1 Korinto 10:10-27

¹⁰Eked heman kepakay aw megbelisì kidon te medaet tepad te Timanem, so doen kemonaan tadon migbelisì, aw yan se inimetayan te anghil insogò lekat te langit.

¹¹Neinang se kedita niyan te kemonaan tadon amon ketegahan tadon te metoman kidon ipelumun aw meg-inang kidon te medaet. Nesolat iyan amon eked kidon peg-iling kandan, so agpet den se temanan te keneyonan.

¹²Yan aw doen otaw eg-aneng-aneng te mèpiya se eg-inangen din, yan se otaw keilangan megpekeahà amon eked sikandin keboyo i Satanas megpekesalà.

¹³Se tandà neokitan niyo, onawa iyan te tandà egkeokitan te menge doma otaw. Meneng egkeseligan se Timanem, so eked kaw din peokiti te tandà i Satanas eked niyo kebatog. Aw tendaen kaw, doen dalan inangen te Timanem amon mekelowà kaw, aw begayan kaw din heman te eneg amon meketayod kaw kenyan.

¹⁴Na, menge kedowa ko egkedekelan ko te pedowan, ikà niyo eg-inabut diyà te pegsimba te kenà benal timanem.

¹⁵Doen inenengen niyo, aw yan mikagi a kenyo te eneng-enengi niyo aw benal se intoladà ko.

¹⁶Seini se mèpiya inangen tadon aw metipon kidon, amon eneng-enengen tadon se pegkematay i Cristo kenitadon. Aw minem kidon te tabò, onà kidon megtawal-tawal diyà te Timanem aw megpesiontong kidon diyà kandin kenyan. Aw minem kidon diyà te tabò sìyan, yan ipetaga-taga tadon te migsebad kidon den ki Cristo pineokit te dipanog din te pegkematay din doton te kros. Aw komaen kidon te pan binelà-belà, yan ipetaga-taga tadon heman te migsebad kidon den ki Cristo pineokit te lawa din nematay doton te kros.

¹⁷So doen olò sebad pan, yan ketegahan tadon te pengkey medita kidon egpemenal, meneng sebad se neekopan tadon, so sebad olò se pan iteped diyà te kedita tadon.

¹⁸Eneng-enengi niyo heman se ketanem te menge Judiyo. Aw egsimba dan, egduyun dan te Timanem pineokit te pegpengimatay dan te ayam-ayam ipegpemegay, aw se otaw egpengaen te pengelapen egteniyen, yan se otaw egpeakop diyà te pegduyun dan te Timanem.

¹⁹Iling heman kenyan se otaw memegay te kànen diyà te inotaw, so megpeakop dan heman diyà te pegduyun te kenà benal timanem. Meneng ibeg ko, ketegahan niyo te wedad palos ontong dan kenyan. Eked heman ketebangi se otaw egsimba te inotaw.

²⁰Aw doen kànen ibegay te otaw kenà egsimba te Timanem, se ontò dan begayan te kànen, yan se menge bosaw. Kenà Timanem se iduyun dan. Eked a keibeg aw mesakop kaw te bosaw.

²¹Eked kepakay aw minem kaw kidoen te tabò impunù te Pengolo amon iduyun sikandin, aw penga niyan minem kaw heman kidoen te tabò egtewal-tewalan dan te bosaw. Eked heman kepakay aw komaen kaw te pan impunù te Pengolo, aw penga niyan komaen kaw heman diyà te kènanan te otaw egduyun te bosaw.

²²Aw iling kenyan se eg-inangan niyo, meopal se Pengolo kenyo. Eked kaw pekelowà te pegpelumun din kenyo.

²³Pengkey mepakay aw inangen ko se kedita mepakay diyà te Timanem, meneng eked a, so wedad ontong te kedita niyan. Pengkey doen mepakay tadon inangen, meneng eked tadon iyan inangi, so eked tadon ketebangi se menge doma otaw egpemenal.

²⁴Pengkey eden se inangen te otaw, kolang se tod din aw olò sikandin se mekeontong, meneng keilangan mekeontong heman se doma otaw.

²⁵Na, aw doen pengelapen ibeligyà doton te pedyanan, mepakay aw kànen niyo iyan, pengkey eden. Aw mengabat kaw, ikà niyo den eg-insà aw eden pengelepeni se inabat niyo, amon wedad keeneng-enengan niyo.

²⁶Mepakay aw kànen niyo iyan, so doen kagi te Timanem insolat, “Lekat te Pengolo se kedita dini te keneyonan, so sikandin se mig-inang te kedita.”

²⁷Na, aw tewalen kaw komaen doton te balay te otaw kenà egsalig ki Cristo, aw doen ibeg niyo domoton, mepakay iyan. Pengkey eden se ipekaen din kenyo, mepakay iyan kànen. Ikà niyo den eg-insà aw eden se ipekaen kenyo, amon wedad keeneng-enengan niyo.