2 Corintios 1

1

2

3

4

5

6

7

8

9

10

11

12

13

¹Riꞌin in Pablo in taqoꞌn re ri Qanimajawal Jesucristo ma e ri Dios yaꞌyom wa chak chwe. Riꞌin junam rukꞌ ri hermano Timoteo kaqaya pan rutzil wach alaq, ri alaq utinamit ri Dios re riglesia kꞌo Corinto, y chike konoje ri hermanos ejeqel chupa ronoje taq ri luwar re Acaya.

²Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.

³¡Lik nim uqꞌij ri Dios, Ruqaw ri Qanimajawal Jesucristo! Ma e Rire ri lik kukꞌut ri kꞌaxnaꞌbꞌal ukꞌuꞌx chiqe y rukꞌ Rire kape wi ri bꞌochibꞌal qakꞌuꞌx.

⁴Rire e kabꞌochiꞌin qakꞌuꞌx chwach ronoje kꞌaxkꞌobꞌik, chaꞌ jelaꞌ riꞌoj utz kaqabꞌochiꞌij kikꞌuꞌx ri e kꞌo chupa ronoje kꞌaxkꞌobꞌik. Kaqaya kꞌu ri bꞌochibꞌal kꞌuꞌxaj jelaꞌ pachaꞌ ri uyaꞌom ri Dios chiqe riꞌoj.

⁵Ma echiriꞌ kanimar ri kꞌaxkꞌobꞌik paqawiꞌ ruma oj re ri Cristo, e lik kanimar ri bꞌochibꞌal kꞌuꞌxaj kuya ri Cristo chiqe.

⁶Echiriꞌ riꞌoj kaqatij kꞌax yey ri Dios kubꞌochiꞌij qakꞌuꞌx, waꞌ kukꞌam lo bꞌochibꞌal kꞌuꞌxaj y kolobꞌetajik re ri Dios che ralaq. Jekꞌulaꞌ ri kꞌax qatijom y ri bꞌochibꞌal kꞌuꞌxaj qakꞌulum riꞌoj, lik kꞌo kutiqoj che alaq chaꞌ jelaꞌ kachꞌij alaq uchuqꞌabꞌ ri kꞌaxkꞌobꞌik pachaꞌ ri qikꞌowibꞌem riꞌoj.

⁷Lik qajikibꞌam kꞌu uwach ri kubꞌulibꞌal qakꞌuꞌx ukꞌ alaq. Ma qetaꞌam alaq jun qukꞌ riꞌoj chupa ri kꞌaxkꞌobꞌik, jekꞌulaꞌ alaq jun qukꞌ riꞌoj che ukꞌulik ri bꞌochibꞌal kꞌuꞌxaj kuya lo ri Dios.

⁸Kaqaj kꞌut, hermanos, ketaꞌmaj alaq janipa chi kꞌaxkꞌobꞌik xqikꞌowibꞌej chilaꞌ Asia. Ruma wa unimal kꞌaxkꞌobꞌik xpe paqawiꞌ, xqanaꞌo na jinta chi qachuqꞌabꞌ che uchꞌijik waꞌ y xqachꞌobꞌ nenareꞌ na jinta chi pa saq kojkꞌasiꞌik.

⁹E xqanaꞌ riꞌoj e pachaꞌ qꞌatom chi tzij re kamik paqawiꞌ. Pero kꞌo xutiqoj chiqe ri xqikꞌowibꞌej, ma rukꞌ waꞌ xqamajo na jinta uchak ri kakubꞌiꞌ qakꞌuꞌx chiqibꞌil qibꞌ; xew e kubꞌul qakꞌuꞌx rukꞌ ri Dios, ri kebꞌukꞌastajisaj lo ri ekaminaq.

¹⁰Ri Dios e xojesan chwa wa kamik yey kꞌa katajin ne che qatoꞌik. Kubꞌul kꞌu qakꞌuꞌx rukꞌ, ma qetaꞌam rukꞌ rutoꞌbꞌal Rire kojel pan chi utz woꞌora y chiqawach apanoq.

¹¹Y ralaq kojtoꞌ ne alaq echiriꞌ kaꞌan alaq orar paqawiꞌ chwach ri Dios. Jekꞌulaꞌ we e kꞌi ri xebꞌanaw re waꞌ, e kꞌi riꞌ ri ketioxin chwach ri Dios ruma ri kuꞌan Rire quma riꞌoj.

