Átus 9:3-34

³Ayteke nikwe ig kiyapwiye Sawlu tipikwiye ta apitit ini paytwempu Damasku. Ig kennesmin gidawnhan, pahaye adahan kabutniki inugiktak uguhpig.

⁴Ig tuguhe waygboit. Ayge ig timá pahá ikupimnat awna git. In awna: ―Sawlu, Sawlu. Mmahki pis hiyapkisne mbeyne nuthu?

⁵Igme kaytwa giwn: ―Pariyekap, Kiyapwiye? Giwn: ―Nah Jesus ku pariye pis hiyapkisne mbeyne nuthu.

⁶Kannikaw kuri. Su tipik ta apitite paytwempu. Ayge pis ekkepka pitnek adahan ku pariye Uhokri gimawkan pit.

⁷Ig kiyapwiye Sawlu gihaptiyepwi hiyapni henne, igkis wadisasew. Igkis barukiswe ayge. Igkis timap pahá ikupimnat awna henneme igkis ka hiyá pahapwinama.

⁸Igme kiyapwiye Sawlu kannikaw waygbotak. Ig woka giwtyak, ig ka hiyá gipegyi. Igkisme gihaptiyepwi hiyapni henne, igkis kamax giwanmin igkis itukepri ta apitit paytwempu Damasku.

⁹Igkis danuh atere, ayteke adahan mpana hawkri ig ka hiyá gipegyi. Apiminewa ini ku samah ig motpi ig ka ax ig ka higap awaku giwakemni.

¹⁰Apimwata ini pahapwi awayg Jesus gihiyega ayge apit ini paytwempu Damasku. Giw Ananíyas. Ig ayge, pahaye adahan Kiyapwiye Jesus hiyapkiswe ta git. He giwtyakpeynen ig hiyapkiswa git. Ig awna git: ―Ananíyas. Igme kiyapwiye Ananíyas kaytwa giwn: ―Nah ay, Kiyapwiye.

¹¹Igme Kiyapwiye Jesus awna ta git: ―Asá ahegbetaw. Su ta apigkut ini ahin kewye “Wadit”. Ayge pis parak ta gipinekut kiyapwiye Judas. Pis ayá gak pahapwi awayg Sawlu tarsuyene ta git. Igme Sawlu ayge piriyepkewne.

¹²Ig kuwis hiyá giwtyakpeynen pahapwi awayg kewye Ananíyas parak git sarayh giwak ta gipitit kahadbe ig hiyap akiw.

¹³Igme kiyapwiye Ananíyas kaytwa giwn: ―Kiyapwiye. Kaayhsima hiyeg awna gimin ner awayg ku samah ig keh mbeye hawkri gikakkis pihiyegapu ayhté Jerusalém.

¹⁴Kuri ig danuh atan Damasku akak kumadukaki giwntakkis nerras muwpeg kiyatyepwi adahan ig kamaxne madikte hiyeg ku pariye ikewnepwi pihiyegapu.

¹⁵Igme Kiyapwiye Jesus awna ta git: ―Su atak ta gimkat. Nah kuwis kaniypig adahan ig nuwatni adahan ig ekkene nnetni ta gitkis hiyeg ku pariye kane judeyenepwima, ta gitkis gikiparakis, hawwata ta gitkis hiyeg ku pariye israelyenepwi.

¹⁶Ku apim inin nahwa akki ta gitnek ku samah ig hiyá mbeyne kaayhsima ndahan.

¹⁷Ig kiyapwiye Ananíyas timapni henne, ig tipik. Ig danuh atere gipinekut kiyapwiye Judas. Ayge ig uté kiyapwiye Sawlu. Ig hiyapni henne, ig sarayh giwak ta gipitit. Ig awna git: ―Nukebyi Sawlu, igwa Kiyapwiye Jesus awahkisun atan pimin. Ignewa ku pariye hiyapkiswe pit apigku ahin abetnewa ku samah paytni. Ig awahkisun adahan Uhokri Gitip kawihpi ku apim inin.

¹⁸Aynewa arikna ke imbe amar mpiye giwtriktak kiyapwiye Sawlu. Aynewa ig hiyap. Ig hiyapni henne, ig kannikaw, ig kewpi ta unihkwat.

¹⁹Pisenwa ig ax ig hawkamnihwa akiw. Ariwnteke ini ig msakwa gimunkis Jesus gihiyegapu ayge Damasku adahan aynessa hawkri.

