1Mangav tumen, me o Pavol, savo som “kovlejileskero”, sar som tumenca, ale “zoralo” ke tumende, sar som tumendar dur! Mangav vaš o Kristus, savo hino lačho the kovlejileskero,
2hoj te na mušinav te el zoralo pre varesave džene tumendar, sar avava, so peske pal amende gondoľinen, hoj keras avke sar o manuša andre kada svetos.
3Bo choc dživas andro ťelos pre kada svetos, amen pes na maras avke sar o manuša andro svetos.
4No amare zbraňi, savenca pes amen maras, nane le svetostar, ale hine le Devlestar, zorale te phagerel o pevnosťi. Lenca phageras o nalačho gondoľišagos
5a savoro, so pes upre ľidžal a hazdel pes upral le Devleskero prindžaripen. Ole zbraňenca phandas dojekh gondoľišagos, hoj pes te podden le Kristoske.
6A sam pririchtimen te potrestinel savoro našunďipen, medik na šunena andre savoreste.
7Tumen dikhen ča pre oda, so tumen hin anglo jakha. Te vareko tumendar pačal, hoj hino le Kristoskero, mi gondoľinel pre oda, hoj avke, sar ov hino le Kristoskero, sam the amen.
8Choc man but lašarava ola zoraha, so amen diňa o Raj, na avava andre ladž, bo odi autorita amenge sas diňi, hoj tumen te budinas a na te rozmaras.
9Na kamav, hoj te dičhol avke, sar te tumen kamľomas le ľilenca te daravel avri.
10Bo phenen: “Leskere ľila hine zorale the phare, ale sar hino maškar amende, hino slabo a leskere lava ňikhaj ňič.”
11Kajso manuš mi džanel, hoj oda, so pisinas andro ľila, sar na sam tumenca, keraha the akor, sar avaha tumenca.
12No amen pes na opovažinas te prirovňinel abo te rachinel ke varesave džene, save pal peste but gondoľinen a pes hazden upre. On oda keren sar bi e goďi! Bo pes korkore peha merinen a korkore peha porovňinen.
13No amen pes na lašaraha bi e mira buter, sar kampel. Lašaraha pes ča ola bučaha, so o Del amen diňa te kerel a tumen san kotor ola bučatar.
14Amen pes na lašaras buter, sar kampel. Se dogeľam dži ke tumende le Kristoskere evaňjelioha.
15Nane mištes, hoj pes te lašaras avrengera bučaha, a avke na keras. Ale amen pačas, hoj sar barola tumaro pačaben, tumen amen lašarena furt buter vaš odi buči, so keras maškar tumende.
16Paľis šaj anaha o evaňjelium the avre phuvenge, so hine pal tumende, a na mušinaha pes te lašarel avreskera bučaha.
17Ale avke sar hin pisimen: “Oda, ko pes lašarel, mi lašarel pes le Rajeha.”
18Bo na oda, ko pes korkoro lašarel, hino lačho služobňikos, ale oda, kas o Raj lašarel.
