Loc Hechos 9:3-34

³Mei naɨ iodo jailla llezica, Damasco jófuemo áɨnozidemo, monámona bite úzefo nágafene ie abɨmo úzere egáiñocaide.

⁴Iemona Saulo énɨemo baɨíde; baɨílla llezica Jesús íena dáɨnana cacade: —Saulo, Saulo, ¿nɨbái mei cue racádɨo? —daɨde.

⁵Mei jira Saulo uai otá jɨcánote: —Ocuíraɨma, mei o ¿búdɨo? —daɨde. Jira aféuai ote: —Cue Jesúdɨcue. Dama o racácamɨedɨcue. Aillue juráreto zaitáacademo jáiredɨzɨmo jiide. Afe izói ízitagamɨedɨo.

⁶Mei íemona Saulo jágɨeri cuidɨde; daɨde: —Ocuíraɨma, ¿ona nɨe izói fɨnóredɨcue? —daɨde. Jira Ocuíraɨma uai ote: —Náidacaillano baie jófuemo mai jofo jai. Dɨnomo o fɨnóllɨfuena omo llóitiaɨoɨza, —daɨde.

⁷Sáulodo jaide comɨnɨ aféuaina cacádiaɨoɨ íadɨ mei buna cɨóñediaɨoɨ. Aferi ɨere jacɨ́naitiaɨoɨ.

⁸Ie meífodo Saulo énɨemona caifo ráɨnacaillano, érocaide. Mei ui botáicaide íadɨ éroinide. Mei jira daɨí ónoɨdo jaɨnátacana Damasco jófuemo íena uitíaɨoɨ.

⁹Dɨnomo daruiámani uina cɨóñede. Afénomo mɨnɨ́cana güiñede, jiróñede.

¹⁰Afe Damasco jófuemo ɨ́ɨnotɨmɨe Ananías illa, nɨ́ɨmɨemo Ocuíraɨma nɨcáɨrilla izóidedo cɨ́ocaide. Iena daɨde: —¡Ananías! —daɨde. Afémɨe uai ote: —Ocuíraɨma, benó itɨcue, —daɨde.

¹¹Jira Ocuíraɨma íena daɨde: —Náidacaillano, Deréchana mámecɨrede iodo jairi. Dɨnomo Judas jofomo jɨcánori: “¿Nɨnomo ite Sáulona mámecɨredɨmɨe, Tarso jofue ímɨe?” O dúcɨna llezica afémɨe Juzíñamuimo úrite

¹²Ie úrioina llezica nɨcáɨrilla izóidedo ie uimo onoɨ bɨ́taɨbitɨmɨe, Ananías mámecɨredɨmɨena cɨode; áfemona nane ie ui ñue cɨ́oite, —daɨde.

¹³Afe uaina cacáillano Ananías daɨde: —Aillo comɨnɨ baie ɨímana cuemo llotíaɨoɨ. Afe llezica omo ɨ́ɨnotɨnuiaɨmo nana Jerusalemo ie fɨeni fɨnócafuiaɨ cuemo llotíaɨoɨ.

¹⁴Ja birui afémɨe benomo bite. Lletáriraɨnɨ illaɨnɨ llavétallɨbiaɨ dɨga bite nana o mámecɨdo jɨcáfɨredɨno maɨtá úillena, —daɨde.

¹⁵Jira Ocuíraɨma daɨde: —¡Mai jai! Afe ɨímana jae cue nɨzeca jɨáɨe náɨraɨmo cuedo úrillena naa íaɨoɨ illáɨnɨri.

¹⁶Afémɨe aillo cue náɨraɨmo llóite. Afémɨe aillo cue ɨ́coɨnia duere zefuíllana íemo ácataitɨcue, —daɨde.

¹⁷Iemona Ananías Saulo illácomo jaide. Jofo jáillano íemo onoɨ bɨ́tajano daɨde: —Ama Saulo, Ocuíraɨma Jesús o billa iomo omo cɨ́ocaidɨmɨe cue o ui meine abɨdo cɨ́oillena ocuide. Afe dáanomo afémɨe Ñuera Joreño ona cue úicaitallena cuena daɨde, —daɨde.

¹⁸Afe daɨí dáɨnamona, chamu icogɨ izoide ie uímona cúcoɨzite. Iemona nane ie ui meine cɨ́oide. Afemona Saulo náidacaillano báutizatatate.

