2 KORINTO 10

1

2

3

4

5

6

7

8

9

10

11

12

13

¹Lau Paulo, Keriso ena manau bona ena manada daidiai, na noimuimu. Lau binai, dekemui ai na nohova mai manaugu ida, a dauhai na nohomu ai na gwau henimuimu.

²Lau na noimuimu, dekemui ai baina noho negadia ai gwaugwau badina ta basine hedinarai. Ḡau tamona, lau na tomamu haida, e gwauraimaimu tau-anina ena dala ai a rakamu e tomu taudia, baina gwau henidia dikadika.

³Ena be tau-anina ena dala ai a rakamu, to emai tuari na dia tau-anina tuarina.

⁴Badina be emai tuari ḡaudia na dia tau-anina ena, a Dirava ena amo e maimu siahuna, kohoro irohodia.

⁵Hepapahuahu bona Dirava idibana e laoa ahumu ḡaudia iboudiai a haketodiamu; bona lalo-hadai iboudiai a ḡuidiamu, Keriso ikamonaihenina ai;

⁶bona umui ba kamonai ḡuḡuru negana ai, gwau-edeede iboudiai davadia baia heni.

⁷Hedinarai ḡaudia ba itadia. Tau ta baineto ia na Keriso ena, ia na baine haeroa lou, ai danu Keriso ena, ia heḡereḡerena.

⁸Lau na emai siahu, Lohiabada ese e henimai dia ikure-dobimui totona a ilarebamui helaoreana, bainama heaḡilaia, lau na basinama hemarai.

⁹Basioto egu revareva na ihagarimui totona na tore henimuimu.

¹⁰Badina be haida e tomu “Ena revareva na mai metaudia bona mai siahudia, to tau-anina na manoka-manoka bona uduna herevadia danu asi mamidia”.

¹¹Unu e laloa tomamu tauna baine haeroa, dauha amo emai hereva e vasimu heḡereḡerena dekemui ai emai kara unu baia kara toma.

¹²Ai na asia tomamu ai na sibodia e hahenamomu taudia heḡereḡeredia. Idia na sibodia e hahetohomu, bona sibodia e haheḡereḡeremu: madi, asi edia aonega.

¹³Ai na basia heaḡi kava, a Dirava ese e henimai hahetohona ai baia heaḡi: hahetohona benai emui ai vada e kau.

¹⁴Emai siahu asia halataiamu, hetoana asia hanaiamu, umui iabi-vareaimui; badina be Keriso ena sivarai namo a vasilaia.

¹⁵Haida edia ḡaukara, ai emai hetoa murimurinai, asia heaḡilaiamu; to ai na a helaromu emui kamonai do baine tubu badabada, bena umui emui amo emai hetoa do baine daudau.

¹⁶Bena unukahamui tanodia ai sivarai namo do baia harorolaia; a idauna ta ena ḡaukara basia heaḡilaia.

¹⁷A ta baine heaḡi, ia ese Lohiabada baine heaḡilaia.

¹⁸Badina be sibona e hahenamomu tauna na namona basine gvauraia, a Lohiabada ese e hanamoamu tauna hari.