1Ba ulung i profet nma yog Elisa e thin rorad e lungurad ngak Elisa, “Gin’en ni gadad be par riy e kayigi achig.
2Ere mu pagmad nggu warod nga Jordan nggu th’abed boch e ren u rom nggu toyed e naun ni ngad pired riy.” Me ga’ar Elisa, “Mmarod.”
3Me wenig bagayad ngak ni nge un ngorad; me ga’ar Elisa, “Kefel’.”
4Me un ngorad ngranod. Ma fa’anra tawgad ko lul’ ni Jordan miyad tabab ko maruwel.
5Ma nap’an ni be toy bagayad ba ke gek’iy me thay e tow rok nga maran me magey kolngin u pa’. Me ga’ar ngak Elisa, “Mang e nggu rin’? Ya tow rok be’ ni gu ning ni gu ra fulweg.”
6Me fith Elisa ngak ni ga’ar, “Ke mul ngan?” Me dag fare mo’on ngak e gin ke mul ngay, me th’ab Elisa ba ley i gek’iy nge yin’ nga maran me yib i pes fa gi tow nga daken e ran.
7Me ga’ar Elisa ngak, “Mfek!” Me fek fare mo’on fa gi tow.
8Nap’an ni be mael e pilung nu Syria ngak yu Israel. Me yog ko pi tolang ko salthaw rok nike duwgiliy bang ni ngan n’uf e tent rok riy.
9Machane me pi’ Elisa e thin nge yan ngak e pilung nu Israel ndab ranod ngaram, ya bay e salthaw nu Syria u rom.
10Aram me pi’ e pilung nu Israel e thin nge yan ngak e girdi’ ni yad ma par u rom ni ngar ayuwgad. Gathi ta’ab yay ni yodrom.
11Pilung nu Syria e dabuy e ren’em; me pining e pi tolang ko salthaw rok, me fithrad ni ga’ar, “Mini’ romed e ba fol ngak e pilung nu Israel?”
12Me ga’ar bagyad, “Pilung, gathi bagamad, ya Elisa ni fare profet e ir e be weliy ngak e pilung nu Israel e thin ni ga be yog, ni mus ko pin’en ni ga be yog u lan e senggil rom.”
13Me ga’ar fare pilung, “Mmarod ngam gayed ngam nanged e gin bay riy, mu gu pi’ e girdi’ nga ni yan ni kol.” Ma fa’ani taw e thin ngak ni bay Elisa u Dothan,
14me pi’ ba raba’ i salthaw nib ga’ nge yan ni bay e os nge chariot riy. Ra tawgad ngaram ko nep’ miyad cholngobiy fare binaw.
15Ma ri kab kadbul me od e tapigpig rok Elisa nge yan nga wean, me guy nike longobiy e salthaw nu Syria e binaw ni bay e os nge chariot riy. Me sul fare tapigpig ngak Elisa me ga’ar, “Masta, kad gafgowgad, mang e ngad rin’ed?”
16Me ga’ar Elisa, “Dab mu rus, ya kab pire’ e pi’in ni bay u ba’ rodad ko pi’in ni bay u ba’ rorad.”
17Me meybil Elisa ni ga’ar, “SOMOL, mu bing owchen e tapigpig rog nge guy.” Me pingeg SOMOL e changar rok fare tapigpig me guy fare burey nib sug ko os nge chariot nnifiy nib liyeg e gin’en ni bay Elisa riy.
18Ma nap’an ni yib fapi salthaw nu Syria ni aram e ngar chamgad, me yibil Elisa ni ga’ar, “SOMOL, mu gagiyeg nagrad ngar malmitgad.” Me gagiyeg nagrad SOMOL ngar malmitgad ni bod nike wenignag Elisa ngak.
19Me yan Elisa ngorad me ga’ar, “Kam olobochgad, ya gathi irera’ fare binaw ni gimed be sor ngay. Mu leked gag nggu fekmed i yan ngak fare mo’on ni gimed be gay.” Me fekrad i yan nga Samaria.
20Ma nap’an nranod ngalan fare binaw me meybil Elisa ni ga’ar, “SOMOL, mu bing owcherad nge yag ni ngar guyed ban’en bayay.” Me bing SOMOL owcherad miyad guy ni yad bay u lan yu Samaria.
21Ma fa’ani guyrad e pilung nu Israel, me ga’ar ngak Elisa, “Mog, nge di’in? Nggu li’rad?”
22Me fulweg Elisa ni ga’ar, “Dangay, mus ko salthaw ni kam kol ko mael ma dab mu li’rad. Mpi’ e ggan nge garbod ngorad, ma ga pagrad ngar sulod ko pilung rorad.”
23Me ngongliy e en ni pilung ba mur ni ba ga’ ni fan ngorad; ma fa’anra mu’gad ko abich nge garbod me pagrad ngar sulod ko pilung nu Syria. Ma ka’aram metal yu Syria ko mael ngak yu Israel.
24Me bangiyal’ nga tomuren me fek Benhadad ni Pilung nu Syria e salthaw rok ni gubin ngar m’aged e mael ko binaw nu Samaria.
25Bochan e re m’ag mael nem me lich e ggan u lan fare binaw nu Samaria, ra ta’reb e llug ko dongki ma meruk i ragag yang e silber puluwon, ma ra ba ley e pawn e subuyas ni be tugul u mapan ma lal yang e silber puluwon.
26Ma nap’an ni be yan e pilung nu Israel u daken e yoror ko binaw, me non be’ ni bpin ni ba ga’ laman ngak ni ga’ar, “Pilung, mu ayuwegneg!”
27Me fulweg ni ga’ar, “Fa’anra dabi ayuwegnem SOMOL, me ere mange mit i ayuw e rayag ni nggu pi’ ngom? Dariy e wheat nge wayin rog.
28Mang e kam gafgow riy?” Me ga’ar fare pin, “Reb e rran e me ga’ar e re pin ney ngog e nggu lithew e birog e bitir nggu longuyew, me reb e rran riy ma gamow longuy e birok’.
29Ma gamow lith fakag ni pagel nggu longuyew. Me reb e rran riy mu gog ngak ni nggu longuyew e birok e bitir nib pagel, me mithag.”
30Fa’ani rung’ag e en ni pilung e re bugithin nem, me guchthuy e mad rok ni bochan e kari kireban’, ma girdi’ ni yad ba chugur ko yoror e ra guyed ni bay e mad ni yima fanay ntutuw u tan e mad rok.
31Me ga’ar, “I Got e nge li’eg nggum’ ni fa’anra dab gog ni ngan th’ab lolugen Elisa e daba’!”
32Me pi’ be’ ni nge yan i kol Elisa. Ma ngiyal’nem e bay Elisa nge boch e pumo’on ni pi’ilal u naun rok. Dawori taw facha’ ni kanol’og, me ga’ar Elisa ngak fa pi’in yad, “Fare tathang e pogofan e ke pi’ be’ ni nge li’eg nggum’. Ere fa’anra taw ma ngan ning e mab ndabi yib nga naun; ya en ni pilung e be lay u tomuren.”
33Ka fini mu’ ko welthin me taw fare pilung me ga’ar, “Re gafgow ney nike yib ngodad e SOMOL e ke pi’. Ere mang ni ngku’ug sonnag SOMOL?”
