1Nyakamame namba Polo kandao, “Naima-pipa awapa katelyamo dokopa baa papa lapae joo katengena, waka katelyamo dokopa baame naima kandao yuli tengena,” lengema. Namba dopa lengema akali dokomeaka Kataisame andiki-andiki pyoo kateamo dokonyapi tambo-tambo lao kateamo dokonyapi dolaponya nambame nyakama kyoto joo pii mende langitoo.
2Namba nyakama katatamisa ipato dokopa nambame nyakama kandao yuli talale lao nyakamame mende napyepape lao kongo lao langilyo. Doko, nambame masilyona, naimame endakalinya moname pyuwani kaengeli pyoo pyoo paelyaminona lao masingima endakali dupa kandao namba etete yuli tato.
3Kini, naima isa yuu angenya endakaliaka doko, naimame endakalinya mana doko minao yanda pyaa naenge.
4Doko, naimame yanda yandatepi minao yanda pingi dupa isa yuu angenya-tae daa. Yanda yandatepi dupanya Gotenya kalai pyakamaipenge pupu lapaepi dee yandapipi dupanya lome kyoto dupa kalupenge pupu lapaepi dupa singi. Naimame yanda yandatepi dupame sambo masingi dupapi, dee Gote lao masingi doko kaita lyokalanya pingi luiyapae mana dupa pitakapi, dupa minao koyasoo endakalinya pimana lao masingi dupa pitaka anjetala dupame Kataisa watao paena lenge.
6Dee nyakamame naimanya pii doko watao minalakao minatamino dokopa tanga lenge dupa pitaka naimame yanu pyalanya depa latae katatama.
7Nyakamame opale panao silyamo datupa masalapape: endakali mendeme baa Kataisanyana lao masetamo dokome baa tange Kataisanyana lao masetamo dopaka pyoo dee baanya moname naima apata Kataisanyana lao masepenge.
8Naimame nyakama nisoo kalai pyoo kalyamano doko Kamongonya pii minao pyoo kalyamano. Nyakama minao koyasalanya daa, nyakama kyoto injisalanya pilyamano. Dee namba dokonya etete epao luiyato kandao doko, elya sala nayato.
9Dopaka doko, nambame nyakama paka pisalanya nambanya pepa dupa pyao kalyeno lao masala nayapimi laka lao masilyo.
10Akali mendeme lao pituu, “Polome pii pepa pyapya dupa kenda pilyamo. Baame pii kyoto lelyamo. Dopa pilyamoaka doko, baa ae katelyamo dokopa pisiti pyapae joo katengena baanya pii lelyamo doko mee jingina,” lelyamo.
11Dopa lelyamo endakali dokome dake masepenge: naima waka katao pituu pii pepa pyao peekelyamano dokopa nyakama-pipa awapa katao kalai pitamano dokopa dolapo mendai dopaleaka.
12Tange lalyingi endakali mendapua kalyamino dupa-pipa naima mendai dopalena laanyapi dee naimanya mana doko dupanya mana doko-pipa awapa lao yapalanyapi paka pilyamo. Dupame nyakamanya mana doko nyakama tangeme makande setelyamino doko minao yapengema. Dupanya mendeme baanya mana doko dupanya mendenya mana doko-pipa makande pingima. Endakali dupa etete kyakaengema!
13Dopaka doko, naimame kapa pao luiyawaka pao naimanya tombo doko yalala nayapenge. Daa, Goteme naima kalai pyepale lao tombo pyao diamo dokopa kapa pao luiyapenge. Tombo doko soo ipao nyakama-kisa tuu lelyamo.
14Dopana, nyakama naimanya kalai pingi tombonya kalyamino dokonya naimame Kataisanya lao Wai Pii Epe doko nyakama-kisa minao epeamano dokopa naimame tombo doko yalala nayama.
15Dee naimame tombo doko yalatala endakali waka dupanya kalai dokonya naima luiyala naenge. Dopa napinya naimame dapa pipya laka lao masingi: nyakamame kyoto joo masoo minataminopa naimanya kalai doko nyakamanya kaina dokonya andake jetala, naimanya tombo dokonya tuu latamopa etete andake jipya laka lao masingi.
16Dopa pitamopa naimame Wai Pii Epe doko yuu waka nyakamanya maitakaita silyamo dupanya kapa pao lamaitama. Dee naimame yalatala endakali waka mendeme kalai pitamo dokonya naima luiyala nayatama.
17Dopaka doko, “Endakali mende luiyatamo dokome Kamongome piamo dupa lao masetala luina.”
18Doko, tange lalyingi akali doko angi daa. Kamongome lalyingi akali doko angi.
