Aisea 1:24-31

²⁴Gua ke, zama se Zihova, sa Tamasa tadi na Qeto Minate pa Maṉauru, sa Tamasa Ṉiṉirana tadi pa Izireli, “Ego, kaqu hobequ si Rau koari na Qua kana, meke kaqu noso sari tinasuna evaṉi ri na tie va gugue mae koa Rau.

²⁵Sa Limaqu si kaqu va taliri atu nia Rau koa gamu; kaqu va via pani Rau sari na remoremo, kaqu va via gamu Rau guana va via siliva pa nika.

²⁶Kaqu veko pule i Rau sari mia koimata gugua pukerane, mia tie totoli gilaedi gua tatasana. Mudina asa si kote ta pozae na vasileana toṉotona sa Zerusalema, na vasileana ta ronuna.”

²⁷Zaione si kote ta harupu pa vinilasa toṉotona; arini pu kekere pule si kaqu siṉo va gorevura pa tinoṉoto.

²⁸Ba arini pu korodia va tabea si Asa meke tavete va kaleana si kaqu tava huara inete; meke arini pu kilua se Zihova si kaqu tava mate.

²⁹Kote kurekure ni gamu sari mia vinahesi beku sapu ele qetuqetu ni gamu; kote talotaṉa ni gamu sari na inuma tava madidi koari na beku.

³⁰Kote gua keke huda nomana sapu harahara elona si gamu, guana inuma sapu loke kolona.

³¹Sa tie ṉiṉira koa gamu si guana remoremo huda popadi, meke sari nana tinavete si guana pidala nika; sari karua beto si kote sulu varigara, meke loke tie kote boka va matea sa nika.