1Ʒi Paulo noni Kristo bumâteŋ‐ticnere â uruc‐ticnere erâ ŋazape mananiŋ. Gâcnezi nore mueŋgopieŋ, “Ʒira ware juhuc miriŋdâŋ enâreekac, â ocna ra juhuc momori dâŋ enâreekac.”
2Âgofâc, ŋoŋerao fâ juhuc momori dâŋ ŋazapemurâ irec mi qafeŋnunʒepieŋ. Gâcnezi “sahacte wiacko utuckerâ juekac”, nore iŋuc mueŋgopieŋ, ŋic i jaŋe momori dâŋ jazapemurâ maŋnane afeckekac.
3Wiac nâŋe sahachec juju i jâmbomac jueŋgopeneŋ, â momori juju ine sahacte hata fokac iŋucko mi jueŋgopeneŋ.
4Sându maro bajuhuc juju gie baeŋgopeneŋ, i mâreŋkonec mâcne, i Anuture tâpiri sanaŋhec. Eme izi râsire sac bazueŋgopeneŋ, â qac momori‐ticne qapene wahaekac,
5â hârâc huec Anuture dâŋ sirickeekac i qa imac eeŋgopeneŋ, erâ Kristore micrereŋ sawa fuaocte mamana fuŋne fuŋne kâpâcwâru baeŋgopeneŋ.
6Ŋoŋe micrereŋte afecke‐fârehapie nâŋe ŋic gâcne jaŋe qaqatara‐jeŋicte bâtiŋ‐jopazore woŋec juŋgopeneŋ.
7Wiac moc ʒi tâtâc fokac i honeniŋ: Ŋoŋe wemocte sahackopec wiac omanere manapie fârine eekac? Ŋoŋeraonec ŋic moczi e jahacnere maname Kristore ŋic fârine eekacko ʒiŋuc manazejec: E buc Kristore ŋic mi juekac, nâŋe wâc Kristore ŋicfâc jaha jueŋgopeneŋ.
8Erâ Wofuŋzi giere tâpiri râe‐narewec, ŋoŋe âkesiŋ‐ŋopapere, sipiric‐ŋopapere mâcne, no irec erâ ropaŋdâŋ piticne muraʒihuc mupe boc mi sâqore‐nareocmu.
9Â papia qâreŋke‐ŋareekopac irec manapie mu hâhâwic dâŋ mi ezejec.
10Ʒiŋuc hâcne munareeŋgopieŋ: “Papiao dâŋ bipinehec â tâpirinehec qâreŋkeekac, sahaczi maic‐nâpoekac ine weweaŋne, â dâŋ mumu‐ticne ine wawahane.”
11Ŋic iŋucne jaŋe ʒiŋuc mananʒepieŋ: Nâŋe ʒoricko juhuc dâŋ qâreŋkeeŋgopeneŋ, dâŋ irec fârine ŋondeŋ‐ŋeŋicko juhuc bâfuaeŋgopeneŋ.
12Ŋic sahac fefe jueŋgopieŋ jaŋerao nâŋe iŋucnezi wemocko ʒuhuckerâ sâc babac enaŋmu. Ŋic i jaŋe hâcne gâcne nâŋere eebapa irec mi manasuhuc jaŋacnere sawa muhuc sahac fefe dâŋ kosa woseeŋgopieŋ.
13Nâŋe ine Anutuzi giere sâc banârewec iŋuc bafâku ŋoŋerao fisimbeŋ, irec mac manasuhuc mumuafec dâŋ mueŋgopeneŋ, â sâc tâmiricko kosa mumu ine mi eeŋgopeneŋ.
14Nâŋe gie‐nâŋecte sâc i mi musokaeŋgopeneŋ, gie rukec‐nâŋec i jâmbomac ŋoŋerao fokac, nâŋe hâcne bâbâni ŋoŋerao fisirâ Kristore Biŋebiaŋ qanaŋ ŋazambeŋ.
15Nâŋe ŋic gâcne jaŋere gieo kâŋgâc raʒi domahuc sahac fefe dâŋ kosa mumu i mi eeŋgopeneŋ. Mamanasiŋzi ŋoŋerao fua sawec eme gie rukec‐nâŋec bâsokanaŋte ine jâmbomac maŋnâŋec domaha jueŋgopeneŋ.
16Eme ŋic râpe‐ŋeŋicko juŋgopieŋ jaŋerao Biŋebiaŋ muranaŋmu. Â ŋic mocte gie fârine rauckehuc pepec dâŋ mumu i mi eeŋgopeneŋ.
17Moc e mumuteŋ dâŋ muzo murâ Wofuŋte erâ muzejec.
18Moc e jahacne sahac mumbiaŋkeme e miti fârihec ekac mi mucnezo, Wofuŋzi mumbiaŋkeme miti fârihec ekac muzo.