¹⁹Afe meífodo güillano, ie rɨ́ino meine comuítate. Afe mei nano nɨ́garui Damáscomo ite ɨ́ɨnotɨnori fɨébide.

²⁰Ie meífodo Saulo garíracomo jino llófuerizaide. Afénomo daɨde: “Jesús Juzíñamui Jitó.”

²¹Nana afémɨemo cacádɨno fáɨgacaillano daɨdíaɨoɨ: —¿Ua meita bie nɨ́ɨmɨede, naui Jerusalemo Jesús mámecɨdo jɨcáfɨredɨno racádɨmɨe? ¿Nɨɨe naui benomo bitɨ́mɨe lletáriraɨnɨ illáɨnɨmo caɨ maɨtá úillena? —daɨdíaɨoɨ.

²²Mei íadɨ Saulo jamánomo rɨire jino llófuerite. Jesús Crístonana jino uafodo cɨótate. Mei jira Damáscomo ite judíuaɨ Saulo ɨfona ɨ́rɨtagaiaɨoɨ.

²³Dɨga iruillaɨ jailla meífomo, judíuaɨ dáanomo comecɨ fácana Saulo fállena maméritiaɨoɨ.

²⁴Mei íadɨ aféfuena afémɨe fɨdɨde. Naa mona naɨo dɨga jofue jino jáirazemo úiñoidiaɨoɨ ie fállena.

²⁵Mei íadɨ ɨ́ɨnotɨmacɨ áillue cɨrɨ́gaɨmo íena jóonetiaɨoɨ. Jóoniano afe jofue jinófene cɨrɨ́nuailla jinomo naɨo íena agüínetiaɨoɨ. Afe daɨí afémɨe botade.

²⁶Saulo Jerusalemo dúcɨillano, Juzíñamuimo ɨ́ɨnotɨnori gaɨríacade, mei íadɨ nana afémɨena jacɨ́ruitiaɨoɨ. Afémɨe ɨ́ɨnogafuena naɨ jeire oñédiaɨoɨ.

²⁷Mei íadɨ Bernabé íena uáidote. Iemona orécamɨiaɨmo íena ácatajide. Afemona Saulo iomo Ocuíraɨmana cɨónafue íaɨoɨmo llote. Ie mei Saulo Damasco comɨ́nɨmo méaicaiñeno Jesús mámecɨdo úrillafue íaɨoɨmo llote.

²⁸Jira Saulo Jerusalemo dɨga irui ite. Dɨnomo ɨ́ɨnotɨmacɨ dɨga macácaide.

²⁹Ocuíraɨma mámecɨdo méaicaiñeno úrite. Griego uaido úritɨno judíuaɨmo úrite. Conímamo jɨcánua uai ua daɨí úrite. Iemona ie fállena mamédiaɨoɨ.

³⁰Jɨáɨe ámatɨaɨ afefue fɨ́dɨano, Saulo Cesaréamo uitíaɨoɨ. Dɨnómona Társomo íena orédiaɨoɨ.

³¹Ie meífomo nana Judea énɨemo ite Jesús mámecɨdo gaɨrídɨno fɨ́razitiaɨoɨ. Ja íaɨoɨ ɨ́ɨnogafuemo caɨmare náɨreoicaidiaɨoɨ. Afe izói Galilea énɨemo Samaria énɨe dɨga ite ɨ́ɨnotɨno fɨ́razillamona rɨire náɨreoicaidiaɨoɨ. Ocuíraɨma Jesús ñúefueri jácɨcaidiaɨoɨ. Ñuera Joreño íaɨoɨ cánuamona jebuíoicaidiaɨoɨ.

³²Pedro jɨáɨe ámatɨaɨ uáiduailla llezica, daje izói Lida jófuemo ite ɨ́ɨnotɨno éroizaide.

³³Dɨnomo Enéasna maméidɨmɨena cɨ́oizaide. Afémɨe ocho dɨga fɨmona bɨ́iramo bɨide ie tɨ́zitailla jira.

³⁴Iena Pedro daɨízaide: —Eneas, Jesucristo ona jíllotaiteza. Náidacaillano o bɨ́ira ñue fɨno, —daɨde. Afemona Eneas raɨre jíllobicaide.