Aposotolo Adi Hewau 9:3-34

³Sora ma launa Damaseko i hanahanaui galewa marana ia abo i hemara hetaiiri.

⁴Ie guridobi tano eai, arina esau i ataiei i ribalaoma ia arinai i ene, “Saulo e, Saulo e, ue saha u hegahegadotoagu ta?”

⁵Ia abo i ene, “Guiau e, oa hede eai?” Guiau i ene, “Eau hede Iesu, oa u hegahegadotoagu wa.”

⁶Ia abo i tabutabubu, eo ie noo, i ene, “Guiau e, Oaem nuatu abo edoha, egu laulau saha abo ea abi?” Guiau i ribalau ia arinai i ene, “U torohai, u lau eanua eai, em laulau aisana abo se heribam.”

⁷Tatao ia maedi se lau, se totoro na nige ariarinadi, arina wa se ataiei, na tau nige se ita.

⁸Saulo tano eai wa i torohai ia matana se lala’o nige tau i ita na isi se abinimai, se woeai se laei Damaseko eai.

⁹Asubena haiona ia matana se gibu, aiai nige i ai, eo goila nige i nom.

¹⁰Damaseko eai tauataiena esau esana ede Anania; ia i enosuai, Guiau i ribalau ia arinai, i ene, “Anania e,” Ia i ene, “Guiau e, eau ede ina.”

¹¹Guiau i ribalau ia arinai, i ene, “U toro, u lau dobila esau arinai esana ede Dudurai, Iuda ena numa eai tau esau esana Saulo, Tareso tauna, hage u hesio arinai, ia i laulau‐uura.

¹²Ia hinage i enosuaiyao, tau esau esana Anania ie ita, i awasae ia nimana i toresaei ia potana eai, matana bena abo se lala.”

¹³Anania arinana abo i heuio i ene, “Guiau e, nei tau ne wasana ea ataieyao, tatao gamagaridi se ribaei, ia baaea lailai ie abi, hetabu tataodi i hebaaeadi Ierusalema eai.

¹⁴Inai hinage kohena lailai‐didigadi edi riba eai tatao esam se atai ia abo i paidi.”

¹⁵Na Guiau i ribalau ia arinai, i ene, “U lau mo em dobila eai wa: egu bia ea hineriyao ede ina, bena abo eau esagu i laei Etene eo wasawasadi aridi eai, eo Isaraela nanatudiyao aridi eai hinage.

¹⁶Ia abo ea heita, eau esagu eai amamna gamagamagari abo sora i hearodi.”

¹⁷Anania ie lau i awasae numa wa alona eai ia nimana i toresaedi ia potana eai, i ene, “Egu‐tau Saulo e, Guiau Iesu wa, ia ede u laoma dobila eai i hemasarahaaurim wa, ia i hetamariguma matam bena abo se lala, eo Earua Tabuna wa bena abo u monau.”

¹⁸Ma‐esega abo ginauri ia matana eai se beu doha eama onahidi: ia matana abo se lala, ie toro, ia se hebapatisoi.

¹⁹Ia aiai ie ai, abo tauna se maidosiuio. Saulo asubena headi i miamia Damaseko eai tauataiena aridi eai.

²⁰Ia abo i lauguguia sunago alodi eai, ia Keriso i wasaduaiei, i ene, ia Eaubada Natuna tahunuana ede.

²¹Isi gamagaridi ena riba se ataiei se noo, si ene, “Ina tau wa e nige’e, ia tauataiena Ierusalema eai i hebaaeadi wa? Ena laoma paana hinage doha bena i paidi, eo i laedi kohena lailaidi aridi eai?”

²²Na, Saulo ena adidiri abo i tubulailai; Iudea tataodi taumia Damaseko eai i henuaponoponodi, arinai abo Keriso i riba hemasaraha mamohoiei.

²³Asubena gamagaridi se ohi, Iudea tataodi abo se oioiriba ia bena se unui.

²⁴Saulo tau‐weseina i nuatulobaidio. Eanua gana tonana gududi se itawataidi maiona to asubena ia bena abo se unui.

²⁵Maiona eai tauataiena ia se usai bosa alona eai, abo se hedawedobei tona murina eai.

²⁶Saulo abo ie lage Ierusalema eai, ia ena nuatu i ene tauataataiena bena maedi se oigogo esega: na isi gamagaridi ia se matausiei, nige se nuatui ia tauataiena esau.

²⁷Na Banaba ia abo i woeai, i laei aposotolo aridi eai, enadi ie riba lahinae Guiau dobila eai ie ita wa, eo Iesu esana eai i lauguguia adidiriei Damaseko eai, wasana i heribadi.

²⁸Ia maedi se mia esega Ierusalema eai, se sae na, se dobi.

²⁹Guiau Iesu esana eai i riba headidiri, Iudea Heleni maedi se haiawayagara: to isi hinage edi dobila se eooi ia bena abo se unui.

³⁰Teina se ataiei ena tataoyao ia se laei Kaisaria eai, abo se hetamari i lau Tareso eai.

³¹Ekalesia Iudea hari tupo, hari tupo eai, eo Galilaia eai, eo Samaria eai abo se miataubiga eo nuadi se tubu; isi Guiau matausina boeana eai se laulau, eo Earua Tabuna ena henuabiga arinai abo se hetadada.

³²Petero hinage ie lau hari eanua, hari eanua, ia abo ie leta ie dobi Lida eai hetabu tataodi aridi eai.

³³Nei eai tau esau i lobai esana ede Ainea, borimai igigi‐haiona ena aba eno eai ie ota ena asiebo ede i tabutabubu.

³⁴Petero i ribalau ia arinai, i ene, “Ainea e, Iesu Keriso i hemaurim: u toro, em aba laulaueno me u launo’u.” Arinai abo i toro heuheula.