Codinto yacnocquidon Iste 2 10

1

2

3

4

5

6

7

8

9

10

11

12

13

¹Comapenec chushquenquiocquin matses bëdamboen tabadmenuequin chuibanquid Esuquidistu icpanëdash. Mibi yacno choshon Esuquidistupadquid icnuequin ëbi chieshënquid bëdamboen tabadmenuequin chuibanendambi. Ëbi chieshënquido nadec onquequin ëbi naden chiec, quec. Nuquibëd tabadquin dacuëdacbimboecquin comapenen Pabadon chushcainquio iquec. Utsi yacno nidshun dada uaquin comapenen chushcaic, quiosh. Mibi chiec adosh.

²Adsho tantiash mibi yacno choash tabadquin chushcante bunenquio icquimbi, Ambibi tantiacpaden nabanquid Pabado nec, quequido bëdamboen chuibanembi.

³Esuquidistu tantiaquid yanshun icsaquidën tantiacpaden nabanesa nebi.

⁴Mibi yacno choshon matsesën tantiacpadpenquiocquin Nuquin Papan tantiamiacpaden ëbi chieshënquido Satanasën icsamboen tantiamiaido Nuquin Papan chiaid chuibanendambi.

⁵Satanasën tantiamiaidon Nuquin Papan chiacpadomboen niaquec. Utsibon Edoen Nuquin Papa caid nibëdec, queshun ëmbibi tantiacpaden naic bëdambo iquec, quequin tantiamiaido nec. Aden tantiaquid icsho isun ambi icsamboen tantiec pamumëdacbimboe yaid ëmenu quequin Nuquin Papan chiaid ëmbi chuibanubi abi pamumëdacbimboe yaid padpidec pausudtiapimbocnoc paucbanshun ambi tantiacpaden Nuquin Papan pausunendac ma ambi chiacpadomboen namenuequin.

⁶Aden chuibanshun Nuquin Papan chiacpadomboen utsin-utsinquien abi icsaid ënabicsho isun comapenen cuidendambi.

⁷Ambi isaiduidi tantiec utsi-utsiec onquec. Aido onquiaid chuinu. Tantia. Esuquidistu tantiaquid nebi, quequi, Pabado icsactsëcquio isadtsec, quepec aido. Aden chuiquido, Esuquidistu tantiaquid nebi, ëbi quesho tantiash, Muec nec, quetiapimbo iquec.

⁸Abi tantiaquid ëbi yansho, Esuquidistun, Ëbi chuibeneta, cashumbic abi tantiaquido abi tantiadonequid icmenuequin chuibanquidbidi icmiondashi. Adquid icmiac ambi chiaid ëbi chieshënquido tantiamenuen chuibanubi aidon tantiaid icsa paucshun ambi tantiacpaden Nuquin Papan pausunendac. Adoacsho isash, Abi chuibanquid Esuquidistun icmioshi, quequin tantiec, Adesa nebi, quetiapimbo iquebi. Aden tantiaquin ëmbi chiacpaden naimbi mibi yacno choshon caimbi.

⁹Adquid nebi, quequin, Dacuëdampambocquid Pabado nec camenuen dada uainquio iquembi.

¹⁰Mibi aden dacuëdmenu, quenquio icnubi ëmbi dada uaondaid bedshun isun naden utsin ëbi chiosh quec. Chuiquidën comapenen chushquequin chiacpadomboen Pabadon dada uaic. Nëmbo choshon ambi dada uaquin chiacpaden chuitiapimbo icpec. Chichompibictsecsho ëbi isun, Chuiquidida nepec, quetsëcquin istsëccombi. Tantiatiapimbocnoc chuibanondash, quequin aidon ëbi chiec.

¹¹Aden ëbi chiec onquequidën bëdamboen tantiata. Chuinu. Ëmbi dada uacpaden mibi yacno choshon adomboembidi nabanembi caimbi.

¹²¿Esuquidistun, Ëbi chuibeneta, caid nebi, quepecta ëbi chieshënquido iquec? ¿Adenda Esuquidistun, Ëbi chuibeneta, caidënquio utsi icsamboen chuipec? ¿Esuquidistun, Ëbi chuibeneta, caid nebi, quequin abimbo chuiquidquio yec muaquin chuiquidpadquid nebi, quepectabi ique? Padenquio iquebi. Esuquidistun, Ëbi chuibeneta, caid nebi, quec muaid chuiquin abipadquid utsibëdtambi icsamboen nabanash, Nuqui bëdamboen naoc, cananec. Ambia icsamboen nabanquidën chuibanquin ismiac ambibi tantiacpaden nabanec abipadquid yanquidon.

¹³Ëbien Nuquin Papan tantiamiacpaden chuibanquid nec. Ambi tantiamiacpaden mibitedi chuibanquid nebi.

¹⁴Codinto yacno nidshun anouidi tabadquin Esuquidistu chuiban, Nuquin Papan cac mibëd tabadquin chuibanondambi.

¹⁵Adembidi, Utsi yacno nid, Nuquin Papan cac nidshun utsibon chuibanondash. Aden aidon chuibanac anocquidotsen Esuquidistu tantiaquid yanondash. Aido Esuquidistu tantiaquid yansho isash ëmbi chuibanaido nec, quenquio iquebi. Mibëdi tabadquin ëmbi chuibanac aid tantiaquid mibitedi yanondac. Adsho isash Esusquidistu tantiadonequidquio yampashun, quec mibi tantiec tsadebi.

¹⁶Esuquidistu ëmbi chuiban-chuibanac aid tantiadonequiec mibitedi tabadsho isash Esuquidistu utsin chuibanacmanombo chuibanoaic nidendabi caombi.

¹⁷Aden Esuquidistu chuibanac, Ëbibi bëdambo ictiapimbocquid mimbi bëdambo icmiaid nebi, Papa, quequin ma Nuquin Papa Esuquidistu tantiaquidtedishun chuipanuna.

¹⁸Bëdamboen nabanombi, abibi quesho Nuquin Papan bëdamboen istiapimbo iquec. Ambi, Bëdamboen mimbi naoc, caiduidi ambi bëdamboen isaidquio nec.