⁸عٍ بِرِن نَشَ دْشْ يِرٍ كٍرٍن دَرِ سَلَمُ. سْلُ نُ مَرِفِ شِلِ كَوَندِ مَ سّنبّ رَ.

²⁹عٍ نُن يُوِقِيٍ قَن نَشَ وْيّن عٍ نُ شْرْشْ، يُوِقِ نَشٍيٍ فِرّكِ شُي قَلَمَ، كْنْ نٍيٍ نُ كَتَقٍ عٍ شَ سْلُ قَشَ.

³⁰عَ نفَشَكٍرٍنيِ عِسَيَنكَيٍ تٌ نَ قٍ مّ، عٍ نَشَ عَ شَنِن سٍسَرٍ، عٍ قَ عَ رَ سِفَ تَرِ سٍ.

³¹دَنشَنِيَتْي حَمَ نَشَ لُ بْحّسَ كُي يُدَيَ، فَلِلٍ، نُن سَمَرِ بْشِ بِرِن مَ. عٍ نُ لُمَ عٍ بٌرٍ رَلِمَنِيَ رَ، عٍ نُ عٍ حّرّ مَرِفِ شَ يَرَفَاشُي كُي. عٍ شُن نُ مَسَمَ عَلَ شَشِلِ سّنِيّنشِ سَابُي رَ.

³²ثِيّرِ تٌ نُ بْشِ عِحّرّ مَ، عَ نَشَ فٌرٌ سّنِيّنتْييٍ يِرٍ لِدَ.

³³عَ نَشَ شّمّ نَمَتَشِ ندٍ لِ نَا، نَشَن شِلِ عٍنٍ، عَ نُ سَشِ سَدٍ مَ كَبِ حّ سٌلٌمَسَشَن.

³⁴ثِيّرِ نَشَ عَ قَلَ عَ بّ، «عٍنٍ، عِسَ عَلَ شَ مِشِ سُفَندِشِ بَرَ عِ رَيَلَن. كٍلِ، عِ عِ شَ سَدٍ يَءِلَن.» عَ نَشَ كٍلِ كٍرٍن نَ.