1 CORINTIOS 10:10-27

¹⁰Ma' mi la' cha'len t'an ti' contra Dios che' bajche' ti' cha'leyob cabʌlob ti ñoj oniyix. Ti caj t'an ti' contra Dios, ti tsʌnsʌntiyob ti ajtroñel i cha'an Dios ch'oyol bʌ ti panchan tsa' bʌ xijq'ui i tsʌnsañob.

¹¹Pejtyel tyac iliyi ti ujti ti' tyojlelob lac yumob ti ñoj oniyix cha'an i señʌjlel mach che'ic yom i bej cha'leñob i pi'ʌlob. Ti' ts'ijbunti ti' Ts'ijbubil bʌ i T'an Dios cha'an laj cʌntisʌntyel añon bʌ la ti jini yujtibal bʌ q'uin tyac majlel cha'an mach'an mi lac cha'len che' bajche' ti' cha'leyob.

¹²Jin cha'an cʌñʌtyan a bʌ mu' bʌ a ña'tyan xuc'ulet ma' wajñel ame ma' wotsan a mul.

¹³Jini pʌjyel ti mulil mu' bʌ la' wilan lajal bajche' mi' ñusan yaño' bʌ je'el. Pero xuc'ulʌch i pusic'al Dios. Ch'ujbi lac ch'ujbin Dios cha'an mach'an mi yʌq'ueñonla lac ñusan más p'ʌtyʌl bʌ lac xic'ol ti mulil che' bajche' ch'ujbi laj cuche'. Pero che' mi lac pʌjyel ti mulil Dios mi quejel i yʌq'ueñonla lac ña'tyan bajche' ch'ujbi lac loq'uel cha'an weñʌch mi la cajñel.

¹⁴Jin cha'an p'untyʌbil bʌ hermañujob, ma' mi la' ch'ujutisan melel jach bʌ dios tyac.

¹⁵Mic pejcañetla bajche' quixtyañujob mu' bʌ i ña'tyan. Bajñel pensalinla i sujmlel chʌncox bʌ c subeñetla.

¹⁶Che' much'quibilonla mi lac suben Dios wocox i yʌlʌ cha'an jini mu' bʌ quejel la cape' ti yorojlel ch'ujul bʌ uch'el. I señʌjlel che' mi la cape' cha'an mi lac motin ajñel la quic'ot Cristo cha'an ti' ch'ich'el Cristo tsa' bʌ i beque che' ñac ti joc'le ti cruz. Jini waj mu' bʌ lac xet'e' cha'an laj c'uxe', i señʌjlel mi lac motin ajñel la quic'ot Cristo cha'an ti' bʌc'tyal Cristo tsa' bʌ i yʌc'ʌ cha'an laj cotyʌntyel.

¹⁷Aunque cabʌlonla pero mi lac lu' c'uxe' ti mismo jini jach bʌ waj. Junq'uej jach jini waj. Jin cha'an, cha'an ti laj c'uxu junq'uej jach bʌ waj juntiquilon jach la yubil.

¹⁸La' lac poj ña'tyan jini lojon c pi'ʌlob israelo' bʌ. Jini ti' c'uxuyob jini we'el aq'uebil bʌ Dios ti yajnib pulem bʌ i majtyan. Junlajalob i pensal cha'an lajal ti' ch'ujutisayob Dios.

¹⁹Mach com cʌl an i c'ʌjnibal melel jach bʌ dios tyac. Ma'ix más an i c'ʌjnibal we'el aq'uebil dios tyac che' bajche' ba'ical jach bʌ yambʌ we'el.

²⁰Chʌncol cʌle' jini mach bʌ ba'an mi' cʌñe' Dios che' mi yʌq'uen we'el cha'an i majtyan i dios mi yʌq'uen i majtyan xibajob. Mach Diosic mi yʌq'uen. Mach com mi la' motin c'uxe' yic'otyob i cha'an bʌ xibajob.

²¹Mach ch'ujbi lac jape' i cha'an bʌ lac Yum che' yic'ot i cha'an bʌ xiba. Mach ch'ujbi la' cha'len uch'el cha'an i ña'tyʌntyel lac Yum che' chʌncol la' cha'len uch'el cha'an i ña'tyʌntyel i cha'an bʌ xiba.

²²Mach yom mi la cʌc' ti mich'an lac Yum. Como ma'ix más p'ʌtyʌlonla bajche' lac Yum.

²³Melelʌch che' bajche' mi yʌlob: Librejix añonla lac mele' chʌ bʌ jach la com, che'en. Pero ma'ix lu' an i c'ʌjnibal. Librejix añonla lac mele' chʌ bʌ jach la com pero ma'ix mi' lu' cotyañob i yajñel ti más wen ti lac Yum.

²⁴Mach yom mi lac pensalin i bajñel jach lac bajñel wenlel. Pero yom mi lac ña'tyan je'el i wenlel yaño' bʌ.

²⁵Libre añetla a c'uxe' chʌ bʌ jach mi' cha' choñob ti mercado che' ma'an mi la' ñaxan c'ajtin mi tsa'ix aq'uenti melel jach bʌ dios tyac cha'an mach'an chʌ bʌ mi quejel i yʌle' a pusic'al.

²⁶Como ili mulawil yic'ot pejtyel i bʌl je'el lu' i cha'añʌch lac Yum.

²⁷Mi juntiquil mach bʌ ba'an ochem ti' t'an Dios mi' pʌyetla ti q'uin mi la' wom majlel c'uxula chʌ bʌ jach mi' pʌs'eñetla. Ma' ma' c'ajtin mi aq'uebil dios tyac cha'an ma'ix chʌ bʌ mi yʌle' a pusic'al.