1Riꞌin in Pablo kuaj kankoj wibꞌ chiwach alaq chupa rubꞌiꞌ ri Cristo, ri na kuꞌan ta nim che ribꞌ y lik utz ukꞌuꞌx. Ma e kꞌo jujun chixoꞌlibꞌal alaq kechꞌaꞌt chwij, kakibꞌiꞌij echiriꞌ in kꞌo ukꞌ alaq, pachaꞌ kanxiꞌij wibꞌ kanchꞌaꞌbꞌej pa alaq; yey echiriꞌ in kꞌo naj y kintzꞌibꞌan kꞌu pan ukꞌ alaq, na kanxiꞌij ta kꞌana wibꞌ kanꞌan waꞌ, kechaꞌ.
2Kantzꞌonoj kꞌu che alaq choka alaq il che wa kantzꞌibꞌaj pan che alaq, chaꞌ we xinopon ukꞌ alaq na kajawax ta chik kanchꞌaꞌbꞌej kipa jujun che alaq. Noꞌj we kajawaxik, kanꞌan na kꞌu riꞌ waꞌ chike ri kakibꞌiꞌij xa pa qe riꞌoj kojtaqanik.
3Qatzij, riꞌoj xa oj tikawex, pero na kaqaꞌan ta qeꞌoj pachaꞌ ri kakiꞌan ri winaq re ruwachulew.
4Ma echiriꞌ kojchꞌoꞌjin chirij ri na utz taj, na kaqaꞌan ta rukꞌ qachuqꞌabꞌ o qanaꞌoj riꞌoj, ma e kaqaꞌan rukꞌ ruchuqꞌabꞌ y rutoꞌbꞌal ri Dios chaꞌ jelaꞌ kaqasach uwach ronoje ri kayaktaj chirij ri Dios;
5waꞌ e ri itzel taq naꞌoj y takꞌabꞌal qꞌij, ri kebꞌuqꞌatej ri tikawex chaꞌ na kaketaꞌmaj ta uwach ri Dios. Kaqaya kꞌu ronoje taq noꞌjibꞌal puqꞌabꞌ ri Cristo chaꞌ kuꞌan pachaꞌ runaꞌoj Rire.
6Echiriꞌ kaqilo lik kakoj alaq utzij ri Cristo, kꞌa tekꞌuchiriꞌ kaqaqꞌat tzij pakiwi ri e aj palajiy tzij.
7Ralaq xew kataqej alaq ri kilitaj uwach. We kꞌo kꞌu junoq ujikibꞌam uwach chiribꞌil ribꞌ lik kꞌo puqꞌabꞌ ri Cristo, e chuchꞌobꞌo chi utz waꞌ: Na xew ta rire kꞌo puqꞌabꞌ ri Cristo, ma jenelaꞌ riꞌoj.
8Y na xew ta riꞌ, ma na kinkꞌix tane che tobꞌ kanjikibꞌaꞌ uwach ri taqanik kaqaꞌan pawiꞌ alaq, ma waꞌ e ri Qajawal yaꞌyom paqaqꞌabꞌ. Y waꞌ na re ta sachibꞌal wach alaq, ma re kꞌiyibꞌal alaq chwach ri Dios.
9Na kuaj taj kachꞌobꞌ alaq raqan e kanxibꞌij pa alaq rukꞌ ri kantzꞌibꞌaj pan che alaq.
10Ma kꞌo kebꞌiꞌn re: «Ri Pablo chupa taq rucartas lik kꞌax ri kubꞌiꞌij, pachaꞌ lik kꞌo uchuqꞌabꞌ; noꞌj echiriꞌ kꞌo chiqawach, kuxiꞌij ribꞌ y na il tane uwach ruchꞌaꞌtem» kechaꞌ.
11Ekꞌu ri kebꞌiꞌn re waꞌ chirajawaxik kaketaꞌmaj na je ta laꞌ uꞌanom, ma e janipa ri kaqatzꞌibꞌaj pan che alaq, junam ubꞌiꞌxikil kaqaꞌano echiriꞌ oj kꞌo chiwach alaq.
12Riꞌoj na kaqachꞌobꞌ tane kaqajunimaj qibꞌ kukꞌ ri jujun xa kakitakꞌabꞌaꞌ kiqꞌij chikibꞌil kibꞌ. Ma rike xa kakijunimaj kibꞌ kukꞌ ri kachbꞌiꞌil. Ri kebꞌanaw re waꞌ, na jusukꞌ ta ri kinaꞌoj.
13Noꞌj riꞌoj na kaqatakꞌabꞌaꞌ tane qaqꞌij ruma juna chak na qaꞌanom taj, ma e kaqaꞌan ri uyaꞌom ri Dios paqaqꞌabꞌ. Yey e Rire ri xuya chiqe xojopon kꞌa chilaꞌ ukꞌ alaq rukꞌ ri Utzilaj Tzij.
14We tamaji e ri Dios yaꞌyom chiqe kojopon ukꞌ alaq, riꞌ xa pa qe riꞌoj kaqaꞌan ri chak ukꞌ alaq. Pero na e ta riꞌ. Lik kꞌu taqal chiqe kaqapixabꞌaj pan alaq woꞌora, ma riꞌoj oj ri nabꞌe xojopon ukꞌ alaq rukꞌ ri Utzilaj Tzij re ri Cristo.
15Na kaqatakꞌabꞌaꞌ tane qaqꞌij xa pa qe riꞌoj rukꞌ ruchak jun chik. Ri qoyeꞌem e jalan kanimar ri kubꞌulibꞌal kꞌuꞌx alaq, jekꞌulaꞌ kanimar ri qachak chixoꞌlibꞌal alaq e chirij ri uyaꞌom ri Dios paqaqꞌabꞌ.
16Tekꞌuchiriꞌ we xutzin ri qachak chixoꞌlibꞌal alaq, utz kꞌu riꞌ kojel bꞌi y kojꞌek pa kꞌamajaꞌ katzijox wi ri Utzilaj Tzij re ri Cristo, y jelaꞌ na keꞌqamina ta qibꞌ pa ri chak re jun chik, chaꞌ na kaqatakꞌabꞌaꞌ ta qaqꞌij rukꞌ ri chak na qaꞌanom ta riꞌoj.
17China kꞌu ri karaj kuyak uqꞌij, e chuqꞌalajisaj riꞌ janipa ri uꞌanom ri Dios Qajawxel che rubꞌinik usilabꞌik
18Ma we jun kutakꞌabꞌaꞌ uqꞌij xa chiribꞌil ribꞌ, riꞌ na jinta uchak ri kuꞌano; noꞌj we e ri Dios kayakaw uqꞌij, e qꞌalaj riꞌ utz ri chak uꞌanom.