²⁰Aynewa ig awna: ―Kuri nah kinetihwate gitkis hiyeg gimin Kiyapwiye Jesus. Ayge nikwe ig tipik lammisya agiku judeyenepwi gileglisakis. Ayge ig kinetihwene ku ig Kiyapwiye Jesus ignewa Uhokri gikamkayh.

²¹Madikte hiyeg ku pariye timepnepwi inakni giwn igkis wakaymnibdi. Igkis awna: ―Mmahki? Ka ba nernewatma ayhté Jerusalém umehne nerras ku pariye ikewnepwi Jesus gihiyegapu? Ka ba nernewatma ayta adahan ig gikamaxwitnikis adahan ig giwaxwitnikis wanamnape ta gitkis nerras muwpeg kiyatyepwi? Hennewatbaki igkis awna.

²²Igme kiyapwiye Sawlu gidatni tipiknene. Ig ekkene ta gitkis huwewe ku Kiyapwiye Jesus igyerwa Cristo, ig Uhokri gikanyan adahan ukumaduketniwiy. Igkisme nerras hiyeg judeyenepwi ayge Damasku igkis ka hiyá adiyesak ginetni.

²³Ariwnteke ini kibite hawkri akiw, nerras judeyenepwi pahadguhwa pawtak. Igkis awna: ―Pugamawka wixwiy pisenwa Sawlu gihawkan.

²⁴Henneme ig kiyapwiye Sawlu kinetni gakkis ku igkis kadasepri. Hewke tiyegim mataytak igkis kadasepri anumeku paytwempu ahina. Igkis wahapri mpiya adahan igkis giwmepten.

²⁵Igkisme Jesus gihiyegapu hiyapni henne, igkis bisiksepri tiyegim. Igkis wiwhkisri agiku payt alappota. Igkis muhuksepri agiku nopsad tehte ayte inutak ta waygboit.

²⁶Ayteke nikwe ig kiyapwiye Sawlu tipik ta apitite Jerusalém. Ig danuh atere, ig darihwekkerepye gikakkis Jesus gihiyegapu aygnenepwi. Igkisme ka iha giwn ku igwata Kiyapwiye Jesus gihiyega. Igkis apise gibohri.

²⁷Igme kiyapwiye Barnabé hiyapni henne, ig pareke abet gihawkan. Ig akki kiyapwiye Sawlu ta gitkis Jesus giwatnipwi. Ig awna gitkis: ―Ku samah ig Sawlu apigku ahin ig hiyá Kiyapwiye Jesus. Igwa Kiyapwiye Jesus kinetihwa gikak ayge. Ayteke ig atak ta apitit paytwempu Damasku. Ayge ig kinetihwene gimin Kiyapwiye Jesus akak madikte gawaygyi.

²⁸Igkisme timapni henne, metakwa igkis amapig. Ayteke nikwe ariwnteke ini ig kiyapwiye Sawlu msakwa gimunkis Jesus gihiyegapu ayge Jerusalém. Ig wageswa gikakkis muwwapu. Ayge ig kinetihwene gimin Kiyapwiye Jesus akak madikte gawaygyi.

²⁹Apim ini ig kinetihwa gikakkis nerras judeyenepwi ku pariye awna grésiyenepwi giwnaprikkis. Igkisme aharitne giwmepten.

³⁰Igkisme Jesus gihiyegapu timapni henne, igkis waxe kiyapwiye Sawlu ta apitit paytwempu Sesaréya. Ayteke igkis awahkiswig tipik ta apitit paytwempu Tarsu.

³¹Ayteke Jesus gihiyegapu ka hiyá mbeyne akiw. Muwwapu Judeyamnaw, Galiléyamnaw, Samariyamnaw, igkis ka kiyimwihka akiw. Igkis tipiknenes wagahkisne gawaygyikis akiw. Igkis kibihwa mmanawa igkis wew kiyathene Uhokri, igme Uhokri Gitip gawayghetnikis.

³²Ayteke nikwe ig kiyapwiye Pedru wew muwwapu danuhpene gitkis Jesus gihiyegapu. Apim ini ig atere gitkis nerras ku pariye msekwenepwi ayhté paytwempu Lida.

³³Ig danuh atere, ig patiptak gikak pahapwi awayg kewye Enéyas. Ig kiyapwiye Enéyas miyapupye. Ig ka kannikaw amadgatak giwetri adahan ntewnehkerbu akebyi kamukri akak pahak arawna.

³⁴Ig kiyapwiye Pedru hiyapni henne, ig awna git: ―Kiyapwiye Enéyas, ku apim inin Jesus Cristo makniwpi. Kannikaw kuri. Minah piwetri. Ig timapni henne, aynewa ig kannikew.