¹²Kꞌo ri kuya kiꞌkotemal chiqe; waꞌ e ri qabꞌinik qasilabꞌik qakꞌutum chiwach ralaq y chikiwach konoje ri winaq, ma kaqanaꞌ chiqakꞌuꞌx lik saqil y jusukꞌ ri qabꞌinik jelaꞌ pachaꞌ ri karaj ri Dios. Yey wa qaꞌanom na e ta ruma unimal naꞌoj re ruwachulew; e ruma rutoꞌbꞌal ri Dios qukꞌ.

¹³Janipa ri kajilaj alaq che ri qacartas, lik e qanaꞌoj riꞌ che alaq chaꞌ jelaꞌ kamaj alaq usukꞌ.

¹⁴Woꞌora majom alaq usukꞌ jubꞌiqꞌ puwi ri qaꞌanom; qoyeꞌem kꞌu ri qꞌij echiriꞌ kamaj alaq usukꞌ ronoje, chaꞌ jelaꞌ pa rukꞌunibꞌal ri Qanimajawal Jesucristo lik kakiꞌkot alaq chiqe riꞌoj, jelaꞌ pachaꞌ riꞌoj kojkiꞌkot che ralaq.

¹⁵Rukꞌ kꞌu wa kubꞌulibꞌal nukꞌuꞌx ukꞌ alaq, xuaj kinikꞌow nabꞌe ukꞌ alaq chaꞌ jelaꞌ kalaj kakꞌul alaq ri relej nukꞌuꞌx,

¹⁶ma xinchꞌobꞌo kinikꞌow ukꞌ alaq echiriꞌ kinꞌek Macedonia y kinikꞌow tanchik echiriꞌ kanmaj bꞌi nubꞌe Judea y jelaꞌ kintoꞌ bꞌi alaq che ri nubꞌenam.

¹⁷Jelaꞌ ri xinchꞌobꞌo kanꞌano, tobꞌ na e ta xuꞌanaꞌ. Ruma kꞌu laꞌ, laj chiwach ralaq na xinchꞌobꞌ ta chi utz saꞌ ri kanꞌano. ¿Xa nawi pa we riꞌin kanchꞌobꞌ raqan ri kanꞌano? ¿O xa nawi kebꞌ uwa ri nuchꞌaꞌtem, pachaꞌ junoq kubꞌiꞌij: «Lik jikil uwach kinꞌek,» tobꞌ retaꞌam chiribꞌil ribꞌ na keꞌek taj?

¹⁸Noꞌj riꞌin na je ta laꞌ kanꞌano. Ma ruma lik jusukꞌ ri Dios qukꞌ, na utz ta kꞌu riꞌ we ri qachꞌaꞌtem kebꞌ uwach keꞌelawi chiwach alaq.

¹⁹Jekꞌulaꞌ ri Qanimajawal Jesucristo, Rukꞌajol ri Dios, ri xojtzijon puwiꞌ che alaq junam kukꞌ ri Silvano y ri Timoteo, ruchꞌaꞌtem Rire na kebꞌ ta uwach keꞌelawi; ma ronoje ri kubꞌiꞌij lik qatzij.

²⁰Yey ruma Rire e kuꞌana janipa taq rubꞌiꞌtisinik ri Dios qukꞌ. E uwariꞌche kaqayak uqꞌij ri Dios, kaqabꞌiꞌij «Areꞌ» y «Amén» che ronoje ri ubꞌiꞌim lo chiqe.

²¹Yey e ri Dios ri kujikibꞌaꞌ qakꞌuꞌx chi utz rukꞌ ri Cristo junam ukꞌ alaq y xojuchaꞌo chaꞌ kojuꞌan re Rire.

²²Ekꞌu Rire uyaꞌom ri Ruxlabꞌixel pa qanimaꞌ, kꞌutubꞌal re oj kꞌo chi puqꞌabꞌ yey kuꞌana na kꞌu ronoje ri ubꞌiꞌtisim lo chiqe.

²³Lik karil ri Dios ri kꞌo pa wanimaꞌ y retaꞌam kꞌut suꞌbꞌe na xinikꞌow ta chilaꞌ Corinto pachaꞌ ri xinchꞌobꞌo. E ma na xuaj taj kok bꞌis chikꞌuꞌx alaq ruma kanchꞌaꞌbꞌej pa alaq.

²⁴Na e ta kꞌu kojeꞌtaqana pawiꞌ alaq chwi ri kojom alaq; ma ruma ri kubꞌulibꞌal kꞌuꞌx alaq, tikil alaq chi utz. Ri kaqaꞌano e kojchakun ukꞌ alaq chaꞌ kakꞌojiꞌ ri kiꞌkotemal pa animaꞌ alaq.